أحببت شخصا لا يعرفني🇩🇿

الحلقة 58

كان شادلي شعري و يعيط ، شعري حسيتو قلعه من بلاصتو غير مين قتلو راني خارجة ، مي مين قالي ديك الهدرة حسيت لرض لعبت بيا ، مصبت مانهدر ولا نقول ، طلقت يدي من يدو لي كانت شادة شعري ، سمعت صوت أميرة تقول
أميرة: بابا علاه راك تضرب ف ماما خليها
جات تجري تدمر فيه و عينيها مدمعين ، الحاجة الوحيدة لي كنت نخمم فيها دروك هي انو شافت كلشي ، و ماكنتش حابة تشوف هكا وهي صغيرة مانيش حابتها تتأثر بأي حاجة فهاد العمر ، مين شافها معنقتني فاق على روحه و طلڨني ، بعد عليا شوية و انا رفدت أميرة نخمم ف كاش كذبة نقولهالها باش نمحي التصويرة لي داتها عليه مهما كان يبقى باباها ، بقا يشوف فيا و ف أميرة منبعد راح طلع  منارفي للشومبرة تاعه ، شفت ف أميرة لي معنقتني و انا نخمم في هدرتو ، كيفاه ؟ و وينتا؟ ، مسحت لأميرة دموعها و سلمت عليها و قتلها
آنآ: ماتخافيش ماما ، مكان والو ، باباا راه زعفان
قعدت فالفوتاي نهدر معاها ، شفت فالدروج لي راح فيه سفيان و نتفكر واش قالي ماني فاهمة والو ، مي قلت ف قلبي مكانش منها يغير عليا و مكان ما دخلها فيبغيني ولالا ، يدير هاك على جال كبريائه برك ، أي راجل مايحبش مرتو مع غيرو يالوكان يكرهها

يومين ، يومين ايه و انا نقنع فروحي بهاد الهدرة ، من داك النهار مزدتش هدرت معاه ، ولا ! مازدتش شفته ، معرفتش ، صح بالاك غلطت مين قلتلو نروح مع ريان ، بالاك خسرت و طيحت من قيمتو ، معرفتش واش ندير و واش درت ، عيطت ، طيحت من قيمتي مين شفتو نهار كومبلي مبانش و أميرة لي توحشاته ، توحشتو منكذبش، ايه ، الرقاد مولاش يجيني ، سقسيت ليزامي تاوعو كامل قالولي لا ماهوش معانا بلا مانفيقهم ب واش صرا ، اووففف ،تنهدت من قلبي لي راه بايخرج من بلاصتو ماني عارفة عليه والو ، كنت قادرة نروح نشكي نقول مابانش مي ميساج لي خلاهلي (عندي صوالحي  ، ماتحوسيش عليا) حبست ، و صوالح هادو يومين؟ !! ، شفت روحي فمرايا راني حمرة طوماطيس ، لالا مابكيتش ، نظن لاڨريب باتحكمني و بديت نفشل و الدوخة بداتني مي راني شادة روحي علاجال أميرة وحدها و أحلام لي ماهيش هنا ، تمنيت تكون معايا دروك بالاك تفهمني ولا تنصحني ، مي ماهيش هنا ، تمشيت بشوية باسكو الدوخة راهي تزيد قلت نروح عند أميرة نشوفها يلا رقدت ، طليت عليها صبتها راقدة غطيتها و سڨمتها ، سلمت عليها في راسها ، قعدت في لرض دايرة راصي على السرير تاعها صاي مقدرتش انا نستاهل قطعت على روحي الماكلة ، حطيت يدي.عند صدري نحاول نتنفس مي الدوخة تزيد و وذنيا حاستهم يصونو ، سييت نعيط لأميرة ........ أ.أمييرة........ مي صوتي مكانش ينسمع و مخرجش كيما لازم ، الدوا ... الدوا تاعي راه في الشومبرة ، خممت ، حاولت نوض على رجليا مي خانوني و الدنيا دارت بيا حسيت روحي ثقيلة و النفس انقطع خلاص ، عينيا بداو يتغمضو غير بشوية و الظلام برك لي كان بين عينيا
في هاذ اللحظة، سمعات صوت خطوات جاية من برا. كان سفيان، عاود رجع للدار بعد غياب يومين كاملين، م شجارهم الأخير.