بكيت هاد الخطرة حتى شبعت غطيت روحي و بقيت قاعدة نندب، منبعد جاتني لحظة إدراك علاه راني دايرة هكا لروحي ؟، هو مشي دايها ف حتى وحدة لا أنا لا غيري ، و أنا نستاهل أحسن منو ، شابة، قارية، كلشي فيا شباب و زيد نقارع لهاد الرهج ؟ فيدال لمرته، أنا منزيدش نقارعله صاي، و يقولك يلا بقيتي مهوسة بواحد و تحبيه و تخمي فيه راح تصرا مطاردة و يهرب منك بلا ما يحس، ألوغ من اليوم صاي منزيدش ندير في روحي هكا، مسحت دموعي و نضت خرجت باش نغسل وجهي ، كنت ب البيجامة درت غير فولار فوق راصي و نضت هودت باش نروح توالات كاين وين نغسلو صبت الحية ظلمة باينة يكونو رقدو ، غسلت وجهي و شفت روحي في المرايا ، راني حمرة طوماطيس و وجهي منفخ ، و عينيا مجبودين ، ضحكت على. روحي راني كيوت , أول مرة نشوف روحي هكا ، مداري نكره روحي مين نبكي، ولا بالاك المرايا هنا مشي كيما في الجزاير ، المهم سڨمت روحي ، و خرجت ، بانتلي نشرب كاش حاجة روحت الكوزينة شفت فريجيدار صوبت الما ، الخضرة ، الفاكية، صبت الجو jus , رفدته و جبت كاس و حطيت فيه ، بلعت فريجيدار و طفيت الضو و خرجت من الكوزينة ، قابلني الباب تاع الجاردان وين ما لابيسين روحت قعدت تما و دخلت كرعيا في لابيسين ، النضرة شابة فليل ، السما راهي صافية ، و برد الحال ، تنهدت من قلبي ، بقيت غير نخمم معرفتش كامل واش ندير ، غير شوية هكا كنت نقول صاي منزيدش نخمم فيه، بصح راني في نفس الدوامة ، ندور ندور و نصيب روحي نخمم فيه ، أنا نخمم و سمعت واحد يتمشى مورايا، أنا بلا ما ندور و نشوف شكون من الريحة عرفت شكون ، قلبي ولا يضرب بوحد السرعة، جا قعد قاس روحه في الفوتاي لي دايرينه تما بلا ما يشوف فيا مامبا و لا يهدر، جبد دخان باش يتكيف ، شفت في كل حاجة و حركة دارها بلا ما نضيع حاجة، و حللتها ، باين عليه بلي راه عيان.....صاريله كاش بروبلام في خدمته............راه ساهي معنتها يفكر في حاجة و لا كاش حل ........ مي ساهي و داير صبعه يفوت فيه على فكه كيما راه يدير دروك سور راه يفكر ف حاجة عائلية ، باينة أميرة ..... و راه يتكيف بلخف و مقلق معنتها مكلاش اليوم و عوضها بالدخان وهادي عادة مشي مليحة فيه
أنا مبغيتش نهدر و لا ندخل روحي فيه حبيت نخليله في راحته علابالي خاصه الكالم و مام أنا خاصني هو ، مي هو لا كان عندو راي مختلف ، ڨلع الدخان من فمه بلا ما يشوف فيا و قالي و هو يشوف في الفراغ
علاباله؟
دورت راصي مافهمتش واش قال شكون هاد لي علاباله! شاف فيا و قالي
"الراجل لي تحبيه "
أنت تقرأ
أحببت شخصا لا يعرفني🇩🇿
Romance❌❌ لا أسمح بنقل حرف من روايتي و إلا سأتصرف بطريقة قانونية رواية ، الجزء الأول(الحلقات الاولى) حقيقي من بنت أمريكية صديقتي ✅ و الجزء الثاني من تطويري أناغيم و سفيان، قصة بنت تحب واحد ، هو مايعرفهاش، راح يبادلها الشعور؟ ، هل يوجد لقاء بيناتهم؟، كيف...
