🥰 قصة بيان نصر 🥰 بالدارجة المغربية

🥰 الفصل 39 🥰

🌹بيان النصر🌹 بقلمي انا 😍 شمس الغريب 😍

البارت 278

دخل عليها بحال الزلط غير شافتو بدات كتفكر فالمصيبة لي غادي يقول ليها اليوم كان انيق كما العادة لابس كول مونطي فالبني مع دجين وحذاء فالبني شعره كان مرجعو اللور ونظراته الثاقبة بدوك العوينات المرمشين عليها هي لي لابسة ديك الكسيوة جاتها كتهبل ما بقاتش فلي مارك والحالة الانسان يكون مظهره حسن بداكشي لي عطا الله يكون نقي لا هو ولا داكشي لي لابس شحال من واحد كتشوفو لابس العجب ولكن الى جلستي جنبه ريحة العرق تقلبك سيمانة وكاين لي كيلبس ملابس على قد الحال ولكن ما تكرهش يبقا جالس غير حداك بريحة النقاوة

عيسى بابتسامته المعهودة" صباااح النور لالة ريم

ريم بادلاته الابتسامة بزز منها واخا عيات تحبسها فلتات ليها" صباح الخير

عيسى" مزيان ا لالة ملي كتسمعي الهضرة

ريم ما حملاتش راسها علاش ولات جات بحال الى خايفة منه ولكن هي راهب صح خايفة منه" ماااااا جيتش على قبلك جيت على قبل راسي

عيسى" داكشي لي بغيت حتى انا غير تجي على قبل راسك واي حاجة ديريها ديريها على قبل راسك (شاف فيها ميل راسه) اجي انا ما نستاهلش تاخدي ليا شي صورة بتيليفون ديالك

ريم فينما كان شي دم وشي فصيلة دموية تجمعات فدوك الحناك السومر" ااا انا دبا انا راه بغيت باش نوري لبابا فين خدامة هو وخوتي باش يعرو بلي ما كنكدبش عليهم وبلي ماشي غادي نخدم فديور

عيسى بابتسامة عابثة" وريني ليهم حتى انا باش يزيدو يتاكدو

ريم مشات لمكتبها وهي مخنزرة فيه واخد راحته فطنيز" انا لي عارفة الموووديرين ماكايكونش عندهم الوقت فين يحكو ريوسهم

عيسى" انا عندي الوقت فين نحك راسي وراسك غير ارتاحي

ريم" وااااااش ما عندك مايدااار

عيسى" الصراحة عندييي غاااارق حتى الودنين ولكن اش ديري القلب ومايريد

ريم كيعجبها الحال ملي كتشوفو متشبت بيها هاكدا اكيد هي ماشي حمارة عارفة راسها ولات معجبة بيه وعلى حسب تصرفاته راه حتى هو ولكن الرق كبير وكبير بزااف عائلته فالعلالي كتغني يا ليل يا عين فالمقابل هي بنت عائلة على قد الحال هادشي لي كيخليها ضور فيه شحال من مرة واحتمال انه يكون غير مدوز بيه الوقت حتى هو كيجيها وارد فدماغها هما هاكاك حتى سمعو خطوات ديال حذاء عادي ومن وراه طالون كيقرقب وريحة انثوية صاخبة سبقات مولاتها كان الباب مفتوح بان واحد اليدور ومن وراه بان الهلال

ريحانة كتشوف ف عيسى" حبيبي جيت عندك قالو لي نتا هنا (قربات منه طبعات قبلتين على خده قراب من الم دياله)