أحببت شخصا لا يعرفني🇩🇿

الحلقة 31

كانت 9 تاع الصباح ، قاعدة عند لاكوافاز في شمبرتها و تمشط في شعرها ، تفكرت يامات مين كانت تحكي مع مايليس ، و مين عرفت بلي عرض عليها الزواج على هاذي راحت تشوف هادي لي قدرت تحتل قلب لي مقدرتش هي تديه
فلاش باك:
حطت تلفونها و هي تستفڨ و ترجف مور ما شافت بلي طلعو اليوم خطبتهم ! ، الدمعة حبستلها مقدرتش حتى تبكي ، قطعت كامل ديك المسافة الطويلة و بعدت على حبابها و ناسها و لي تعرفهم ، على جاله ، هو ، وحده، مي مع التالي يرتبطو؟، حست عقلها مراهش يخدم و حبس ، مقدرتش تفكر حتى، أسكو دير لي في بالها ولا لا  و مترددة ، ناضت و قالت والله نديرها ، لبست قشها و ماكيات ولات تبان شابة بزاف ، خرجت و حكمت طاكسي وين ما تخدم هديك  ديراكت ، ربع ساعة و هودت دخلت عندها  ، طبطبت و دخلت  شافت مايليس في آنآ و اللبسة و الحطة بقات تشوف فيها سهات باسكو شابة و عندها وحد السر تخليك متملش منها ، قاتلها  سمحيلي تفضلي اقعدي ، قعدت آنآ و تبسمت معاها، قاتلها مايلييس ب واش نقدر نساعدك ، ردت آنا ، راه عندي بروبلام و نحتاجك نتناقشو فيه ، نظن نتي تفهميني ، شافت فيها و طولت هاد الخطرة، قلتلها  البروبلام مايتعلقش بالخدمة تاعي سما؟" ، هزتلها ب راسها وي  منبعد ردت " سمحيلي انا منيش طبيبة نفسية راكي غالطة "، تبسمت هي على هاد الهدرة و قالتلها. خليني نحكي و ساهل ، سكتت هي و مردتش عرفت راهي تقارعلها باش تحكي ، قالتلها نقدر نسقسيك لولة أسكو راكي مرتبطة ولا لا ؟ ، ردت عليها ، ايه راني مخطوبة و قريب عرسي ، تبسمت آنآ من فوق القلب و هي تشوف في الكادر لي في الحيط، مليح دروك ركزي معايا مليح ، راجلك المستقبلي هذا ، نفترضو إسمه ليو .. تخيلي كاين امراة تعشق فيه في 10 سنين ...لدرجة انها حافظة العروق تاوعو في يديه...تمازج ليكولاغ في عينيه.....شحال يطرق على الطابلة بصباعو مين يخمم....ساعة لي ينوض فيها ....و ساعة لي يرقد فيها .....حافظة حتى مكونات عطره ..واش تقولي عليها؟... ردت عليها قاتلها هادي مهووسة، قالتلها صح و لوكان نقولك تحبو لدرجة تنضر كي يتآذى .... مترقدش يلا مرقدش...تذوب مين يبتسم....و تعطيه قلبها كون غير تمنى؟.... ردت عليها قلتلها هنا معنتها عاشقة باسكو غير لي يعشق لي يقدر يحكي هكا بصدق على لي يحبو ..... تبسمت آنآ و قاتلها . بصح كل عشق عندو مشكلة ، و هادي مشكلتها انو حب من طرف واحد واش الحل ؟.... ردت عليها مايلييس و مستغربة ، مكانش مشكلة حتى و ميحبهاش كون يشوف كيفاش تحبو يبادلها الشعور ، ردت عليها آنآ ، بصح قتلك افترضي لوكان هادا راجلك المستقبلي ؟ قاتلها اووه فهمت عنده لي يحبها ! و حاب يتزوجها تاني !  قالتلها ايه ، ميلت راسها و قالتلها معلاباليش شعور. تاعها مي راني عارفة بلي صعيبة بزاف عليها ، شافت فيها و قالتلها خلينا من هادي نسقسيك سؤال مهم. سكتت هي شوية و قالتلها نفترضو راجلك المستقبلي تلاقا ب هادي لي تحبو و بدا يحبها واش ديري ، طلعت حاجبها و قالتلها معلاباليش علاه جيتي عندي و من بين كامل الناس غير انا و هادا الهدرة بصح كون تصرا ننسحب و نخليه مع لي يكون فرحان معاها الحب تخلي مشي حب فقط و انا نديرها حتى و ننضر المهم يكون فرحان، هنا تبسمت ابتسامة تاع الصح هادي الإجابة لي كانت تحوس عليها ، ناضت و رفدت صاكها ، حبستها مايليس ، قالتلها راكي رايحة؟ قالتلها ايه ، ردت عليها بصح مقتيليش علاش جيتي واش الهدف ؟ ، جاوبتها ، نتمنى لي صرا اليوم يبقى سر بيناتنا ، هزت راسها و قالتلها باينة يبقى بيني وبينك متخافيش ، ناضت و راحت الباب قبل ما تحله حبست و قالتلها : سفيان يحبك ... و مايشوفش وحدة من غيرك.. حتى و نبان قدامه مراحش يحبني باسكو يحبك.... على هادي حافظي عليه ... باسكو دروك راه علابالك بلي وحدة تخلات على روحها و عطاتك قلبه أمانة بين يديك .... غادي ننسحب من حياته مالغري منيش فيها أصلا.. بصح نتمنى متخبريهش واش كاين باسكو مغاديش  يولي فرحان، و انا على زعافه نولي واعرة مايليس، قالتلها هاد الهدرة و خرجت ، هي مين سمعت واش قالتلها انخلعت ، تحبه ڨاع هاد الحب ، راحت تجري تشوف اسمها لي كتباته ، أناغيم ### ، هادي هيا لي معروفة في الإنستاغرام ؟؟؟ دقيقة هادي هي لي تكومونتيلها مداري؟ هادي هيا لي تحكي معاها و ترسلهالي ميساج شابين ؟؟؟ ، واش دير دروك تخبر سفيان ؟ و لا تكمل حياتها كيما قالتلها و متخبرهش ، بصح غاضتها؟ قرار صعيب بزاااف "
__________
هاني جييييييت، صاي دي تالية والله منزيد نطول، والله ما كنت نقصدها 😭❤️‍🔥