شياطين الانس
اسيل بن ناصر
حلقه 85 الاخيره
......
#أنجح العلاقات هي #تلك التي تكون فيها #بنسختك الحقيقيّة من #ذاتك التي تكون #فيها كما أنت ولا تخجل من #التعبير عن نفسك #وعن رغباتك #وعن ميولك وأفكارك وشعورك #بل وجنونك #تلك التي لاتشعر فيها #بالاختناق #لأنك تتزيّف #داخليًا وخارجيًا لكسب #رضا أو #إعجاب أو ثقة من أي #شخصٍ كان...
....
يوسف درس قدام الحوش ومسك يد روان مبتسم..توا ارقي لشقتك وتريحي ع مانحكي مع امي ونجيك..
روان ابتسمت ونزلت من سياره وهي فرحانه لانه واخير ربي جبر بخاطرها واخير ح يكون عندها بيبي واخير ح تحس بشعور الحمل حطت يدها ع بطنها ورقت لشقتها وهي مبتسمه..
يوسف نزل من سياره وخش لحوش لوطا اول ما فتح باب جنا خوات يجرن وكان باين ع وجهن الضيق..
سلوي سالته..يوسف وين كنت..
يوسف حك راسه..روان تعبت اشوي وشلتها للمستشفي كنك شن صاير..
سلوي..وكنها ان شاء الله خير..
يوسف..خير باذن الله..بس وين باتي..وامي مازال ماروحت..
سهام..باتي عرف بالي صاير وعدا ايجيب في امي من خالي..
يوسف قعد ع صالون بقلة حيله..معناها ح تصير عركه كبيره بينهم من قاله بس الي صار..انا وروان راه والله مانبو نحكو اصلا امي بدوني نا وباتي مستحيل ايصير شي كلام صبايا..
سهام..انا الي قتله الحق باتك حلف عليا انا وسلوي لو مانحكو معاد انخشو للحوش شن تبيني اندير..يايوسف..
يوسف وهو يفكر بعصبيه..ماعندنا مانديرو امي ربي يهديها ع دراته..والله هل حركات ماهي لها بكل..
سلوي وهي متنرفزه..هذين فعايل مراءه خالك صدقني امي مستحيل ادير هك راه من راسها هي الي تاخذ واتزن عليها ونا متاكده ان هذي دبايرها..
......
وشوي وسمعو صوت باب انحل وخش عمر وكان باين عليه حامق ومتنرفز..
عزق مفاتيح ع صالون وقعد عليه..وهو ياكل في روحه وباين عليه الضيق والحمق..
سهام بخوف..وين امي ياباتي..كنها ماروحت معاك..
رد عليها عمر حامق ..عند خالك خليل خليها بيش اتربي من جديد نا ادير فيا هك..
يوسف قرب من باته..غير اهدي ياباتي وقولي ليش ماروحتها معاك..راه ان كان ع موضوع انا وروان مش مدورين ماديرش معاه مشكله علينا..
عمر..ماهو نا كنت بندير هك بس امكم كثرت معاي في كلام ولا مش حاسبه وراها راجل قتله خليك عند خوك لعند تعرف قيمه حوشك وراجلك..
سلوي وهي واجعته امها..بس ياباتي امي ماعمره طلعت عن شورك هي هل مره كان روحت بيها وتفاهمتو في حوش مش سيبتها عند خالي..انت عارفها مااتريح الا في حوشها..
