شياطين الانس
اسيل بن ناصر
حلقة 37
،🍒👌
ثم سَـ تُرزقُ على مَا يحملهُ قلبكَ و سَـ تُنجيك صِدقُ نوايَاك 🧡🌻.
ــــــــــــــــــــــــــــــــــــــ
التفتت روان وجت عينها بعين ام يوسف استغربت ليش جيتها في دار نوم وعرفت من نظرت عينها انها بتحكي معاها.. واكيد كلام زي السم لان باين من معاملتها وتصرفاتها ان مش راضيه ممكن هي ساكته خوف من عمها عمر..
روان.. ان شاء الله خير ياعمتي.. تفضلي قولي الي تبي اتقولي
ام يوسف وهي تشير ع روان بصبعها كتهديد.. اسمعي كويس انا راه مش راضيه ع زواجك انتي وولدي عمر غاصب عليا غصب حتي جيتك للحوش مانبيها انتي واقع انفرض علينا فامافيش داعي اتعيش الدور واجد.. يعني انتي مش كنتي الله غالب عمك فرض عليا انديرلك هل استقبال كدراما زايده ع سبه خوته لا اكثر ولا اقل عشان هك ريحيني من دور الطيبه الي تلعبي فيه..
.
.
قعدت روان ع طرف السرير قدام ام يوسف وردت.. لا مش عايشه دور الكنه ولا عايشه دور الطيبه هي فتره وتعدي واتفقت نا ويوسف ع هك وان كان ع جيتي للحوش انا مانبيها وكان تبي من توا ناخذ شنطتي ونطلع بس عمي عمر اصر عليا مش قاتله روحي عليك ولا ع وليدك وحيدك الي بتموتي عليه..
ام يوسف متنرفزه.. احكي معايا كويس و..
قاطعتها روان.. انا خشيت عليك بحترام وانتي الي قالبه وجك عليا وتحسابي ولدك ملاك بريئه الباين عمي عمر مش مفهمك شي ولا عارفه قصتي مع ولدك بس انك تقعدي اتهيني فيا لا والف لا ساد تحملت ولدك اتزيدي عليا انتي لا..
..
ام يوسف.. وشن دارلك ولدي ضربك ع يدك عشان تهربي معاها ماهو بكريعتك هربتي معاه كله ع تربيه ماهو كانك متربيه و عديتي باتك وامك مش لحقتي ولدي وطاوعتيه انتي مادرتي هكي الا برضاك.. وبعدين الراجل مايعيبه شي يكون في معلومك وحطي في احسابك يوسف ح نزوجه الي ع مزاجي وانتي دبري حالك.. ايوه..
وطلعت وسيبتها روان نزل ادموعها بقهر وعندها حق لو كان زمان رفضت راه ماكان حالها هك مذلوله حتي بعد ازوجها امه اتعاير فيها..
قعدت ع سرير وهي تبكي بقهر وتفكر شن بيمشي هل شهور.. حست بحد خش وكان يوسف الي قرب منها وهي مسحت ادموعها بغل..
روان..الله لا يسامحك دنيا واخره انا شن ذنبي يصير فيا كل هضا شن ذنبي حبيتك ووتقت فيك وهك كان نصيبي يايوسف...
يوسف وهو يحاول ايهديها..غير شن قالتلك امي اهدي..
روان وهي تبكي وتمسح في دموعها..اتعاير فيا ع هربتي معاك حسبي الله ونعم الوكيل الله لا يربحك يايوسف..
وقعدت تبكي ويوسف حمق ومعش عرف مايدير طلع من دارها ومشا للصاله وين ماامه وباته..
يوسف..ليش ياامي..بالله عليك روان شن دراتلك بيش اديري فيها الي اديره وتسمعيها كلام زي سم...
