أحببت شخصا لا يعرفني🇩🇿

حلقة 5

هديك الدقيقة تشوكيت و مرضت بكيت بكيت بكيت حتى طحت ، و شيرات وقفو معايا ، و بلوكيته من كلشي ووكلت ربي عليه ، دخلت في اكتئاب حاد ملي صرالي، و لي غاضتني لي وقفت ضد لافامي تاعي علاجاله و خسرت صحاباتي لي كانو يحذرو فيا منه و انا كنت معمية ، فات نهار اول، زاوج ،سيمانة ، بديت نتقبل شوية و نوالف ، كنت قاعدة ديك ليلة مع شيرات و نتفرج في غيل لي ف انستاغرام'' reel''
حتى خرجلي فيديو تاع راجل و نفسه لي كنت نشوفه في منامي؟ وااش!!!، كون نقولكم شحال تشوكيت ، مافهمتش كيفاه نفسه! لي كنت نشوفه مين نبغي نتخيل البطل تاع كاش قصة، شحال من واحد غادي تجيه بيزاغ علابالي مي والله يلا جاتني وحدة صدمة ، دخلت كونت تاعو شفت صبت عنده بزاف ليزابوني ، مشهور ، ساكن في فرنسا مي أصله نصف إيطالي و نصف جزائري ، طويل ، أسمر و عينيه خضرين ، شفت الإسم صبت إسمه سفيان ، و مين كنت نشوف جات دخلت عمتي تعيطلي باش نخرج نشري خبز أيا خرجت من الإنستاغرام و قتلها صحا ، لبست جلابة خفيفة و فولار و خرجت رحت نشري
( سبحان الله دروك دخلت انستاغرام خرجلي واحد نفس مواصفات و اسمه سفيان ، انا صاي بديت نتوسوس ل روحي😂😂)
مامبا خمس دقايق و رجعت مديتلها و بدينا نحطو في الفطور ، فطرنا نورمال مع الجماعة ، و كملنا و ناضت بنت عمتي تغسل ماعين ، مور لي كملت ، جات جمعت معانا حبيت نحكيلها مي قلت لا واش راني ندير أيا سكتت و فوتها محبيتش نحكي باسكو ڨاع و نقولهم يقولو واش راهي تشكل هادي و علابالي مكانش لي تأمني ، المهم فاتت ليام و جا نهار لي نرجع للدار مور ما كملت تفوات و الطبيب ، نضت داك نهار و و جدت روحي حتى هوما وجدو رواحهم باسكو يروحو معايا ، هوما عند جدي و انا دارنا باسكو في نفس ولاية، مور ما وجدنا صوالحنا ، هودنا و ركبنا في اللوطو تاع عمتي هي تسوق ، و قلعنا، وصلنا مع العشية دخلنا للدار جدي و تعرفو دوك الأجواء كي تفوت شابة منبعد جا بابا و داني للدار
منبعد جا بابا و داني للدار
، الصراحة نساو ديك الضربة تاع لي فاقولي و مجبدوليش عليها ، العكس ماما ولات تزعق عليا لي كنت مع واحد خانز كيما هاداك ، و ماما بديت نداصرها عرفت عقليتها تاع بصح، و فهمتني قاتلي انا زعفت منك مين مخبرتينيش و دسيتي عليا و مبغيتش حتى يجو يقولولي بنتك واش راهي دايرا ، المهم ولات قريبة ليا اي حاجة تخبرني و متفتحة ، و بدات تقولي و توصيني منديرش كونفيونس في رجال و قاتلي جامي تبغي راجل خليه هو يبغيك ، المهم جا وحد نهار كنت مجمعة معاها قاتلي نتي علاه متجيبيش واحد بدراهمو ، ضحكت و قتلها واه نجيبه و عينيه خضرين و ساكن في فرنسا ، قاتلي أيا مالا جيبيه و وريلي شطارتك ، قتلها كيفاش هادي نطير، قاتلي نتي ديري سلاحك في يديك و كلشي ساهل ، قتلها مافهمتش ، قاتلي خدمتك هي سلاحك مباقيش بزاف على الباك و ديه و فرحيني و كلشي يجيك يجري سوغتو يلا كنتي ناجحة، انا الصراحة كيما قتلكم نعرف نقرا الحمد الله و تخصص تاعي لي دايرته لغات ، و من صغري نتعلمهم ، نعرف نحكي شحال من لغة، و عندي محتوى ، و ماما مكنتش من الرافضين باش نوري روحي في المواقع ، بالعكس هي لي دعمتني ، نطلع تصاوريري لي فيديو ، مي مشي رقص و لا، محتوى مفيد ، المهم انا بديت نخمم في هدرة ماما ، قلت انا لازم ننجح باي طريقة و نكمل قرايتي في فرنسا، باسكو هي بلاد لي فيها مستقبل ، سوغتو الخدمة لي راني حابة نديرها ، بديت نقرا و نخدم على روحي ، و في نفس الوقت نطور في روحي في اللغات و نخدم على المحتوى لي حبيت نديره مي كنت مزال مبنتش وطلعت وجهي نيشان ، و كنت دايمن نتبع اخبار تاع كيفاش نكمل قرايتي في فرنسا و لا كاش بلاد و منبعد شحال من وكالات سياحية ، المهم ديك ليام مقعدتش كامل
_____😙💗