نضت صباح اليوم بكري مالغري عيانة بزاف مي لازملي نوض باسكو غدوة نهود ، قلت نروح نشري البيي تاع الطيارة و نشري لي كادو و مكانش لي علاباله بلي راني رايحة من لافامي تاعي قلت نديرلهم مفاجأة ، خرجت مور ما لبست قشي و شوية مايكاب و روحت ب لوطو راني كاريتها مور ما نكمل نرجعها هاد الحاجة تعجبني انا هنا مشي غاليين بزاف باش تكري لوطو خير ما نشري وحدة مي مع الوقت نشري معليش، قلعتها و رحت درت شغالاتي منبعد رحت نشري الشيكولة و الحلوى شريت ڨاع واش وصاوني نجيبلهم و القش لخواتاتي و خاوتي ، مور ما كملت رحت كمونديت حاجة ناكلها و خلصت و جيت خارجة ، تلاتة تاع العشية كانت ، من الصباح و انا نجري عييت ، تعبير مجازي بيانسور ، وصلت لدار دخلت و بديت نوجد لي فاليز منبعد روحت ندير عشا و ريحت، فات هداك النهار غير مع التوجاد و كل ما نتفكر حاجة نوض نديرها ، صباح نضت بكري على 4 تاع الصباح باسكو الطيارة تقلع على 7 هديك هيا باش ناكل شوية و نوجد روحي و نبلع الباب ، درت كامل هاد الصوالح في ساعة ، قلعت لوطو ديتها لشركة تاع الكرية و ديت طاكسي وصلت الستة و نص للمطار روحت باش يفتشو و ديك الاجراءات و الحمد الله منيش داية بزاف باڨاج باش يحبسوني هادي لي نخاف منها قعدت وين ما يقارعو في المرايا بيلاوما حلو الباب تاع الرحلة هادي ،حليت تلفوني تعرفوني نصور كلشي لازم بالتفصيل ، من لي نضت حتى وين ما راني و منبعد و نسڨمهم ، روحت ركبت الطيارة مور ما بداو يهدرو دوك بلي صاي كل واحد يروح لطيارتو و بلاصتو، زوج سوايع و 10 دقائق كنت في الجزائر. هادي حاجة المليحة مشي بزاف من فرنسا للجزاير ، وصلت و هودت ركبت في طاكسي باش نروح وين ما نسكنو و الولاية بعيدة شوية ساعتين طريق مي معليش ، على الوحدة تاع العشية وصلت ، كيراني فرحانة منيش مأمنة رجعت عند لافامي تاوعي ، رجعت عند صحاباتي و لي نبغيهم وحد الشعور راني نحس فيه و قلبي يضرب من الفرحة و الستراس، طبطبت في الباب محلوش ، زدت طبطت الزاوجة والو، ماننخلعش باسكو هادو هوما دارنا ساكنين تحت الارض ميسمعوش و عايشين في عالم آخر ، انا تمتم تحت فمي على هاد الطبايع لي مبغاوش يحبسوهم انتحل الباب ، سمعت لافوا تاع ختي تهدر و تزڨي ، بزاف عليك خويا نضلي نحل في الباب و نبلع فيه ها صاي حبس عليا هاد الخرجة مع صحابك كل دقيقة رايح جاي ، انا بديت نضحك عليها مزالت هيا هيا ، على العام مدابزا مع خويا ، سمعت حسها سكت مين مكانش لي دخل انا بقيت قاعدة برا باسكو حلاته برك و راحت ، رجعت تجري باش تقلع و تبدأ تزڨي حاسباته راه يزعق معاها بصح مين شافتني توغت و طارت عليا تعنق ، يااااااا آنآغيم جيتي ماما مامااااا جري جري آنآ جاااات يويويو ، النفس تقطعلي والله من كثرة لي جيفتني بالتعناق ، جات ماما تجري صابتني نشوف فيها بدات تبكي و تعنق ، والله احساس شباب بزاف تتلاقاي مع أسرة تاعك مور شحال من وقت سما راني في تلات سنين مشفتهمش ، المهم فاتت ديك اللحظة و تلاقيت مع بابا و قتلهم بلي السيمانة هادي يجو يخطبو و نفس النهار هداك نديرو الشوفة و العقد ، الصراحة يومين و أنا نقنع فيهم مقبلوش مين راه مقلق ڨاع هكا مي واش باندير المهم قبلو ، من داك النهار و أنا مع التوجاد و الڨاطو
.........^°°^........(◕ᴗ◕✿)........(◔‿◔)...........
الدار كانت مزينة و كلشي كامل مكمول من توجاد من نقى و من ديكور ، مزوقناش بزاف مشي عرس اليوم درنا حاجة سامبل ، الصالة تفريشة تقليدية ، وجدت في الكوزينة الڨاطو بڨاع الأنواع و المملحات ، كانو البنات رايحين جايين يوجدو معايا ، خواتاتي زوج و بنات عمي و خالاتي الله يخليهم وقفو معايا ، سمعت إيمان بنت عمي تزڨي و تعيطلي من الشومبرة راهي مصباح هكا و عندها الصح ، البنات يزوقو رواحهم و أنا مزال ما نوجد روحي ڨاع ، استسلمت و رحت عندها باش تسڨملي شعري و تكوافيهلي و دارتلي ماكياج سامبل مور محاولات باش ماظيرليش ماكياج شارجي باسكو مانبغيهش هكا و خرجت نهبل نهبل ، لبست جبة باسكو غادي نروح نعقد لولة منبعد يجو يديرو الخاتم و الشوفة، علابالي مكانش منها كلشي في نهار واحد بصح معاه متفهمي والو ، لبست قشي تاع براا كنت نبان شابة بزاف و ركبت في لوطو قالولي وصلو رراهم يقارعو تما وحد الربع ساعة ووصلت وين ما يعقدو (شيرات وين يعقدو؟؟؟؟💔🤓!، معليش كملو)
هودت و دينا معانا الڨاطو و الجو كيما يديرو الناس ، شفتو تما ، كوستيم لي لابسو خيطوه ليه برك
أنت تقرأ
أحببت شخصا لا يعرفني🇩🇿
Romantik❌❌ لا أسمح بنقل حرف من روايتي و إلا سأتصرف بطريقة قانونية رواية ، الجزء الأول(الحلقات الاولى) حقيقي من بنت أمريكية صديقتي ✅ و الجزء الثاني من تطويري أناغيم و سفيان، قصة بنت تحب واحد ، هو مايعرفهاش، راح يبادلها الشعور؟ ، هل يوجد لقاء بيناتهم؟، كيف...
