🥰 قصة بيان نصر 🥰 بالدارجة المغربية

🥰 الفصل الأول 🥰

🌹بيان النصر🌹 بقلم 😍شمس الغريب😍

البارت الاول

كان حتى كان في قديم الزمان حتى كان الحبق والسوسان في حجر النبي العدنان محمد عليه الصلاة والسلام حتى كان في قبيلة وسط الجبال ببلادنا الحبيب قبيلة لي مزال موصلها صهد وصداع المدينة فهاد القبيلة لي بنبها من تراب وحجر عايشين بالفلاحة ومكملين بالصبر لي فلح شي حاجة ياكلها ولا يبيعها و كاين لي سهل عليه الله ومشا المدينة يقرا ولا يخدم باش يعاون دارهم فهاد القبيلة يا سيادي كاينة دار بحال كل ديور القبيلة بنيها من تراب وحجر جبال لي دايرين بيها ماعندهومش وماخاصهومش دار صغيرة مكونة من ثلاثة البيوت كبار بيت الوالدين فيه ماريو بالخشب وناموسيا بالعود مبطنة بمانطات وزرابي قدام وفالقنت ديال البيت مانطات مطويين مزيان ولي جديدة راها فميكتها والبيت الثاني تا هو مفرش بفراش عادي وفيه طابيات محدورين ومانطات باين بلي كاينعسو فيه الوليدات اما البيت الثالث فحتى هو مفرش بزرابي وفيه مخيدات الظاهر كياكلو فيه ويستقبلو الناس والصالون لي جا فالقنت كبير ومضوي مفرش بزرابي فيهم الوان باهية تريح العين من صنع اليد ومخاد نقيين تاهما مزوقين بوريدات اما الكزينة ولا الكشينة فيها اواني من طين وكانون وفران كلشي كيخدم بالعواد قدام الفران جالسة امرأة اربعينية دات وجابت فالزمان مسمية بلالة رابحة والدة 5 دالولدات حيت على 12 عام تزوجات زواجها اللول خرجات منو بولد وبنت وطلقات والزواج الثاني 2بنات وولد من با التهامي لي ماتت مراتو لالة باهية وخلات لي 2بنيات كيف الوريدات الكبيرة سميتها بيان وكيف كنقولو سمية جزء من الشخصية وبيان غزالة وهدرتها موزونة والبنت تقيلة ماشي خفيفة فعمرها 17 عام وختها الصغيرة فائزة فعرها 15 سنة زيييينة بحال ختها (الوصف فالاجزاء جاية) اما خوتهم من باهم كاينة مريم 12 سنة وفاطمة 10سنين وعاد اخر المصران سيدي محمد 5د سنين

🌹بيان النصر 🌹 بقلم 😍شمس الغريب 😍

البارت الثاني

قدام الكانون جالسة بيان رادة الطاجين من بعد ما عجنات من وراء صلاة الفجر ونقصات الخميرة باش يلاه تجي معاه تعادل ووجدات الفطور وحلبات البقرة والماعز قبل ما يخرجو للسرحة ورجعات فيقات ختها تفطر وتجمع موضعها فاقت بنقير كيف ديما علاش هي لي ديما تخرج للسرحة واش غير هيا لي كاينة ومريم وفاطمة كيف ديما يبقاو يتكسلو بلاصتهم بلعاني باش يفقصوها حيت هما ما يحنيو ما يدنيو ولكن كايشطحو ويغنيو الفم ماضي والدراع كاضي مريم جلسات من القراية بحال خواتاتها كيقراو حد الابتدائي صافي وفاطمة هاد العام تجلس حتا هيا ايوة و سيدي محمد مازال ما هاز هم ولا حمل ايوة وامهم كل مرة لاقية ليهم السبة باش مايعاونو فالشقا الحصول الكلام كثير ومع القصة تزيدو تستلغاو فائزة وبيان وباهم ومرت باهم فطرو بزيت العود وزيت اركان والزبدة البلدية وحليب الماعز لي فيضاتو بيان وكل تيسر لشغالو فائزة زادت بالبهايم للسرحة وباها تابعها للارض ديالو يفلحها بقشابة بالية كحلة محزمها برزة وفوق راسو طاقية متبتها برزة وفوق كتافو جلابتو داير عليها العتلة و جار الحمار باش يحيد الربيع يجيبو للبهايم ملي يكون راجع تفارق هو وبنتو فطريق الواد هي كتكمل ليه تسرح فجنابو حيت فيهم الربيع وهو كيقصد ارضوا ما بيان فكتجمع البيت لي كيجلسو فيه وتقصد الكشينة وتكمل شقاها حيت مرت باها كدير السبة بطي الفراش وهي كتمشي تكمل النعاس كيفها كيبناتها بيان ما كاتديها فيها كتغسل الماعن وطرف فطور خوتها حتى يفيقو ليه وتمشي الكوري والزريبة تنكس لبهيمات وتعطي للدجاج ماكلتو وتجمع البيض وترجع تاني للكشينة تحمي الكانون والفران تنصب الغداء وتخبز الا شي مرات ايلا فاقت رابحة وهداها الله هي لي كتخبز بحال اليوم واخة كتسمم بيان بالهضرة مسكينة كتكمدها وتسكت كاتراعي لباها