شياطين الانس
حلقة 26
للكاتبه اسيل بن ناصر
و حسبنا الله فـِ من آذانا..
و من ظلمنا.. و من ذكرنا بالسوء .
حسبنا الله وحده و كفىٰ♥️♥️..
...
مريم قلبها نار وماريحها كانت مشغوله علي منذر الفجر اذن و ماروحش ولا مروان طمنها قعدت تبرم وعقلها يمشي ويجي ومعش عرفت شن ادير لبست من جديد وكانت بتنزل لحوش هلي بالك تلقاه تحت ولا تلقا مروان بتسال عليه.. سمعت صوت مفتاح الباب وقفت في مكانها لحد ماخش منذر وكان باين عليه التعب بحث فيها بكل برود.. وسكر باب الشقة..
منذر.. وين ماشيه ان شاء الله..
مريم بعفويه.. كنت نازله بنسال عليك مروان.. انشغلت عليك وين كنت كل هل وقت..
منذر عزق مفتاح ع طاوله وعزق روحه.. انتي الي دازيتي مروان يدور عليا..
مريم وهي تحاول في لبسه صلاه.. انشغلت عليك بس..
منذر ببرود.. مريم ممكن تقعدي عشان نحكو.. في كلام لازم تعرفي ونحكو فيه
قعدت مريم حاسه ان منذر ح يقول شي يقهرها...
منذر.. انا بنرد زوجتي..
مريم بهدوء.. ليش يعني انا مالياش يوم عندك وانت طلقتها و..
قاطعها منذر.. انتي لما وافقتي عليا كنتي تعرفي اني متزوج. صح..
مريم بغيض.. صح بس كنت بنعرف سبب زواجك ع زوجتك بس تفاجاءه باانك طلقتها..
منذر.. لان هلي جبروني انطلقها وهلها جبروها تطلب الطلاق انا كنت مغصوب ع زواجي منك..
مغصوب.. مغصوب.. مغصوب.. تكررت الكلمه في عقل مريم ورغم المها الداخلي الا انها تماسكت وغطت حزنها ببتسامه لطيفه..
كمل منذر ببرود.. هو شوفي انتي الي تبيها حاضر انا نبي منك بعد انردها كان باتي وامي درولي شوشره وهرجه تقوليلهم انك موافقه وراضيا وشي تاني الشقه هذي لأمل بعد بنردها ح تكون لها انتي ح نكمل شقه الي قدام وتكون لك..
مريم بهدوء.. مافيش داعي اتكملها خليها لخوك.. انا ح نقعد عند... عمتي تحت هي فتره وح نرد لهلي..
منذر ماقدرش يمنع سعادته لما عرف انه ح تطلب طلاق.. وسالها بتطلبي طلاق..
مريم بكسره خاطر.. اكيد انا مانحب نكون حمل ع حد وبعدين زواجنا كان غلطه..
...
وناضت بدون ماتسمع كلمه من منذر وخشت للدار وهي تمنع في دموعها ينزلو وحست بغصه في قلبها بكت ع حظها ونصيبها الي رماها في ايدين شخص بارد واناني زي منذر..
...
تمنت لو تقدر توا تشوف عمتها فتحيه وتحكيلها وتشكيلها اكيد كانت ح تقوللها شن ادير اكيد كانت ح توقف جنبها رغم انها عارفه ان مرات بوها وبوها مش ح يريحوها..رمت روحها ع سرير وغطت وجها وهي تبكي باالم ع نصيبها الي رمها بين يدين راجل كيف منذر..
.....
ومنذر ارتما ع صالون بفرح ورقد وهو يفكر ان قربه من امل قرب ومعش في عواقب قدامه مدام مريم موافقه وهي بتطلب طلاق..خلاص يامنذر هي ايام وتكون امل لك بس مريم شن بيصير فيا بطل تفكير للحظه وضاع في نوم
