💕💕 قصة الشرف 💕💕 بالدارجة المغربية

😊 الفصل 70 😊

#الشرف

🥀منك و إليك انتمي 🥀

‏‏"أستحق أن يحبني أحدهم بكل قلبه كأنني مُعجزة، وكأنني أكبر إنجازاته"....❤️✨️

✍️ soukaina soulaika

البارت 349

يمكنك أن تغير حياتك إلى الأفضل إذا تعلمت أن تضحك أكثر، والا تأخذ الحياة بكل هذه الجدية. ..

هي مجرد عبارة عند بعض لكنها عند البعض الآخر لخصات هاذ شهرين لي دازت بمرها قبل حلوها .. الحياة أحينا مكتكونش عادلة .. كل واحد كيعيش لي مكتاب ليه و ربي مقسمو ليه .. كنحلمو اه كنتمناو اه كنبغيو اه كنطمحو اه .. لكن لي مكتاب هو لي كيكون ، شهرين داوات جروح و عالجات مشاكل ولو بشكل بسييييط إلا أن التأقلم هو سيد الموقف..

اليوم على غدا أكيد غادي تتأقلم مع واحد الوضع كيفما كان يا بغيتيه يا مبغيتيهش .. الناس عايشة حياتها باش ما قسم الله و حامداه ..

شهرين خرى في دارها مع راجلها و بنتها خلاتها تزيد توعى كثر على أمور اكبر .. من بعد لي وقع كانت ليه السند و الداعم و وقفت معاه وقفة صحييييحة .. خرجات باها براءة واخا في الاول مبغاهاش و مرضاش بيها عروسة لولده غير حيت أرملة و مشكوك في بنتها و أصلها .. هاديك لي تاهموها ما مرة ما زوج في شرفها هي لي كاتوقف معاهم و ديما مسنداهم .. فضيحة خته كانت على سيرة كل لسان و خصوصا المعارف و المقربين .. جهدها دارته معاه و أكثر حتى بدا ينسى الوضع و ماشي غير هو بل كانت سند لعائلتهم في ديك الفترة كلشي كانت تالفة بيه الارض ، هي الوحيدة لي كانت مركزة و محضرة عقلها .. خبشات و قلبات مزيااااان حتى قلبات القفة على زينب و ردات ليها كلشي .. واخا السمعة لي مشات مشى كلشي لكن الايام كااافية باش تنسي بنادم لي داز و ربي نعم لينا بنعمة النسيان و كانت من احسن النعم علينا ..

هاذ النعمة لي ستخداتها ما إن طلب منها الحاج السماحة على كل لي داز و لي قال فيها .. المصائب هداته حتى ولا يمشي على البيضة و يقول ها هي غدي تهرس .. الليام في ضرف أقل من تلت شهور علاماته بزاااااف .. شد الفراش و مرض و ما لقى في جنبه غير مرته الاولى لي نفى من حياته اول ما سمع عدم قدرتها على الإنجاب مرة خرى ... ها هي واقفة معاه مرة و نص اليوم من بعد ما احبها هو من زمان و هجر فراشها .. حتى هي طلب منها السماحة و سمحااته على كل لي داز غير على قبل ولدها لي باقي جامعهم لدابا و على قبل الاجر و دوك السنين القلال لي شركو مع بعض ..

الايام فهماته أن الاعتذار مكيطيحش من كرامة الإنسان عموما و الرجل خصوصا .. إعتذاره موقفش غير عند بهية و عيشة بل طلب السماحة حتى من بنته بسمة لي مهمش و و واقف شوكة في حياتها و أحلامها ... ها هي اليوم كتكمل دراستها كيف كانت كتحلم و هي هازة راسها و علاش لا باها راضي باش كدير و مها لي رغباتها موحدة ليها ركبتها و صدرها وقتما حتاجتها و عندها اخ سند تاااابت تميل عليه وقت الشدة و أخت قبل صديقة لي كانت في مرت خوها لي فتحات ليها المجال الصداقة و حطات عليها الراس ..