جبل نورسين 🇲🇦 (مكتملة )

الجزء 20

🌕🌕جبل نورسين ⛰️⛰️

الجزء 103:

🔚🔚رجوع للواقع

كان ماضي أليم و مرير فحياة جبل أكره حاجة عندو هي يتذكرو و لكن فيه أكثر حاجة كايبغي فهاد الدنيا  هي لقاءو بنورسين بنت قلبو و حبيبتو و ملاكو طاهر اللي مازال تفاصيل لقاءهم عالق بدماغو بحال تلاقاها غير البارح  ...

ما فيقو من سهوتو غير صوت يعقوب صديقو اللي كان جالس بجنبو فطوموبيل ...

يعقوب: و قصتك معاها قصة نيت خاصها تكتب

جبل: [بابتسامة ] قصة غريبة و لكن حتى واحد ما عارف شنو كاتعني ليا نورسين [تنهد  بألم ] نورسين  هي الانسانة  اللي بفضلها انا حداك دابا  عايش غير على قبلها  كن ما كانتش كن راني فالقبر

يعقوب : [بمزاح ] اللي شافك دين و الايمان و حافظ ستين حزب و كتهضر على الحب حشومة أ صاحبي عيب

جبل التافت لعند يعقوب و قال ...

جبل:  امتى كان الحب حرام ؟؟؟

يعقوب: تا راه غا ضاحكين أ العشير ما نلقاش عندك شي كارو حتى ندير و نردو ليك فساعة الخير

جبل جبد من جيبو باكية خدا منها كارو و مدو ليعقوب و قال ...

جبل: الله يعفو

يعقوب خدا من عندو الكارو جاوبو هو الآخر ...

يعقوب : الله يعفو علينا كاملين

حط يعقوب الكارو ففمو و بقا ساهي فالفراغ حتى نطق ...

يعقوب : غاتكون توحشتي ليلى بزااف

جبل بقا ساكت ما جاوبوش موضوع ليلى هو ثاني حاجة كاتقيسو فقلبو و كاتزعزعو حس بدموع تجمعو حدا عينو فاش تفكر حنانها عليه  و كلامها طيب و القيم اللي غرسات فيه و كيرجع ليها الفضل فهاد جبل اللي هو عليه حاليا ...

جبل: توحشتها بزاف الحاجة اللي غانقول عليها هي الله يرحمها روح

يعقوب: الله يرحمها و يوسع عليها و لكن أصاحبي الا رجعتي سنيتة اللور غاتلقا بلي  هي سبابك فهاد التزريفة

جبل التافت لعند يعقوب و خنزر فيه تخنزيرة خاايبة زعزعات يعقوب حتى شداتو الكحة عارف راسو مبلوز ما عندو غير جيب يا فم و قول  ...

يعقوب : كح كح احم بغيت نقول ضبرات ليك فنورسين  اللي دخلات لحياتك  و زعزعات ليك العقل و القلب اكثر ما راهو مزعزع

جبل بقا غير كيشوف فيه و كيخنزر ؛ هو ضريف تاكليه بحوايجو  و لكن فاش كيعقد الحداش كيتحول لشخص أخور  كيرجع وحش ما كيفكرش و حتى الهيبة اللي فيه كاتزيدو فخامة الكاريزما ديالو بوحدها ما منهاش جوج رجال بشلاغمهم كيطاطيو منو بالخلعة . جبد من جيبو كارو و شعلو هو الآخر و موجه انظارو نيشان ما كيشوفش فيعقوب ...