أحببت شخصا لا يعرفني🇩🇿

الحلقة 59

قاعدة في شومبرتها في لرض شادة راسها و دايرة يديها على وذنيها من كثرة العياط لي ف دار ، كانت تبكي لربي و ترجف منو خايفة يلا يديرلها كيما كل مرة و تسكت، الحاجة الوحيدة لي جاتها ف بالها دروك هيا يماها لي سمعتها تعيط ، ناضت تجري حلت الباب تاع شومبرتها و هودت تحت، قابلتها يماها طايحة في لرض ، عرفت بلي هو دمرها، هاد الدقيقة ماخممت في حتى حاجة من غير انو تروح ترجعلو الضربة ، كان في عقلها بزاف صوالح انها تقتلو بصح خايفة ، من بكري تنازلت على كلشي على جال راحة بالها بصح اليوم فاض الكاس ، شافت يمين و يسار صابت زهرية تاع الورد رفدتها و راحت تجري عندو خبطاتو لراص، غير حس بحاجة اتضربت فراصو عيط من الضر لي شافو و قابلو غير الظلام بين عينيه حتى طاح ، حلت يماها عينيها من لي دارتو و ناضت عندها تلوم فيها
سيرين: واش درتي واش درتي هبلتي !! ااااه؟ هبلتي ، يقولو قتلوه ؟؟
راحت سيرين عندو تتلمس فيه صابت الدم يطيح من راصو و من الضربة لي داها ، شهقت و دارت يديها عند فمها خايفة
بينما مروة كانت جامدة في يديها الدم لي طاح من راصو واقفة بلا حركة ، ناضتلها يماها عطاتها صفعة باش تفيقها من الصدمة هادي ، شحال من حاجة جاتها على ضربة
مروة: م،مام،ا ، أنا مادرت والو ، م،مقدرتش ، نشوفو ي،يضرب فيك

ردت عليها بالعياط

سيرين : يضرب ولالالااااااا ، نتي واش دخلك قتلك بلعي الباب على روحك و ماتخرجيش

هزت راسها بعنف و هي تعيط : لالا ماما لاااا، كرهت أنااااا كلشي دااااه كلشييي واش حاااب مننا من لي مااات بابا و هو يحڨر فينا، تنااازلنا على كلشي واش حاب تاني ، غير الدار هادي لي مايدييهاااش صاااي ، لااا قراااايتي مخلاني نقرا كيمااا نحب، الشركة تااااااع بابااا ، بااااابااا أنااااا أناااا، لي تعب عليها و داهاللللي من يدي و هي من حقييي و قلت اوكييي معليش ، علااه يديرلنا هكاا؟؟ ظلم هادا ظلللم ، و يزيد يقولنا تخرجو من الدااار ؟ كلشي مده لولاااده، مخممش في خوه لي تحت تراااب اسكو راضي عليه؟؟ من قبل ما يموت و هو طامع فيييه!
عنقتها سيرين و هي تبكي مستسلمة لهدرتها ، صحح ماهي غالطة فحتى حرف قالتو ، من صغرها ومن لي مات باباها و هي تسوفري مع عمها ، ولا مرة عطاهم حقهم مالغري كلشي تاعهم ، بصح طاحو مع اكبر طماع و ظاالم  ، سمعو صوني تاع الباب قلوبهم ولاو يضربو من الخوف ، الحاجة الوحيدة لي كانت في بلا مروة انو راح تدخل للحبس و يدوها ، راحت ماماها باش تحل الباب و هي ترجف قابلهم ريان ، غير شاف حالة سيرين التبسيمة تمحات من وجهو و عرف كاينة حاجة ، راح عندها شدها من كتافها يسقسي فيها و هي في عالم وحداخر مشي قادرة تنطق ، دارتلو باصبعها للداخل عرف راهي على مروة ، غير حط كرعيه داخل الدار شاف داك المنظر عينيه انتحلو ، عمها طايح و هي قاعدة في لرض تبكي و ترجف ، مخممش كامل راح يجري عندها عنقها بكامل قوتو و هي غير تبكي و تهدر روحها
مروة: ر.رريان ق.قتلتو أنا ا.أنا قتلتو ب.بيديا
ريان: شششش ماقتلتيهش نعرفك ماديريش هكا و يلا ضربتيه معنتها هوا دار بيك مشي نتي ، نتي ماديريش هكا
زادت فالبكا و توريله في يديها لي يرجفو
مروة: شو.وف ش.ش.وف أنا قتلتو .
ناض من عندها و رااح يشوف عمها ، تلمس النبض ضابو عادي قال لسيرين تعاونو باش يرفدوه و يديه في شومبرة يريح
سيرين:خالتي جيبيلي حاجة نحبسلو بيها الدم ، راه غير جرح صغير مكان والو
قال هاد الهدرة و هو يشوف في سيرين (أم مروة) و مروة لي تشوف فيه و بدات تحبس البكا مين قالها ماعندو والو ، رفدو و دارو في السرير و نقالو الجرح لي فراصو ، لحسن الحظ مكانش جرح كبير غير صغير مي دروك يبقى كلشي على عمها قادر يشكي بيها و يدير أي حاجة و يهددها
ناض من السرير و هو يشوف فيه من البعيد ، خرج و خلى سيرين معاه تعسو مين ينوض مايقدروش يخلوه وحده
راح عند مروة صابها قاعدة فدروج ساهية ، قعد حداها و جبدها لعندو حطت رااصها عندو و غمضت عينيها
مروة: واش صرالو
ريان: ماعندو والو غير داخ برك
سكت شوية و نطق
ريان: واش دارلك؟
مروة: ظلمني ، دارلي بزاف صوالح ، مكنتش حاسبة نوصل نضربه و نوصل هاد الموصل ، خرمني من قرايتي لي كنت حابتها أنا ، دالي شركة تاع بابا لي هي حقي انا و ماما ، على العام يضرب و يظلم فينا ، و كامل هادا و جا اليوم حاب يدي الدار و نخرجو منها ، هههه مقدرتش نتحمل والله و زيد يضرب ماما!! غير هادي لي ماتصراش
تفاجأ ريان من لي سمعو ولا مرة بينتلو بلي تعيش كامل هاد الشي و هو معلابالوش؟
دار عندها و شدلها وجهها بين يديه
ريان: علاه مروة علاه!! مقدرتش تقوليلي؟؟ علاه تدسي عليا صوالح هكا؟
مروة: واش نقولك مثلا؟ ، اوووه ريان عاونني عمي يحڨرني و يضرب ماما؟
ريان: اييه مروة تقوليلي كيما عيطتيلي ساععع تقدري تهدري
مروة: طفرت دروك صاي ، غادي ندخل للحبس قتلتو
غمض عينيه مستسلم لعنادها و بدا يفهم فيها باب مايدريولها والو مدام هو معاها ، هو يحكي معاها سمعو سيرين تعيطلهم ناضو يجرو عندها صابوه نايض ، غير شاف مروة عينيه حمورة حاب وينتا يضربها ويطير عليها بصح نظرة ريان مقدرش يتحرك
جلال: راح نشكي بيك ، و الدار نديها نديها راهي تاعي أنا و عندكم 24 ساعة منزيدش نصيبكم هنا
سمع ضحكة صابو ريان داير يدو عند فمو و يضحك من قلبو ، طلع حاجبه يشوف فيه
ريان: ههه اهااا والله ماسمعتك؟ واش تكون ننتا !!
دار عند مروة و سيرين طلب منهم يخرجو يخليوهم وحدهم ، مع الأول ترددو بصح خرجو و خلاوه يهدر معاه و رب يعابن واش يقوله
______________
في هاذي الأثناء كانت آنآ خارجة من الدوش لابسة تريكو تاع سفيان مور ماسرقاتولو مين جاها شوية طويل ، يعني .
كانت رافدة المنشفة تنشف فشعرها و خارجة ، قعدت في الكرسي لي مقابل لا كوافوز تاعها و حكمت السيشوار باش تنشف شعرها مين راه البرد مالازمش تخليه مشمخ، غير دارتو و حبت تشعلو ، النفس انقطعت فيها من الفرينة دخلت لنيفها و فمها و عينيها، في ديك الدقيقة بلع الباب موراه تاع برا و هو حاكم يدين أميرة و ميت من الضحك ، ثلاثة ، زوج ، واحد، انطلقت عيطة بإسمو فرنسا كامل سمعوها ، هود يجري و هو معنق أميرة و هي دايرة يديها على وذنيها و تضحك معاه ،
آنآ: سوووووووووفيييييييياااااااااااااااااااان
بلع الباب تاع لوطو و قلع يجري عارف كون يقعد دقيقة يصيب روحه عند ربي ، سمع تلفون يصوني رفده صابها هي تعيطلو رفد عليها و هو متبسم
سفيان: وي صفراا وا...
مخلاتوش يكمل هدرتو كامل مين سمع كامل الكلام الفاحش من عندها و التواغ ، الحاجة الوحيدة لي فهمها هي والله مين ترجع نكمل معا جد جددددك
سفيان: آنآ آنآ سمعيني سمعيني خليني نهدر علابالي تبدلي رايك
سكتت تسمعه فيه واش يقول
آنآ: خفف انطقق
سفيان: يقولك كما تدين تدان
آنآ: سما هادي لي سكتتني عليها؟ كما تدين تدان!! سوف مين ترجع حاسب بانطلققك !! ياودي والله كون منخليكش تندم لي درتلي هكا مانتسماش آنآ، دروك نعاود كلشي ، نروح نعاود ندوش هكاااا؟؟ ، و زيد راني روطار على. الجامعة و روحت و خليتني ، راك باغي نروح روطار؟؟ ديجا نقولك حاجة غادي نعيط لر
سفيان: يلارراكي مرا انطقي اسمه
آنآ: نروح نعيط طاكسي .
سفيان: ساجية
سمع صوني عرف قطعت في وجهه ، شاف فتلفون صابها صح قطعت ، تبسم عليها و هز راصه فاقد الأمل منها كامل
، صونا تلفون راحت رفدت حبت تزيد تعايره مي مين سمعت لافوا تاع ريان سكتت
ريان: ألو
آنآ: اوو ريان كيراك
ريان: الحمد الله ، آنآ راني مسحقك ف حاجة
رديت عليه بانلي صوتو مشي كيما العادة
آنآ: ايه قولي واش كاين
رد عليا قالي لازم نتلاقاو قتلو اوكي ، رسلي الموقع باش نروحله مالغري قالي نجي نديك مي محبيتش قلت انا نروح نشوف واش كاين باسكو ممكن سفيان يرجع فأي دقيقة و يشوفني
نص ساعة كنت موجدة روحي و لبست ، رفدت صاكي و خرجت حبست طاكسي و رحت عندو ، لقيتو مع مروة ، مروة صبتها بحالة تشف ، رحت نجري عندها نشوف مالها ، محبتش تحكي مي ريان قالي واش صرا ، رحت عندها قتلها كيفاه ماتقوليش ياك رانا خواتاتي انا كلشي نقولهلك و هادي مشي حاجة لي تدسيها علينا ، حطت راسها قاتلي محبيتش نزيدك غير سفيان بزاف عليك ، قتلها هادي نسمعلك كيما نتي تسمعيلي ، نطق ريان قالي لازم سفيان يعاوننا مدام نعرفوه و يعرفنا يقدر يدير كاش حاجة بحاجة أنو يخدم محامي، قتلو ايه تحبو نعيطلو مكانش مشكل قالي لالا نروحو عندو كامل ، هزيت راصي و تبسمت هادي فرصة باش نردله واش دارلي صباح حاسبني نزعق مسكين
-
حبست طونوبيل  قدام المكتب تاع سفيان. ريان كان يسوق، ومروة قاعدة في الكرسي اللي القدام، بينما آنآ قاعدة ورا في المقعد الخلفي. كي وصلوا، ريان نزل الأول وفتح الباب لمروة بكل لباقة، وآنا كانت تتفرج فيهم بنظرة خفيفة، شحال يبانو شابين مي حسّت أن اليوم راح يكون فيه شوية توتر لي راح تديره هي بالذات