🥰 قصة بيان نصر 🥰 بالدارجة المغربية

🥰 الفصل 57 🥰

🌹 بيان النصر 🌹 بقلمي انا 😍 شمس الغريب 😍

البارت 429

حاتم خدا ليها داكشي لي بغات واتاجه للبرطمة دياله هو وياها طالعين بالناقرة فلاسانسور كما العادة محيحة عليه وهو اكثر منها

حاتم" غييير مااا قاال ليك راسك تنوضيها بيناتهم

فائزة" والله الى عزيزة عنده بحال بنته صاحبك لي ديما زربان ما تسنانيش نكمل وزايدون رييم تشرح ليه

حاتم ضربها لراسها بشوية" الله يجعلني نتيق وغييير بشوية عليك دبا توحل ليك

وصلو للبارطمة حل الباب دخلات هي الاولى رمات شكارتها فالدخلة وحيدات الطابلية دخلات لقلب الدار كلشي مرتب ومقاد وريحة الورد فايحة من الدار

فائزة جمعات حواجبها وكتجر ليموناض بلا باي" شفت الدار نقية همم كيفاااش

حاتم كيحيد جيلي دياله رماه فوق كرسي" الواليدة جابت دوك العيالات لي دات لدار عمي جمعو معاهم الدنيا

فائزة" داك الساعة قول ليهم يجمعو ليها شراوطها

حاتم هز سبابته عليها بتحذير" مااا بغيييت حتى واحد يسيق الخبار ا فاااائييزة حتى واحد

فائزة" صااافي صافي فهمت انا غادي نمشي نشوف هاد المصيبة

دخلات لبيت النعاس لي دارت فيه زبلتها اخر مرة فاش شخشخات ليه البيسي مشات للبلاكار ما لقات فيه حتى بياسة ديالها

فائزة بالغوات" فييين حوايج ديك المجدامة

حاتم من السيجور" فائزة غير بشوية مالكي ما كينينش فداك البيت راه حطاتهم فالبيت لي كنتي فيه نتي وهاجر

فائزة" كانت باغيا تقطع لينا رجل الله يقطع ليها جدر

ماعدباتهاش اصلا هي جلسات غير شي سيمانة شطايطها كانو مجموعين ولكن فائزة لي فيها مامهنيها ساست ديك الباليزة فوق الناموسية وجلسات تجمعها وتبقشش فداكشي كانو غير القليل من الملابس والباقي دي شوميز دو نوي جمع الالوان تما فائزة كتشدهم بالوحدة بالوحدة كتجر من الصدر كتقصمها بالنصف وتلوحهم فالباليزة حتى وصلات لوحدة كحلة فيها دونتيل مع قطعاتها سمعات صوت شي حاجة طاحت هبطات كتقلب حتى لقات كارط ميموار صغيرة فيها اثنين وثلاثين جيغا

فائزة غير هي وراسها" ديك الحرامية شنو تكون دايرة هنا بلاتي نكمل هادشي

بقات مكملة روينتها قاليها جمعيهم هي شوحاتهم سدات ديك الباليزة وخرجات كتقلب فالدوش لي فبيته ولي برا كتجمع لي برودوي ديالها خشاتهم ليها تما وهي كتخلط جافيل زادتو على شومبوان سانيكروا على ديميلور وهي غاديا عاد خرجات عنده

فائزة خرجات ليه من جنب" حاااتيييم شوووف شنو لقيت عند ديك المعوااقة خفتها لا تكون دايرة ليك شي فيديوات ولا تصاور