شياطين الانس للكاتبه اسيل بن ناصر ..مكتمله

حلقة73

شياطين الانس
للكاتبه اسيل بن ناصر
حلقة 73

.......
‏تتأخر وكأنها ليست من نصيبك ثم يبهرك الله بطريقة تحقيقها، ثق بالله وأطمئن 🧡"
.....  

ساره وسلوي بحتن في بعضهن بستغراب..

بسمه بتوتر..
بسم الله كنكن استغربتن ..
ساره مبتسمه..شن غير رايك قصدي مش ع اساس سنتين وبعدين اتسافري..

بسمه ارتبكت..هك تعودت عليه وبعدين عبدو قالي ان دراستي انكملها بره افضل وهك يعني..

سلوي ضحكت..قولي انك كبدتي عليه ومش قادره ع بعاد ياحنه..

بسمه وساره ضحكن..

كملت بسمه..غير بلا سماطه ساره نبيك تحكي لااكرم ايمهد لماما موضوع يعني بعد اسبوعين بيرد عبدو بيقعد يومين بس نقروا فاتحه ونسافرو..

ساره..ياناوعليا اسبوعين حي عليا والله عميمه تقتلك انتي وياها انت عارفه امك كيف متعلقه بيك كيف بيقنعه اكرم..

بسمه ..يقدر غير احكي معاه اليوم وانتن ساعدني..

سلوي..والله وبتقعدي عروس ياسلوي والله والله ح نريف عليك من توا يانا عليا مع من بنقرم مع من بنتعارك ع غسل ماعين الغذاء..

بسمه ضحكت..قولي تبكي لانك بتغسليهن بروحك يابارده..

ساره وهي تضحك..ربي يهنيك وان كان ع اكرم يوم نحكيله وان شاء الله عميمه تقتنع وتمشي امورك..

بسمه..يارب يارب..

وضحكن عليها وهي ترفع في ايديها وتدعي بالهفه..

......
حسام خش ع جده في مكتب..

حسام..سلام عليكم امي قالتلي تبيني..

عمران..اقعد تعال..

حسام قدم وقعد ع كرسي الي قدامه..
عمران وهو يسلح في نظراته طبيه..انت طلقت مراتك بتول وعندك علم انها حامل..

حسام قرن حواجبه وبستغراب..لا ماعندي العلم انا اصلا من يوم طلقتها قدام خوتها معاذ انجيب منها علم..

عمران هز راسه وبحث في حسام..راه طلاقك الها غير واقع يعني مازالت ع ذمتك..
حسام ناض من مكانه..شن تقول ياجدي..

عمران وهو يعلي في صوته..اقعد وفكني من هبال وافهم..

قعد حسام وهو مضايق من السمعه..

كمل عمران..مراتك بعد رميت عليها طلاق كانت حامل وحامل الطلاق غير واقع عليها هضا في شرع وفي دين طبعا خوتها مابلغوك وشكلهم غافلين ع هل شي لانه بعد الطلاق بااسبوع زوجوها لشخص تاني وهل شي باطل شرعا اول شي لانها مازالت ع ذمتك وتاني شي..وين شهور العده الي مفروض تكون فيها بتول..

سكت حسام ورفع حاجبه وبعد تكلم..به توا ياجدي شن الراي قصدي نا وامي وسلوي في بالنا انها اطلق..