شياطين الانس
للكاتبة اسيل بن ناصر
حلقه43
...
اللهم أسعدني أكثر مما تألمت ،وأرحني أكثر مما تعبت، ولا تخيب أمالي ، فأنت حسبي ونعم الوكيل ياا الله 🙏🌼
......
امل من صدمه معش تكلمت بس بعدين بعصبيه برمت ع منذر.. وانت شن عرفك انها حامل وبعدين شن عرفك انها صادقه احتمال كبير اتكون تكذب هضا كله عشان تبقي ع ذمتك وعشان تهرب من ذنب ولدي...
منذر.. امل باتها كلم باتي وبلغه عشان يعرفه انها مازالت ع ذمتي يعني الموضوع اكبر من كذبه..
امل وهي ترفع حاجبها.. وانت شن يقول خاطرك تبي اتردها بعد طلاق وتنسا الي قتلت ولدك وحرقت قلبي..
منذر.. انا ماطلقتها بيش انردها هك ايقول الدين والشرع..
امل.. امالا بعد اتجيب خليك عند كلمتك وطلقها..
منذر..يفرق موضوع توا هي عندها عيل..
امل..عيل شن دوته غير تاكد انها حامل وبعدين احكي وبعدين كيف يفرق مايفرق نا شن ذنبي هي قتله ولدي ونا لما جيت قتلي ردي الي حوشك قتلك طلقها ف توا انا مش شوري يامنذر...
تنهد منذر ودرس سياره قدام شقتهم..انزلي توا وبعدين ساهل..
امل..وين ماشي انت توا ومخليني نحرق..
منذر..ماشي لاامي في مستشفي كنك شن تبي..
امل نزلت من سياره وخبطت الباب بقوة ورقت لشقتها وهي متنرفزه وتلعن في حظها هي ماصدقت تخلصت من مريم تطلع حامل توا عاد شن ايحزها هو منذر بعد سمعها حامل ياما صار فيه حست بالغيض من تفكير من الموضوع..
...
في مكان تاني في مستشفي عند فرحات و ام منذر..
فرحات..اسمعي الي سمعتي يبقي بينا فاهمه..
ام منذر..بس ياحاج هذي لفعه لازم ولدك ايتفكه منها من يوم الي خذها وهو مامقدم قدام الي كيفه بعياله توا..
فرحات..الدوه هذي كلها نا عارفها بس نبي نعرف امل شن دارت وكيف وليش تخلصت من الحمل وحطت قصه براس مريم بعد.نعرف كل هضا ليا معاها كلام هي وهلها..
ام منذر سكتت وهي عارفه ان كلام فرحات صح لازم امل ينحطلها حد وتطلع من العيله وهل شي مايجي بسهوله..
فرحات..ومريم راه مازالت ع ذمه ولدك منذر..
ام منذر..كيف ياحاج وهو طلقها قدامنا..
فرحات..مريم حامل وطلاق مايمشي عليها..
ام منذر وهي تضحك..صح ياحاج الحمد الله الحمد الله ربي عوض اوليدي خير..
فرحات..الحمد الله بس مشكله ان بنت بعد تبي اتجيب هلها بيطلقوها راه انتي وولدك غلطو في عرب..
ام منذر..صح ياحاج عندك حد وان شاء الله كل شي يصلح ويرد احسن من قبل..
فرحات..كل شي يصلح لما ولدك ايحط عقله في راسه ويفتح عيونه ع صح مش متبعلي رايات مراته..
.....
