💕💕 قصة الشرف 💕💕 بالدارجة المغربية

😊 الفصل 71 - النهاية 😊

#الشرف

🥀منك و إليك انتمي 🥀

‏‏"أستحق أن يحبني أحدهم بكل قلبه كأنني مُعجزة، وكأنني أكبر إنجازاته"....❤️✨️

✍️ soukaina soulaika

البارت 354

عينيها هنا ولهيه حاضية وليداتها قدامها .. خصوصا وتين لي ولات عاطية العين و جايبة الساس ولي شافها يفهى فيها .. فاتت بهية في الزين و الطولة و التجريدة .. كلشي بالتباتة و بالعبار تهز عين و تحط الأخرى .. مرة مرة تلعب بأطراف شعرها الأشقر لي واصل لاسفل خصرها .. عينيها سماء و صافية مرة مرة تهزهم بالعبار و ترجع تشوف قدامها .. إلى محركتيها ما تحرك .. گاع البسالة لي كانت فيها في الصغر تقلبات ليها تباتة و رزانة و متهزي من البنات غير هي ..

إلى غير نخوة جات حتى لعندها و تحدات .. اش منك يا حلاوة اللسان و حكمة العقل و اش منك يا تباتة ورزانة .. ختورية العويتقات گاع جمعاتها و هي في بداية تكونها و نشأتها .. تربية يعقوب و خلاص .. باها و حبيبها و تاج راسها لي تخسر خاطرها و ما تخسر خاطره .. السكرة ديال العائلة و المفششة ديالهم .. القفطان غير لبساته و غلى حتى قلال .. فرحانة بعرس طاطاها كوثر .. في حجرها خوها سلطان لي ولات عنده خمس سنوات ، يعقوب محطوط في تخنزيرته و حروفه الكحلين بهية في هذ الحمل غير تسخرات ..

الايام ضحكات ليها و عاشت شبابها من اول و جديد .. التربية و رباو معاها و الكبر و كبرو معاها .. المسؤولية مهزاتهاش لوحدها .. ما حدها تكبر و هي تصغار و تزيد تعطي للعين هي اليوم إمرأة في الثلاثينات و إلى شفتيها تحلفي عليها يالله قالت لعشرينات بسم الله .. هي و وتين كيبانو خوتات ماشي ام و بنتها و حتى العلاقة لي بيناتهم زويتة بزاف فات الأمومة و ولات صداقة و عشرة قوييية .. عشهم كله حب و حنان مكينش عندهم حس النزاعات أو دوك الثغرات بين الأبناء و الاباء .. المشاكل ضروري منهم هوما حلاوة الحياة بالحق ولادها ربي نعم عليها لي هز عليها مسؤوليتهم .. يديها بيديه في كلشي و في الصغيرة قبل الكبيرة ..

بارزة في طبلتها و عينيها مبسمين قبل شفايفها بختها و صاحبتها لي وأخير بعد سنين ها هي اليوم عروسة من بعد ما لقات الحب الحقيقي و حلات عينيها و عرفات لي فعلا كيبغيها .. فرحتها كبيرة و هي كتحس بيديه فوق يديها بتملك .. مرة مرة تبسم من وشوشاته في ودنيها .. فرحته لا تقل على فرحتها صبر عليها و مشى معاها دقة دقة حتى ولات كتبادلو نفس المشاعر و هاهي اليوم بارزة حداه في الحلال و بصيفتها مراته قدام الله ثم الناس .. عبدو لكوثر و كوثر لعبدو ...

وقفات من بلاصتها فحالها فحال باقي معروضين باش يودعو كوثر لي غدي تمشي لعش الزوجية رفقة راجلها و سندها من الآن فصاعدا .. وصال دموعدها محبسوش و هي كتبوس فيها و توصيها تحافظ على زواجها و دير عقلها .. وصال اليوم ام لثلاتة ديال الأبناء ولد و زوج بنات مشيبين مصعب لي كيحماااق عليهم و هوما مومو عينيه ..