شياطين الانس
اسيل بن ناصر
حلقة76
.....
أكثر الصدور حناناً
هي أشدها حـاجة للحنـان
وَ أكثر القلوب نبضاً بالحُبِّ
هي أكثرها افتقاداً له
وَ أكثر النفوس نقاءً وَ قناعةً
هي أكثرها صدمةً وَ أحوجها لـِ الإحتواء
وَ أكثر الألسن حديثاً عن القوة وَ التفاؤل
هي أكثر الأرواح إحتياجاً لـِ الدعم
خاصةً أنها في الغالب تتظاهر بما ليس فيها..
....
محمد خش لحوشه وهو حامق وقف في صاله وهو ينادي...اسراء يااسراء..
طلعت اسراء من مطبخ تجري ووراها سالمه منفجعات..
ردت اسراء وهي ترعش..نعم نعم شن في ياباتي..
محمد قدم منها وبحمق كرها من ذرعها..متصله بخالك انتي..
اسراء وهي ترعش مع بعضها ومش قادره تحكي..
عاود محمد سالها وزاد ضغط ع ذراعها..انتي مكلمه خالك ولا لا..
سالمه جاته تجري وهي اتحز عليه..نا دخيلتك اطلق بنت كنها شن دايره..
محمد بحمق وهو يفنص..شاكيه لخالها قايلتله باتي غاصب عليا نزوج راجل اختي..
اسراء قعدت تبكي وترعش..
وسالمه اتحز عليها..امسح في وجه اخر مره اديرها معش اتكلم بكل امسح في وجه وراس محمد..
محمد وهو يعيط..هي اخر مره ان شاء االله وطلق يدها..امشي جيبيلي تلفون..
عدت اسراء تجري جابت تلفون لباته وهي تبكي..
محمد رفع صبعه وبتهديد..وحق لا الله الا الله يااسراء ان كان مابطلتي حركاتك هذي لانك بنتي ولا نعرفك وماعطيك قلة السموحه انكان ماخذيت فراس وهذا اخر كلام عندي..نا عطيت راجل كلمه شنو بتصغريني قدامه..
سالمه وهي تهدي فيه..غير اهدي يامحمد راه يرقا عليك ضغط اهدي..
محمد وهو يخبط..وين نهدي وبنتك الي ماتحشم ماخلت فيا وجه نا شن انودلها غير خير امشي خشي لدارك معش بنشوف وجك لعند اتعدي لراجلك..
وخشت اسراء لدارها تبكي وترعش مع بعضها ع كلامه باته الي كان كلام نهائي وماعندها كيف تهرب منه..
سمع محمد صوت جرس باب مشي يفتح وهو قالب وجه الي كان منحمر من عياط وغيض..
محمد وهو مستغرب ويرحب..مرحبا ياعمي عمران انستني ونورتني مرحبا..
عمران خش وهو يخبط بعكوزه..الله يانسك كنا صوتك عالي وع من كنت تعيط..
محمد نزل راسه..خش ياعمي وتوا نحكيلك..
خش عمران للمربوعه وقعد جنبه محمد بعد وصي ع قهوة..
محمد وهو يحك في راسه بهم وكان باين عليه تعب..البنت تعبتني ياعمي الراجل الي متقدملها ولد ناس ونعرفو ومقتدر ماشاء الله عليه وهو جاني وطالب نسبي ونا عطيته بس بنت ع مادرت فيه مابت تقتنع ومامخليه حد الا ومكلمته محشمتني مع العرب...ياعمي..
