⛰️⛰️جبل نورسين🌕🌕
الجزء 440:
نورسين بمجرد مافتحات عويناتها و شافت جبل أمامها ما قدراتش تماسك نفسها خاصة أنها مرات من لحظات مرعبة سرعان ما تدكرات جميع المشاهد المخيفة اللي عاشت لذلك ماحسات براسها حتى مدات يديها على عنقو و زيرات عليه ضمات جبل لعندها بكل قوة حتى لصق صدرها على صدرو بطريقة ما تقدرش تفرق بيناتهم دموعها خانوها من جديد و نزلو من خدها شهقاتها كيطلعو من صدرها بطريقة دبحات فؤادو زادت كملات عليه حس بإرتجاف جسدها بين يدو الشيئ اللي خلاه يزير عليها أكثر داتو كترعد أكثر منها ما بقاش كيحس براسو شنو كيدير كأنه ترفع قلبو هو العضو الوحيد اللي بقا خدام و كينبض بكل قوة ماعرفش واش يفرح ولا يحزن على الحالة اللي وصلها ليها هز يدو بتثاقل ومررها على خصلات شعرها هبط راسو حتى حشاه فعنقها كيشم ريحة عطرها ناعمة و دافئة بحال شخصيتها ما كرهش كن توقع معجزة و توقف ساعة فهاد اللحظة و فهاد المكان و فهاد الزمان...
نورسين بين أحضانو كانت هادي هي اقصى امنياتو وها هي تحققات للحظات فكر كيفاش غادي يكون ملمس شفاهها اكيد إلا لمسهم غادي يكون وصل لجنة غمض عينو وتخايلها بفستان عرائس أبيض اللون اكيييد غادي تبان كأميرة القصص الخيالية يا الله شحال كيتمنى يشوفها بهاد الفستان و يكون هو حبيبها و زوجها و سندها فالحياة واش يقدر شي نهار يصارحها بالحقيقة اللي هاز من سنين فقلبو حتى لامتى غادي يبقى صابر وهي بعيدة عليه...
ما فيقوا من احلامو غير صوت شهقات نورسين اللي كتعلى و كتحاول تبعد عليه حل عينو بسرعة و بعد عليها باش ما تشك فحتى حاجة ...
تلاقات عينيه مع عينيها من جديد و بلا ما يشعر حط يدو على خدها ميل راسو بطريقة ضريفة و نطق بكل حب بنظرات عاشق متيم ...
جبل:شوية دابا ؟!
نورسين بقات كتشوف فيه و كترمش بعويناتها بصدمة كتحاول تستوعب هي فين و شنو وقع ليها هزات يديها كتمسح دموعها و نطقات بشهقة بكاء فنبرة صوتها ...
نورسين: جبل شنو كدير هنا ؟ فين انا و فين هي سلمى ؟؟
التافتت للأمام و هي تلمح يعقوب و سلمى جالسين كيشوفو فيها ...
نورسين : [بعدم فهم ] سلمى شنو واقع فوقاش جاو يعقوب و جبل ياك كنا غير انا و ياك ؟؟
سلمى مدات يديها قبطات فيد نورسين و قالت ...
سلمى : غانفهمك كلشي غير طمنينا عليك كي بقيتي أ حبيبة شوية دابا ؟؟
نورسين تقادات فالجلسة و جبل غير حاضيها ؛ وضعات يديها على راسها كتحس بيه غايطرطق ...
نورسين:كيضرني راسي
سلمى شافت فجبل و غمزاتو بلا ما تعيق نورسين و نطقات موجهة كلامها لنورسين ...
أنت تقرأ
جبل نورسين 🇲🇦 (مكتملة )
عاطفيةيعقوب : حتى انا اخويا دزت من الحب من طرف واحد و لكن ماوصلتش ليك نتا المرحلة اللي وصلتي ليها ديال الحماق جبل: و راني حمق واش كانبان ليك بعقلي نورسين فين خلات ليا شي عقل بقا ساكت و سهى فالفراغ و قال بحرقة كأن قلبو اللي كيتكلم فهاد اللحظة ... جبل :...
