မျိုးကွဲများနှင့်ယှဥ်တွဲနေထိုင်ခြင်း

Chapter 112
Imperial MeowAugust 06, 2023
Chapter 112

မိစ္ဆာကိုစားခြင်း

ဆိုဖာပေါ်တွင် လှဲနေသည့်ယုန်ကလေးက ဖုန်းထဲမှ Jewel of Atlantisဂိမ်း ကစားနေသည်။ သို့ရာတွင် သူ၏ တက်တက်ကြွကြွမရှိလှသော အမြီးလေးကြောင့် သူ ယခုအချိန်တွင် စိတ်ပါလက်ပါဖြစ်မနေကြောင်း သိနိုင်လေသည်။ သို့သော်လည်း သူက ကျွမ်းချင် ညနေစာပြင်ဆင်ပြီးချိန်အထိ တစ်‌ညနေခင်းလုံး ခေါင်းမာမာဖြင့် ဂိမ်းများ ကစားနေခဲ့သည်။

စားစရာရနံ့ရသည့်အခါ ဖူလီက နားရွက်များကို ခါလိုက်ပြီး ဖုန်းကို ဘေးနားချကာ ဆိုဖာပေါ်မှ ခုန်ဆင်းသွားသည်။

ဖူလီက ခုံတွင် နာခံစွာထိုင်လိုက်ပြီး ပန်းကန်လုံးနှင့် တူများကို သေချာစီနေသည်ကို ကျွမ်းချင်တွေ့လိုက်သည်။

သူ ခုနတုန်းက စိတ်မကြည်ဘူးမလား... ဘာလို့ ထမင်းစားချိန်ရောက်မှ တက်တက်ကြွကြွဖြစ်သွားတာလဲ...

ကျွမ်းချင် စိတ်ဆိုးမာန်ဆိုးဖြင့် တွေးလိုက်မိသည်။ သူက ဖူလီ မမြင်အောင် မီးဖိုချောင်ထဲတွင် စိတ်ဓာတ်ကျနေသူကို ပြန်လည်စိတ်ကြည်လင်လာအောင် ပြုလုပ်ပေးသည့် အစားအစာများကို ဖုန်းဖြင့် တိတ်ဆိတ်စွာ ရှာဖွေနေခဲ့မိသည်ကို ပြန်တွေးမိသောအခါ သူ့ဦးနှောက်ကိုလည်း ဖူလီ၏ တုံးအမှုဖြင့် ကူးစက်ခံလိုက်ရသည်ဟု တွေးလိုက်မိသည်။

ချိုတာတွေ စပ်တာတွေတဲ့... စိတ်ညစ်နေရင် အဲ့လိုရွေးစားရမှာမဟုတ်ဘဲ ဗိုက်ပေါက်ထွက်တဲ့အထိ စားခိုင်းတာမျိုးပဲ မဟုတ်ဘူးလား...

ဖူလီက ခုံပေါ်တွင် အချိန်အတန်ကြာသည်အထိ ထိုင်နေခဲ့သည်။ ကျွမ်းချင်က သူ့ကိုစိုက်ကြည့်နေသည်ကို မြင်သည့်အခါ သူ သိချင်စိတ်ဖြင့် မေးလိုက်သည်။

" ညစာပြင်လို့ မပြီးသေးတာလား..."

" ပြီးသွားပါပြီ..."

ကျွမ်းချင်က သူ့ကို အနည်းငယ်ခန့် ဆူပူလိုသော်လည်း သူ့နှုတ်မှ ထွက်လာသည့် စကားလုံးများမှာ " တချို့ဟင်းပွဲတွေကစပ်တယ် မင်း စားနိုင်ရဲ့လား " ဖြစ်နေခဲ့သည်