💕💕 قصة الشرف 💕💕 بالدارجة المغربية

😊 الفصل 69😊

#الشرف

🥀منك و إليك انتمي 🥀

‏‏"أستحق أن يحبني أحدهم بكل قلبه كأنني مُعجزة، وكأنني أكبر إنجازاته"....❤️✨️

✍️ soukaina soulaika

البارت 344

في حين الحاج علي لي خلا السعدية مع عيشة وزينب كايفيقوها و مشا للبيت لي كاتنعس فيه نجوى ، جلس على فراشها وبداو كايدوز يدو بشوية على مخدتها كايحس براسو كايدوزها على شعر بنتو..بلا سابق إنذار هبطات دمعة حاارة على خدو..وتبعاتها التانية والتالتة ، ما عارفش راسو كي ولا تايبكي بهاد الحرقة..لي عارف انو كاين جمرة شاعلة فقلبوو..عافية لي خانقاه وما مخلياهش يتنفس ، كاتكوي فروحو غير بالمهل ، كايحس بالدنيا ولات مضلمة علاش لا و بنتو لي كانت منوراها ليه مشات...كان راضي بقدر الله و عارفة انو الموت علينا حق ، ولكن كيما كانت الاحوال را كاتبقا بنتو هاديك لي كان حاط الراس عليها و حاطة راسها عليه واخا مؤخرا بعدو على بعضياتهم .. كيفاش بغا روحو ما تتحرقش لموتها وهي كانت كي الشمس مضويا ليه حياتو ، ماساخيش بيها وعمرو غايسخا ولا غايشبع منها ، بقا على حالو هكاك ساعة كاملة تا حس براسو خوا مشاعرو وفرغهم كاملين فدوك الدموع لي فزكو ليها فراشها ، عاد ترحم عليها ودعا ليها بالمغفرة و ناض خارج يطل عليهم بعدما حس راسو انه قادر يصبرهم ويعطيهم الطاقة لي محتاجين ليها باش يصبرو تاهوما ، ما خاصش تتحكم فيه العاطفة فهاد الاوضاع..هو الأب و الظهر ديال هاد الأسرة كلهم محتاجين يحطو راسهم عليه فهاد الوقت و ياخدو منو الطاقة باش يكملو ، على داكشي خااص يصبر وما يبين لحد حرقتو على بنتو..حتى يختالي براسه عاد يحزن فخاطرو..

دخل للصالون لقاهم مجموعين و حتى يعقوب من بعد ما ساق خبار الموت ، جالس وسط عائلته حتى جاه الاتصال لي خلاه يخرج من الدار مدعوق بلاما يقول لبهية شي حاجة ، لي باقي ما فخبارها والو و في دار غفلون .. معنق بسمة عندو كاتبكي على صدرو وهو كايطبطب على ظهرها ، باينة في ملامحه انه حزين وما عندو خاطر ولكن حتى هو داير نفس الشي لي داير باه..مشا عندو عنقو عناق رجولي و عزاو بعضياتهم ، شاف الحاج علي في السعدية لي حاطة راسها على كتف عيشة و كتبكي في صمت..شحال قدها ما تغوت و شحال قدها تندب ، كيما كايقولو البكى مور الميت خسارة ، ولكن قلب الأم فهاد الحالات ما كايعرف لا المنطق لا العقل..الحاجة الوحيدة لي عارفها انه فقد فلذة كبدو ، انو واحد القطعة من قلبو مشاات..حاسة بحال شي يد كاتعصر فقلبها بالجهدد ، شحال ما حاولنا نوصفو ألم الفقدان وخصوصا من جهة الأم عمرنا ما غانكفيوه حقو ، صعييب على أي واحد واخا يكون قلبه حجر ، فاش تشوف بنادم مات ماكايهم لا علاقتك بيه ولا كاتبغيه ولا كاتكرهو ، الحزن كاياخذ حقو منك فكل الحالات..ماكاينش شي ألم ولا حريق فهاد الدنياا كايضاهي ألم الروح ، وأكثر حاجة كاتحرق الروح هي فقدان شي واحد عزيز على قلبك..وما يحس بهادشي غير لي مجرب..