ملاحظة: كنت حاسبة طلعت هاد الحلقة ، هادا وين راني نشوف بلي حابسة ف 52 مشي 53🥲💔
________________
Pov Anaghim:
حكمني من شعري حسيتو طار من بلاصتو ، منكذبش و نقول ما خفتش ، خفت لوحد الدرجة سوغتو مين كان يعيط ، عندي ذكريات تخليني نهبل كون غير نتفكرهم بصح راني حاسة راني نعيش فيهم دروك ، نكره واحد يعيط عليا نموت ، يدير أي حاجة بصح ميعيطش ، دمرني على السرير و جبد السبتة ، قتلو والله تتلمسني نشكي بيك راك تسمع والله يا الرخيص يلا شكيت ، أنا فمي هو لي دايرها بيا في وقت الشدة يولي يخسر. مع الناس باش ننضرب، قالي انا رخيص! ، هزيت راصي لالا مين بدا يقربلي ، رحت طلعت للسرير في القنت ڨاع باش ميوصليش زعما ، طلع هوا و كركني من شعري جبدني عندو قالي قتلك ماتديريش ماكياج ولالا ، هزيت راصي خايفة ، عيط قالي عندك فم اهدري يا مشركة الفم ، قتلو ايه ، جا بايهدر قتلو ااااي منيش مشركة الفم أنا ،هداوين استوعبت كيفاه هادي تقول. مدلي صفعة عينيا دارو شديت خدي بيدي ، دمعة طاحتلي، طرطڨت بالبكا قدامو و بديت نرجف ، لي خفت منها طحت فيها ، مين نتنارفا / و مين نخاف و نتفكر وحد الصوالح ندخل في هادي الهستيريا، بعدت عليه و انا نرجف ڨاع من يديا لكرعيا و نبكي ، مشي نبكي نتوغ حكمت شعري نشد فيه و نبعد عليه وليت نشوف فيه غير يضرب فياا بصح هو مخلوع ، أحلام دڨدڨت الباب تحاول فيه باش يحل ، جا عندي حكمني و عنڨني زير عليا و أنا غير نبعد فيه منيش حاملة روحي ڨاع ، سمعت الباب ينتحل بالمفتاح عرفتها أحلام عندها مفتاح زيادة ، دخلت صابتني نرجف و نشد في شعري و هو معنڨني يسكت فيا ، سمعتو يقولي صاي اسكتي مكان والو والله مانزيد نقربلك ، بقى غير يكالمي فيا حتى سكت حطيت راصي عليه و انا مغمضة عينيا و دموعي يطيحو ، نكره روحي مين نوصل لهاد الحالة و نكره لي يوصلني لهاد الحالة باسكو مكانش لي يقدر يسكتني و يكالميني ڨاع يبعدو عليا و يديرو رواحهم مخلوعين ، كون ماجاش عنڨني والله مانسمحله دنيا و آخرة و نقولو يطلقني نعل بو الحب لي يدير هكا ، مي هكا و كالماني حتى رقدت ، حمدت ربي غير أميرة ماشي هنا في الحضانة ، حسيت بيه رفدني و حطني في بلاصتي و أنا راقدة و نايضة في نفس الوقت ، سمعت أحلام تحكي معاه و تلوم فيه ، قاتلو علاه ديرلها هكا يا ولدي غولاصيون تاعكم تزيد تخسر هكاك تفاهم معاها بالكالم بشي كلشي ديره بالخشونية ، من سكاته عرفت حاط راصه ، حسيت يد تمسح على شعري قلت هادا هوا بصح كي هدرت أحلام عند راصي عرفتها هيا ، سمعت الباب تبلع هوا راح ، حليت عينيا صبتها تشوف فيا و غايضتها ، مين شافتني حليت عينيا تبسمت معايا ، نضت عاونتني باش نوض ، حطيت راصي على الحيط ، قاتلي واش قلتلك نتي تاني صباح، قلتلها هوا الغالط مشي أنا، قاتلي علابالي بصح قتلك عرفي كيفاش تكسبيه بالمساعفة و الحنانة مشي العكس، قتلها هوا يتحكم فيا لي يشوفوه يحسبو بصح يبغيني و يغير عليا، قاتلي ايه و بالاك يغير عليك و نتي مخشنة راصك، قتلها كيفاه هادي يبغيني و راه غير شهرين ملي عرفني؟، قاتلي الحب مشي بالمدة قادر من النظرة لولة يعشقك، قتلها نأمن بكلشي حتى بهادي بصح مع سفيان ما تصراش يبغيها و يموت عليها أنا مايشوفش فيا كامل ، هزت راسها ب لالا ، قاتلي نهار لي تڨلعي هاد الفكرة من راسك و تدخلي بلي يولي يبغيك و تقدري تكسبيه تتحقق، تنهدت من قلبي نفكر في هدرتها، قتلها واش ندير انصحيني!، شدتلي يديا قاتلي خلي دروك كلشي على ربي كيما جات جات ، بصح الفم الحار هادا شوفي كيديريله و متعانديهش و تقولي لالا باسكو راكي تعرفي نورمالمو مين يتنارفا كي يولي ، هزيتلها راصي ، قاتلي نوضي ارواحي تاكلي ، قتلها لالا هوا راه هنا منيش باغية نشوف فيه، قاتلي لالا راح يجيب أميرة و راني هدرت معاه أصلا راه نادم قالي محسيتش بروحي مين درتلها هكا انا زدت فيها ، قتلها صحا ، ناضت هيا و نضت موراها حطتلي ناكل قتلها اقعدي معايا قاتلي لالا كولي نتي عندي شغل مين نكمل نجي عندك قتلها صحا و رحت شعلت تلفزيون و ناكل في السباڨيتي ، نص ساعة سمعت الباب انتحل دخل هوا و دخلت أميرة تجري هوا كان رافد صاكودو تاعها على ظهره بغا يهدر معايا بصح أنا رحت فتته و رحت عند أميرة لي جات تجري عندي ، مين مديتهاش فيه راح للشومبرة و بلع ، عنڨتها و بديت نبوس فيها، يا عمري شحال توحشتك قاتلي حتى أنا توحشتك عملي، قتلها واش قتلك على هاد الكلمة وينتا تسڨميها قاتلي غير كيفكيف ، رحت وين ما كنت طفيت تلفزيون و قعدتها حدايا و بديت نڨلعلها في صباطها و نحللها في شعرها و انا نهدر معاها ، قتلها ايييه احكيلي واش درتو اليوم ، حسيتها فرحت مين قتلها هكا باغية إهتمام على أتفه الحاجات، و من حقها، بدات تحكيلي و هيا مركزة معايا قاتلي أنس لي قتلك عليك تعرفيه!!، قتلها باينة نعقل عليه واش دارلك ، قاتلي يقولي نتي ماشي شابة و ضربني ، قتلها شاوالا؟؟؟ يضربك؟؟ ، من وينتا يضربك؟ ، قاتلي دايمن و كل خطرة ،قتلها صحا غدوة نقتلو، قاتلي صح!! قتلها ايه، قاتلي تجي معايا ؟ نسقسيك؟ قتلها سقسيني إيه، قاتلي مين تجي قوليلهم أنا ماماها تقدري ؟، دورتها عندي قتلها باينة لي راكي باغيتها نديرها لك ، قاتلي يقولولي معندكش ماماك انا نقولهم راهي في السما غادي تجي كاش نهار و جيتي نتي سما نتي ماما ، سكتت غاضتني بزاف ، سمعت لافوا تاع أحلام مين جات قعدت حدانا قاتلها ، ايه نتي يلا راكي حابة تكون ماماك غادي تفرح و ديجا هيا قاتلي راني حابة نولي ماماها، قاتلي صح !! ، قتلها وي ، الضحكة ترسمت من القنت للقنت عنڨتني و قاتلي مالا نقولك ماما مشي آنآ ....
في الجامعة وين ما. ڨاع الطلاب لي يمشي لي مجمع مع صاحبو و لي مع صحبتها ، كانت آنآ في لاصال وقفت مور ما كملو الحصة بدات ترفد في صوالحها و كتابها بين ذراعها و باينة تخمم في حاجة ، نهار كومبلي و هي تخمم في سفيان لي مامبا مجاش قالها سمحيلي ،. ايه شحال من خطرة يبغي يجي يهدر معاها تروح تفوته و تتجاهله ، ماهيش فاهمة روحها كامل ،
**آنا:** *(بصوت داخلي، تفكر وهي تمشي)* لازم نروح للدار بلخف باش نحضر لعشية اليوم. سفيان... كيفاش راح نواجهه مور لي صرا بففف ، بصح مزيا مايجيش اليوم مانيش قادرة نشوف فيه
بدات تقرب من باب تاع الجامعة لمحت لوطو كحلة في وسط الطريق ، مداتهاش بصح شوية و بدات تسقسي في روحها علاه في وسط الطريق !
**آنا:** *(تهدر مع روحها بشوية )* هاذ لوطو.. ما شفتهاش من قبل هنا هاذا الحمار كيفاه يحبسها هكا
بدات تقرب منها باسكو في طريقها بصح شافت شحال من راجل واقف حدا لوطو ، ندمت على الدقيقة لي فاتت من د الطريق من الخوف باسكو النظرة كيراهم يشوفو فيها أنورمال ، ثانية ، زوج، خرجلها أحمد من مور لوطو ، قلبت عينيها شا جا يدير دروك هادا
**أحمد:** *(بابتسامة باردة)* صباح الخير ، آنا معنديش موعد في الجامعة اليوم، بصح قلت نجي نطل على مرتي
**آنا:** *(حبست في بلاصتها، بعدت عليه شوية و بدات تهدر معاه و هي متوترة ماعلابالهاش علاه خافت منو )* أحمد؟ واش راك تدير هنا؟ أنا... أنا عندي ، مازال، عندي ، قراية راني راجعة
جات راجعة قربلها بلخف
**أحمد:** *(بوحد الهدوء يخوف وهو يقرب منها)* آنا، وين تحبي تروحي؟ لازم نقضيو شوية وقت مع بعضانا اليوم
هيا هنا صاي قلبها بغا يخرج من بلاصتو دارت باش تروح قبل ما تدور جاو زوج رجال حكموها واحد شدها. من ذراعها و دارلوها قماش في فمها باش ماتعيطش
بغات تعيط بصح مقدرتش عليهم ، لافوا تاعها مبغاتش تخرج ، عينيها محلولين على وسعهم من الخوف ، بدات تهدر معا روحها شاكاين ، لازم نروح ، واش خاصو هادا
رفدوها في زوج و هي تعافر فيهم داروها في لوطو حزموها باش ماهربش و بلعو عليها
دخل أحمد للوطو حداها يشوف فيها مربوطة حداه و تشوف فيه بنظرة كره: آنآ متتقلقيش طريق راها طويلة و مزال كاين بزاف يقارعلك ، مرتي
بدات لولطو تمشي بوحد السرعة تحسب يحاوزو فيها و هي ميتة بالخوف كل ما تشوف أحمد ووجهه البارد تزيد تخاف مشي طبايعو هكا ، و ماشي مداري يديرها هاد الشي عيات. كي تخمم كيفاش تدير باش تهرب تفكرت سفيان بدات تدعي غير تجي في بالو هاد الدقيقة ، سفيان وين راك حمبوك لازم دير حاجة
أنت تقرأ
أحببت شخصا لا يعرفني🇩🇿
Romansa❌❌ لا أسمح بنقل حرف من روايتي و إلا سأتصرف بطريقة قانونية رواية ، الجزء الأول(الحلقات الاولى) حقيقي من بنت أمريكية صديقتي ✅ و الجزء الثاني من تطويري أناغيم و سفيان، قصة بنت تحب واحد ، هو مايعرفهاش، راح يبادلها الشعور؟ ، هل يوجد لقاء بيناتهم؟، كيف...
