أحببت شخصا لا يعرفني🇩🇿

الحلقة 30

نخلعت مين سقساني هكا مي تمتم دورت راصي باش مانبينش
"معلاباليش على واش راك تهدر "
تبسم هو بلا ما يحس و قالي ، اوو علابلك على من راني نهدر و مكيش مجبورة تقوليلي غير سقسيتك
(الراوية):
قالها هاد الهدرة و رجع الدخان في فمه يتكيف علابله معندوش دخل مي عرف بلي تبغي واحد ، مي دايمن تفاجئه صابها مختلفة على باقي البنات كامل ، و مشي كيما توقع هو تلصق فيه على هادي ارتاحلها و حتى و تقوله متحب حتى واحد مي عينيها فضحوها ، دايمن مين يشوف في عينيها كاين لمعة فيهم و جامي بينت حاجة من غير الكالم و مع بنته برك ، قطع تفكيره صوتها مين قاتله بوحد الكالم
"انا منقدرش نقوله واش نحس من جيهته منقدرش نخبره بمشاعري"
شاف فيها سفيان و طلع حاجبه مشي محبتش تحكي من لولة و كيفاه متقدرش تخبره!! ،، شافت فيه هيا و بنظرة مفهمهاش
" باسكو قلبه داته وحدخرا "

هز راصه  و قالها
" حب من طرف واحد سما'
، رفد راصه يشوف فيها صابها تشوف في الفراغ ساهية ، شافت فيه و قاتله
" يعني تقدر تقول هاك" ،
شاف فيها هاد المرة مشي فاهم ، تحكي بالألغاز بزاف، و واش فيها يلا خبراته ! هو يجي نهار و يعرف كلشي على هادي جاوباته و قاتله
, "هو أصلا مايعرفش شكون انا ولا كاينة وحدة وسمها أناغيم عايشة "
مين قاتله هكا حبس التكياف  و ڨلع الدخان من فمه ، ابتاسمت هي على رد فعلو ، اسكو كون يعرف بلي لي تحبو هو يولي يكرها!! ، يعيفها!! ولا في زوج ؟ ،
سڨمت روحها و قاتله : جاتك بيزاغ! ، رجع هو يتكيف و جاوبها: الصراحة ، وي ، واش الحاجة لي خلاتك متقوليلهش خفتي يرفضك ولا معندكش كونفيونص في روحك ؟ ...ضحكت هي على هدرتو و قالته : لا انا نحترمو باسكو فيدال ليها  و منقدرش نحرمه من حاجة يبغيها غير مين بغيته لولة و بزاااف ، هنا واه تشوكا كيفاه قدرت تحبو بهاد الطريقة دور روحه ڨاع عندها و قالها ' سمحيلي بصح هادا مشي غباء!! كنتي قادرة تدخلي لحياته مدام بغيتيه نتي لولة و زيد قبل ميتعرف على هديك المراة مين تحبيه بزاف
قاتله ، كنت خايفة مشاعري مشي نيشان باسكو كنت صغيرة كون خبرته ميأمنيش باسكو صغيرة ، شاف فيها بلا ميتحرك لدقيقة صمت منبعد قالها: من وينتا ونتي تحبيه!!!!!!!
تبسمت هاد الخطرة و من قلبها ، ميل راصه يشوف فيها و يتأمل و هادي لي تقتلها هيا  دارت يديها تسڨم في شعرها لي خرج من الفولار  و قاتله: مكانش علابالي بلي نتا فضولي ڨاع هاك سفيان،  سكت هو و مجاوبهاش باسكو معندهش جواب، باسكو سمع اسمو من عندها بلا رسميات ولا ألقاب و هادا خلاه يحس بحاجة انورمال ، واااش؛؛؛
فطناته هي مين ناضت و. قالتله: علاه منخلوش هادي الخطرة لجايا
قالها وشكون لي قالك كاين خطرة جايا
هزت كتافها و تبسمت ، راهي عارفة بلي تقتله ، تبسم هو على الكونفيونس لي عندها ، مي اسكو علابله بلي ابتسم لاول مرة مور ما ماتت مرته علاجال مرا خلاته يحس بحاجة انورمال غير مين نطقت اسمه ؟

،، باينة ماعلابالهش،،
______________
ديزوووولي على التأخير بنااات، كنت بلا تلفون و زيد متوقعتش الكرو يطلع ، المهم منزيدش نطول
💗❤️‍🔥💋