🥰 قصة بيان نصر 🥰 بالدارجة المغربية

🥰 الفصل 30 🥰

🌹بيان النصر 🌹 بقلمي انا 😍شمس الغريب😍

البارت 203

جوج ديال البيوت كيوجدو لحفل زفاف الفرق هو انه واحد قريب والاخر بعيد بالنسبة للناس لي كان قريب ليهم الزفاف الامر كيتعلق برحيمة لي واقفة على قدم وساق تشقى هنا وهنا وتعيط تسول بناتها لي حتى وحدة ماغادي تحضر لا نادية ولا نسرين مكملين معاها غير بالتيليفون وغير نادية ماشي نسرين حيت هاد الاخيرة عارفة هادشي ما هواش

رحيمة" اااا نادية ا بنتي وا ختك قالت ليا ما نديش الذهب واش هادي حمقة ضاروري شي حاجة ديال الذهب

نادية" ضروري تكبري بيها ا ماما هاديك راه بانت ليا كتوحم وماعايقاش

رحيمة" وااا ملي قلتها لخوك قاليك هو غادي يتكلف

نادية" ايوة خليه منو ليها ا ختي لا تبغي تاخد راسها شي حاجة على ذوقها

رحيمة" اييييوة ا ختي منهم لشغلهم انا ما صوقيش

نادية بقات مع امها راكم عارفين البنت لي كتكون مزوجة كتبقى مع امها اش غادي تلبسي لبسي هاد الفولار هاد القفطان مع هاد الصباط المهم وصوري صيفطي ليا نشوف كوني مزيانة لبسي قادي ديري بوكري وهي غادا بقات معاها حتى ختارت اش تلبس واش تدي وشنو دير بيضي ليها ملي تحني قطعات معاها وعيطات على حاتم

رحيمة كتهضر بالغوات" حااااتيييم وااا ختك قالت ليا نكبرو بيها نديو ليها الذهب ونتا عكستي

حاتم" الوااالييدة انااا مامساليش لهاد التخربيق زايدون السيدة باغا غير نكملو المراسيم

رحيمة" انا كاع ما فهمت هاد الزواج كيف داير لا خواتم لا خطبة كبيرة لا والو اش هاد الزواج احااااي

حاتم" لواااليدة انا مامساليش لهاد الروينة كاملة غادي نديرو العقد وسالينا ملي تجي الى بغات الذهب ولا الفضة نديروه ليها

قطع هو وخلاها غادي تاكل حوايجها كتمشي وتجي بحال الزواق من هنا ومن لهيه وسي محمد غير حاضيها دارت ليه الدوخة حتى دخلات فائزة جات سلمات عليهم كما العادة وجلسات جنب سي محمد بانت ليها خالتها غادي تنفاجر بقات كتشوف حتى عيات وجلسات كتسول راجل خالتها بعينيها زعما مالها

فائزة تكلمات بخفوت" عمي محمد مااالها خالتي

سي محمد" محيحة علينا على هاد العقد ديال حاتم اليوم هو مامسوقش وهي منوضة لينا الصداع

رحيمة عاد نتابهات ل فائزة لي جالسة كتشوف فيها بدوك العوينات بحال المشة عاد بانت ليها فالبلان حتى هي جات قاصداها حتى خلعاتها كانت مركزة معاها حتى بانت ليها قريبة ليها

رحيمة" نوضي نتي خاصنا نمشيو نشوفو ليك شي قفطان ولا تكشيطة ليك ولهاجر غير كريو حتى لمن بعد وفصلو شي حاجة مزيانة المهم عديو فهاد العقد هاد الزواج بالساكوتي ما فهمت فيه والو