💕💕 قصة الشرف 💕💕 بالدارجة المغربية

😊 الفصل 55😊

#الشرف

🥀منك و إليك انتمي 🥀

‏‏"أستحق أن يحبني أحدهم بكل قلبه كأنني مُعجزة، وكأنني أكبر إنجازاته"....❤️✨️

✍️ soukaina soulaika

البارت 285

المشاعر داخلها ترونو ، كتحاول تصدق عينيها و تيق أن لي قدامها يعقوب ، رجليها تبتو في بلاصة وحدة ما قدروش باقي يتفاوتو من بلاصتهم ، أحاسيسها مرونة .. هزات يديها كتحك في عينيها باش تتأكد أنه هو فعلا ، شافت في وصال بملامح الصدمة و عدم التصديق سولاتها باش تتأكد ..

_ بهية : (بالصدمة) واش يعقوب هذا ...!؟ واش فعلا هو لي جالس قدامي ..

لي جات في بالها قالتها مبقاتش كتفكر ترونات ، حالتها جاتهم في شكل كلشي سكت و بقاو غير كيشوفو فيها بإستغراب ، وصال بغات تعتق الموقف و ما لقات ما دير .. يعقوب هو الآخر غير كيشوف فيها و في عينيها لي مدمعين ما فاهم والو ، شاف في وصال بإستغراب باقي لدابا تالف مالهم ، حالتها كأنها شافت شي شبح قدامها ، نغزاتها وصال حتى شافت فيها و هضرات معاها بصوت منخافظ باش تتوگض ...

_ وصال : (مفقوصة كتهضر بصوت منخافظ) شششش بهية تبتي اش وقع ليك ...!؟ رآه كلشي كيشوف فيك غدي غير تعيقي ...

شافت فيها و سمعات كلامها ولكن باقي مستوعباتش رجعات شافت في الحضور حتى جاو عينيها على عيشة لي كتبسم ليها و غير شافتها تأكدات أن فعلا يعقوب هو لي جا باش يخطبها ، خاصها وقت باش تستوعب و تقدر تركز أكثر ، حيدات يديها من يد وصال بعدات عليها هي و يعقوب و شافت فيهم كاملين كتهضر معاهم بصوت منخافظ شويا ...

_ بهية : سمحو ليا

كتافت بهذ الكلمة فقط ، اش قصدات بيها واش يعتابروها رفض لزواج و لا اشنو ، شي ولا كيشوف فشي حركاتها جاوهم ماشي طبيعين شي حاجة في الموضوع ، بغات تبعها وصال و عمران حتى هضر يعقوب بصوته كتحس بيه صابر غير بزز

_ يعقوب : (بصوت قاصح) احمم غير خليك ، انا نشوف مالها إلى سمحتي ليا ا سي مصطفى...!؟

شوفاته كانو موجهين ليه ، حتى هو تشطن على بنته و ما عرفش مالها ، حرك ليه راسه بالموافقة ديك الساعة خرح من البيت كيقلب عليها بعينيه و تابع الطريق منين شافها دازت حتى لقى راسه واقف حدى الطواليط لي شاعلة فيها الضوء و مسموع منها الماء .. بعد على باب بخطوات بسيطة و وقف احتراما ليها ، لداخل كانت كترجع في عقلها كلشي و كتفكر اش وقع و كيفاش تصرفات و غير تفكرات اش دارت قدامهم جمدات بحالا خويتي عليها سطل ديال الماء بارد كتسرفق في راسها بالصدمة ، هذ النهار داز تقييييل و باقي مكملش ، الوجه باش تخرج عند الناس و تهضر معاهم مبقاش ليها ، تنفسات مزيان غاسلة وجهها من المكياج حتى ما بقى عليه حتى أثر و بانو عينيها لي تنفخو بالبكاء و اثر الصباع في حنكها بسباب التسرفيقة لي كلات من عند سعاد ، تنهدات فاتحة الباب كتلقاه واقف قدامها .. ، حولات ما تبين والو واخا تفرشات قدامهم ، كتخطوي بشويا خطوى وراء خطوى حتى وقفات قدامه يالله بغات تهضر حتى كتحس بيديه شادة ليها في دقنها و كتحس بالابهام دياله كيدوز على حنكها و بالضبط على إثر الصباع لي بقاو في وجهها ، حجبانه تعقدو راسمين حضاش في جبهته و صوته خرج قاااصح ...