🥰 قصة بيان نصر 🥰 بالدارجة المغربية

🥰 الفصل 40 🥰

🌹بيان النصر 🌹 بقلمي انا 😍 شمس الغريب 😍

البارت 287

القبيلة والدوار نايضة فدار التهامي كيقلبو بالفتيلة والقنديل على فاطمة لي كان الارض انشقت وبلعاتها البنت غبرات طارت ما سمات التهامي يضور يضور ويشد راسه ويجلس للارض اما رابحة تويل وتنير وتقول راه غير خرجات دبا تجي اما محمد كيضور عند جلايلهم ما فاهم والو ومرة مرة يمشي يقلب على فاطمة

التهامي شاد راسو وجالس قفازي ومرة مرة يضرب راسه" هااااا بقيتي تقولي ليا بناتك غادي يهربو ويجيبو ليك العار هاااااا لي جابو ليا العار هما بناتك ا لااالة سمعتي

رابحة مابغاتش دخل ليها لراسها بلي بنتها تكون هربات" بنتي ما هرباتش بزااااااف عليك انا بنتي تهرب (ولات بحال الحمقة) بنتي غادي تكون غير خرجات وتعطلات جنب الواد

التهامي" مشيت جنب الواد جوج خطرات وطلعت للغابة مرتين وبنتك والو باااااح واخا يكونو طيروها ايت باسم الله

رابحة" يطيروووك انت انشاء الله (هزات حايكها) انا نمشي نشوف عند مريم غادي تكون تما

خرجات كتعثر فجلايلها وتهز الحايك لي كل مرة طايح عليها ومحمد تابعها كل مرة دور تنهض فيه يرجع ولايني لي فراسو فراسو تبان ليه وقفات هزات عليه حجرة يدور بحال الى راجع غير دور وجهها تكمل طريقها يتبعها ثاني مافاهم والو وصلات لدار خوها لي قريبة شوية من الفيلاج جات فالهبطة ديال جبل دفعات الباب الكبير ودخلات للباحة لي فوسط الدار كتكون مامسقفاش وضايرين بجنابها البيوت والصالونات بان ليها الاخ ديالها اب منصور كيبان صارم لاقصى درجة الضحكة عمرها ترسمات على وجهه جالس كيشرب فحسوة الصباح وحداه السينية ديال اتاي والقهوة المعطرة فوق الطبلة كاين العسل وزيت العود والزبدة البلدية وتميرات والخبز سخون جالسين حداه اربعة جغولة منهم منصور اما البنات كلشي مزوج وحداه مراته لي اقل ما يقال عنها لفعة مقطرة بانت ليها مريم كتسربي عليهم ضعافت وزادت ذبالت بسبب الشقا وتمارة والعصا على ظهرها ولات بحال حمار الطاحونة لابسة بيجامة ديال المبرة فالقهوي لاوية عليها فوطة غليضة بسبب البرد لي حسك ليها الضلوع

رابحة حتى تسالي مع فاطمة وعاد تجي تشوف مريم لي بانت ليها ماشي حتى لهيه" السلام عليييكم

ام منصور خنزرات" صباح لله

رابحة بادلاتها التخنزيرة" عرفتو ديال الله مالو بغا يكون ديالك جيت نشوف بنتي

اب منصور مسح يديه فالفوطة" يااااااك ا رويييبحة ما عندك خووو فهاد الدار

رابحة" ما قلتش هاد الكلام جاوبت غير مرتك (شافت ف مريم) زيدي بغيت نقول ليك شي كلام

منصور هو لي مزوج خوتو حيت هو الكبير وهو قليل الصحة فيهم والفنيان ما يحني ما يدني غير يلقط فالخبارات ولكن جيبه ديما عامر منين الله عالم" عمتي جلسي تفطري عاد هضري معها