أحببت شخصا لا يعرفني🇩🇿

الحلقة 13

هاي بناتي واش راكم ، قررت نديرلكم هاد البارت راني كتبتو درك ، حرام عليا منديرلكمش بارت، تستاهلو، المهم هادي باش تدعولي الباك باقيله 24 ساعة 💔🥺، نشاله ندي معدل نفرح والديا، المهم استمتعوو 😽
____________________________________
نضت صباح مخلوعة اليوم راني روطار محسيتش كامل بالوقت و لا مين صوتا تلفون، رفدت تلفوني صبت شحال من ابل من عند سارة و مروة ، يكونو تقلقو عليا ، نضت نجري غسلت وجهي لبست حاجة سامبل و شوية مايكاب ، رفدت معايا الماكلة، ناكل برا و صاي، و خرجت مور ما بلعت الباب ، هودت ف درج نجري قريب نطيح تقول راهم يحاوزو فيا ، وليت ندعي نصيب الbus، و نيشان مصبتوش ، قلت نروح في طاكسي و صاي، حبست طاكسي و قتله البلاصة قالي اوكي ، عشر دقائق و وصلت ، مالغري ضيعت حصة مي المهم وصلت ، دخلت صبت هداك وين بدات حصة اخرة، كانت باينة عليا كنت نجري ، شافت فيا استاذة انا قلت صاي راح تبهدلني ، حبست في بلاصتي هي تشوف و انا نشوف و كامل سكتو ، منبعد طلقتها بضحكة و دارتلي ب راصها دخلي، ناضو كامل يضحكو ، انا نورمالمو نحشم بصح لا قعدت نضحك معاهم على روحي ، قعدت حدا دوك زوج الشايطات تاوعي، داروني في وسطهم ، ني عارفة باغيين يعرفو شاكاين ، شفت فيهم قتلهم مفطنتش بكري ، شحال باه أمنوني ، سقساتني مروة على الشوتينغ لي درته قتلها فات روعة والله ، قاتلي راني متحمسة نشوف كيفاش حاتخرجي، قتلها الاربعاء و تشوفي صحبتك كيدايرا، المهم قريت هديك الحصة و لي موراها و خرجنا ناكلو ، قاتلنا سارة ناكلو هنا في الجامعة في الريسطو  مشي برا ، توسوتلها و قتلها أوكي هيا نروحو ، دخلنا و دينا واش ناكلو و قعدنا قعدت هيا قدامي و حدايا قعدت مروة و بدينا نحكو بصح سارة الماكلة و مكلاتهاش ، قاعدة تشوف خطرة فينا خطرة مورانا ، عرفت عندها حاجة ، قتلها واش بيك سارة واش كاين، قاتلي لا والو، قتلها حكيلي كاش معندك ياك رانا صحابات، نطقت مروة قاتلي راها مالبارح هكا تسقسيها تقولي والو ، منبعد نصيبها ساهية ڨاع، نضت من بلاصتي و قعدت حدا سارة حتى نصيب 5 ولاد هادا مقابلينا كيدايرين 🥹، قتلها و يااا سارة حرام عليك و انا نقول مالها الشيرة ، ناضت مروة تجري قعدت حدايا ولينا مقابلينهم كامل ، مروة غير شافتهم حصلتلها الماكلة، قتلها بشوية عليك و ضربتها لظهرها وانا ميتة بالضحك ، و سارة مسكينة حمارت  ، درنا انا و مروة ليها نشوفو فيها و ساكتين و نتبسمو ، باش تفهم روحها ، حتى هيا فهمت، قاتلنا اووف صاي نحكيلكم بصح متلومونيش، قلتلها انا نلوم روحي يلا لمتك ، قاتلي راكي تشوفي في هداك لي راه قاعد في وسطهم بصح بلا ماديري النش ، شفت فيه شحال بقلاوة جاي طويل شعره أصفر مالغري انا نكره هاد الستيل بصح مليح ، قتلها ايه، قاتلي هدا هو الاكس تاعي ، و حطت راسها ، قتلها مزلتي تحبيه؟ قاتلي ايه نحبو و بزاف من صغرنا و حنا في رحبا شحال كنا نحبو بعض ، قتلها واش لي خلاكم تنفصلو مالا؟ ، قاتلي هوا قالي حانسافر بلاصة وحداخر ، حنا كنا نسكنو في تولوز ، و هو جا هنا في باريس، قالي والله منسمح  فيك و نقعد نحبك ، و يجي نهار و نتلاقو ، و جامي نكون مع وحدة غيرك، و من تما مزدناش تلاقينا، انا هادا العام جيت لباريس، البارح شفته على هادي تقلقت، حسيتها راح تبكي مسكينة و، عندها الصح يلا بكات، قتلها و هو شافك؟ قاتلي لا مشافنيش ، انا خزنت عليه، قالتلها مروة و نتي مريضة علاه ماتروحيش عندو ، قاتلنا و يلا دار روحه معرفنيش ؟ قتلها لا ميديرهاش يخي كنتو تحبو بعض، قتلي والله راني حايرة و معنديش كوراج ، حكمت لها يدها، قتلها سارة ، جامي تسمحي و تتخلاي على واحد تحبيه، ديري بوسيبل تاعك باش تديه قبل ما يدوهلك مديريش غلطة تاعي، قاتلي و علاه نتي واش صرالك ، قتلها قصة طويلة منبعد و نحكيهالك، شافت فيا مروة و قتلي نتي معندك حتى ذنب، و كامل واش صرا ونتمنى ربي يجمعكم في رحبا علابالي تحبيه ومهما يصرا تقعدي تحبيه راهي في عينيك ، عينيا دمعو كلما يجبدولي عليه نبكي ، نحبو نعشقو يا ربي والله منقدرش بلا بيه ، هادي كامل قلتها في قلبي ، شفت فيهم صبت سارة تشوف فيا ، قاتلي سما هيا علابالها يا كلبة و انا لا ، قتلها لالا هيا جات صابتني نبكي حكيتلها و نحكيلك نتي تاني متخافيش ، دروك نلهاو بيك نتي لازم نجمعوكم و لانموت راني عارفة صعيبة سوغتو يلا يعرفك
_______________
دعو لأناغيم تتلاقا بسفيان ؟ مراكمش باغيين يتلاقاو؟ دعو واش راكم تقارعو؟؟!!!!