جبل نورسين 🇲🇦 (مكتملة )

الجزء 54

⛰️⛰️جبل نورسين🌕🌕

الجزء 392 :

سلمى صرطات ريقها بصعوبة عرفاتو كيحشي فيها الهضرة على الفعلة اللي دارت واخا هي و الله ما قصدات فيها شي حاجة هي فقط تسرعات ما ظناتش غاتقصحو حتى لهاد الدرجة ...

سلمى : شوف أخويا جبل و الله العلي العظيم ما قصدت نبعدها عليك و أصلن شكون انا اللي غانبعد عليك نورسين الملاك  القطيطة و الحبيبة ديالك ما كاين حتى واحد على وجه الكرة الأرضية يقدر يفرق بيناتكم حتى سحر الأسود ياك أ يعقوب هضر قول شي حاجة

يعقوب هاز الكاميرة فيدو كيصور بيها سلمى و كايموت عليها بالضحك حيت عرفها مخلوعة و بدات غير كتسايس معاهم باش يفكوها و يطلقو سراحها لدلك التافت شاف فجبل و قال ...

يعقوب : أش بان ليك نفكوها و لا لا ؟؟

جبل مرر يدو على لحيتو و نطق بكل برودة ...

جبل : مزال ما فسرات لينا الفعلة اللي دارت علاش غانطلقوها 

سلمى : ياك قلتي ليا البارح الله يسامح ما ظنيتكش كاتحقد حتى لهاد الدرجة و الله ما كنت ناوية شي حاجة باش بغيتي نحلف ليك

جبل : و راه هنا المشكل حيت انا عارفك ما كنتيش ناوياها داكشي علاش نتي هنا  اما كن كنتي ناوياها غير شهدي على روحك

سلمى : دابا من اللخر  حتى نتا غالط علاش أخويا البارح كتقول ليا برهوشة و مركب فيا رعب ماشي حرام عليك تخلعني هاكاك شنو درت ليك و الله يا خويا الا نورسين شحال من مرة عصباتني بسبابك من ديما كنت نصحها و نقولها جبل هو اللي يصلاح ليك و ندخلك لراسها باش تبدا تبغيك و تحس بيك حتى ركبات فيا الفقايص ديال دنيا و دين و فالتالي أسي جبل جعرتي عليا و سمعتيني المنقي خيارو بحال زعما انا ما مزيانش و بحال  لا عمري بغيت ليك الخير حشومة  عليك تمرمدني ديك تمرميدة كلها اه عارفة نورسين خليتيها ليا امانة و لكن نتا ديجا حاط معانا لي كارد كور و اصلن واش انا كنت عارفة غايتعرض ليها أحمق كان بإمكانو يتعرض لينا بجوج انا زعما مطفراه راني غير ولية و غير دخلنا لطواليط شكوى لله

جبل عض على شنايفو و بقا ساكت كيسمع  لحديثها حتى سالاتو كامل و قال بكل برودة ...

جبل : مزيان هادشي  اللي قلتيه و دابا جات نوبتي نهضر حتى انا... البارح فغيمون قصحت معاك الهضرة كنعتادر و لكن ما كنتش فوعيي  رشيد جهلني و الغيرة عماتني  و نتي عارفاني فاش كنتعصب راسي ما كنعقلش عليه هادي من جهة و من جهة اخرى انا عارفك كاتعاونيني فنورسين واش انا عمري قلت ليك العكس الله يجازيك بخير داكشي اللي كديريه معايا ما غانكروش الا كانت نورسين نفسيتها تحسنات و تطلقات معايا بالخصوص  فهادشي كايرجع ليك حيت نتي اللي كنتي داعماها و كتهضري معاها عارفها كتسمع ليك و عارف بلي نتي عندها عزيزة بزاف و هادشي حتى هو كيطلع ليا دم واخا غاتقولي هادا مسطي فدماغو و ماشي نورمال اه أ لالا عارف راسي ماشي نورمال باش نجيك لصراحة نورسين ديالي بوحدي و حتى المعزة ديالها ليك كاتمرضني فاش كتعنقيها و لا كتبوسك كنحس بالعافية عندي لداخل انا هكا داير هادشي اللي داير فيا الله و قابل عليه الحمد لله و لكن ما يمكنش نسجنها و نقطع علاقتها مع ناس غير حيت انا مريض بيها نخنقها ما يمكنش خاليها على خاطرها باش ما تنفرش مني و جبتك ليها باش تونس معاك حيت كيفما كان الحال كنبقى غريب عليها و نتي هي صاحبتها  و بنت بحالك بحالها غاتقرب منك و لكن انا ما كنبغيش نفكر هاكا باش ما نتسطاش و الفعلة اللي درتي البارح أكدات ليا بلي نورسين كتعزك أكثر مني لدرجة ما فكراتش جوج مرات فاش خيرتيها ما بيني و بينك فالبلاصة اختارتك  و المشكل كن دارها ليا شي واحد ما كيعرفنيش ندوزها و لكن اللي قصحني درتيها نتي دارتها ختي سلمى اللي عارفني مناش كنت كندوز و شحال ديال دوايات كنت كنشرب عارفاني كنت كنتخدر باش نساها عارفاني بلي كنت مدمن بسبابها و زيد و زيد ديال الحوايج اللي دوزتهم قبل ما نلقاها و دابا فاش لقيتها بديتي تلوي ليا دراعي بيها متفهم أنك كنتي حتى نتي معصبة و لكن داك تصرف ديالك ماشي حتى لتماك ...