أحببت شخصا لا يعرفني🇩🇿

الحلقة 48

الحلقة عبارة عن الفيديو لي راني حاطاته , معلاباليش علاه ضحكني هاد البارت

_______________________________________نضت صباح على ضو الشمس حليت عينيا بالسيف بسباب راصي لي صبح ضارني ، بسباب البكا تاع البارح ، دورت راصي نشوف يلا راه مزال راقد صبت البلاصة خاوية مزيا مراهش هنا باسكو منيش حابة نشوف وجهو مع صباح ربي ، سمعت الما في الدوش عرفته يدوش ، طيحة نشالله، نضت من بلاصتي حتى سمعت الباب انتحل ، خرج منه داير سربيتة حاسب روحه في مسلسل مسكين، با يغريني ، كون نصيب نخبطو خبطة نعوقو ، شاف فيا ، شفت فيه انا تاني و قلبت عينيا عليه جبدت واش نلبس باش ندوش و جبت داخلة سمعته قالي صباح الخير ، رديت عليه تحت نيفي صباح الشر دخلت و خبطت الباب و بلعتو بالمفتاح خفت يلحقني ، دوشت و لبست مين كملت خرجت مصبتوش ، رحت جبدت سيشوار باش نشف شعري قعدت و بديت نشف فيه بصح غبني بزاف مين طويل ، انتحل الباب و دخل هو جايب معاه الماكلة في الشاريو يجر فيه ، تاع لوتال باينة ، صابني متعافرة مع شعري هبلني ، جا قدم عندي و دالي سيشوار باش ينشفلي شعري بعدتلو يدو قتلو نعرف صحيت مداهاش فيا و خزر فياا خزرة سكتت، دورت راصي للمرايا مستسلمة و بدا ينشفلي فيه، ربع ساعة و كملي كامل داك الوقت و انا غير نشوف فيه من المرايا  حابة نقتلو و هو نورمال يشوف فيا عادي كلي مادار والو مامبا ماقليش سمحيلي ، حط السيشوار و قالي نوضي تاكلي باش نروحو ، نضت و رحت قعدت جا قعد حدايا ياكل ، شفت فيه صبتو لاهي في الماكلة ، علابالي يدير فيها بلعاني باش ينارفيني نعرف هاد الطبايع يدير روحه معلابالو ب والو ، بقيت نشوف فيه و حابة نضربوو عينيا ولاو يحكو كلشي ، ديجا انا في الوجه نبين ردة فعلي و نهدر الهدرة تاني فالوجه مانحوسش يلا يزعف داك البنيادم ولا لا ، الله غالب هادي طبيعة فيا، طلع راصه يشوف فيا صابني نخوص فيه ، هزلي راسه شاه؟؟؟ ، طلعت كتافي والو ، و كملت ناكل ، دور وجهه يستغفر ، استغفر ولا اقعد ، قلتها في قلبي بصح معرفتش كيفاش سمعها والله ما كنت نقصدها ، قالي تبلعي فمك ولا لا ، قتلو علاه كاش ما قلت !، بلڨ عينيه يخوف فيا زعما ، مديتهاش فيه و بديت ناكل ، خليه يموت، كملت و نضت نغسل سناني زاد لحقني هو تاني يغسل في سنانو ، هدرت بالدزيرية باش مايفهمنيش، هادا وين ما نروح يلحقني لصقة هنا شوو كيداير شووف ، لا زين لا لاطاي ، لا عقلية مسڨمة ، بديت نهدر و نشوف فيه في المرايا و هو يشوف فيا ،معرفتش علاه يشوف فيا يديك الطريقة حسيته عرف نعاير فيه ، بقيت غير نهدر وحدي منبعد قلت بصح نقولك الحق شباب واه بصح طحت من عيني البارح مشي كيما هكا غير لي حمار و لي مشي راجل لي يدير هكا كنت دايراتك مسڨم و خاطيك بصح خرجتلي خرجة تاع كلاب ، انا نهدر و نغسل في سناني طلعت راصي صبتو داير يديه عند صدرو يشوف فيا بايقتلني صاي ، درت عنده قتلو مالك تشوف فيا باتخوفني؟ مافهمتش علاه انا نبغي.. مين بغيت نكملها قالي نفهم الدزيرية و على هادي مشي راجل لي راكي تعاودي فيها منبعد و نعرف شاندير ، حليت عينيا مشوكية ، قتلو تفهم؟؟؟ سما كنت تفهمني مين كنت نهدر نعاير فيك؟؟, اااا كنت غادي نقولو علاه نبغي واحد كيما نتا ، كنت نكشف روحي ، قتلو بصح الصح نتا غالط انا مادرت والو قالي ياك؟؟ قتلو وي و تقولي سمحيلي دروك ، قالي اوو!! هزيتله راصي وي بوحد الثقة ، دمرني بيديه و راح يغسل في سنانو ،يتجاهلني؟؟ ،  كورت يديا و عطيته بونية للظهر و هربت نجري حط ڨاع شا كان في يديه و جا لحقني طلعت فوق الناموسية نقز طلع هو تاني بايحكمني نزلت منها نجري خزنت مور ليزار ، زعما ما شافنيش طلع ليزار بايڨضبني عضيتله يديه قتلو والله تتلمسني نقتلك ، آنآآآآآآآآ تجي ولالالااااااا ، قتلو مانجيش هبل يلا باتهبل رحت نجري للدوش مين جيت باش نبلع دخل حكمني طلعني فوق كتافو ، عضيتله ضهره و قبشتو ب ضفاري قاسني فوق السرير مخلوع قتلو ، حذرتك نتا حاسبني نزعق و تقولي سمحيلي دروكككك، بعد عليا و قالي متوحشة قتلو نتا متوحش ياا لي، هنا سكتت صاي زدت فيها علابالي ، قالي شوفي في يديك خمس دقائق منصيبكش واجدة نروح و نخليك ، راح يلبس و نضت انا نوجد في روحي ، نص ساعة و انا نلبس منبعد ڨغدت ندير في ماكياجي وحد الربع ساعة مين كملت صبتو قاعد يشوف في ساعة و يشوف فيا ، قتلو صاي كملت لبست؟؟، طلعلي حاجبو شاولا؟؟؟ كملت؟؟؟ ، دار وجهو بين يديه و ناض قالي الله يخليك هيا سمحيلي يا بنت الناس سمحيلي المهم هيا نروحو ، قوست حواجبي مشي فاهمة علاه شادرت انا؟!٫ راني غالطة؟؟، طلعت كتافي و نضت قتلو هيا انا راني واجدة كنت نقارعلك نتا طولت بزاف ، جا قدم عندي قالي انا؟؟؟ انا طولت ؟؟ حسيته بايبكي مالغري مادرتله والو علاه يزيدو فيها الرجال!!.....
________________
بنات راهي غالطة آنآ؟؟؟ ، ياك هيا مدارت والو خاطيها