هاد العامين بلخف فاتو ،شكون كان يقول انو انا نبعد على عائلتي و صحاباتي لي نعرلهم من صغري، حياتي تبدلت 180 درجة ، بلاد جديدة ، معيشة جديدة، و حتى ناس جدد، واه ! كنت دايرة هدف انو نجي ل هنا باش نتلاقا ب سفيان ، مي صرا العكس مع انو عندي احساس بلي نتلاقو. و يجي نهار لي يكون في اسمي و نكون في اسمه ، علابالي راح عنده حياته مع مرته، ايه نسيت نقولكم زادت عنده بنت ، وي ، عندها دروك عام و نص ملي زادت ، إسمها حتى لدروك معرفتوش ، مبكيتش ، و مغرتش ، والله فرحت مين زادت عنده بنت ، علابالي فرح بزاف ، و علابالي بلي راه فرحان منقدرش نخسرله فرحته منقدرش نديرها باسكو نبغيه ، و من جيهتي انا ، فاتت بزاف صوالح ، تعرفت على ناس جدد من غير سارة و مروة ، "ماياريف" ، هادي بنت جديدة تعرفت عليها من الإنستاغرام ، ولينا نحكو 24 ساعة ، شحال كانت تسمعلي و نسمعلها، مخبرتهاش لا ، منقدرش نحكي لي جا ، هيا أصلها من الشيلي و ساكنة هيا وعايلتها في باريس ، حطيت الستيلو و تنهدت من قلبي راني حاسة و حد الفراغ في قلبي مشي نورمال بلعت المذكرة تاعي بعد ما كملت الكتبة هادي عادة عندي لازم نحكي واش صرالي ، ليام ولاو يفوتو يجرو و بنفس الروتين قراية خدمة مخلطة من جيهة في الكافيتيريا و من جيهة الاعلانات و راني نخدم على لامارك تاعي راني با نطلقها، و خطراتش مع صحاباتي ، فاتت لشهور و ليام و كملت عامين زاوج و انا والفت هنا صاي ، بنيت عالم تاعي الخاص و عائلتي الجديدة ، صونا تلفون رحت نشوف شكون ، اوووه ريان!! ، رفدت عليه جاني صوته يقولي ، أناغيم وجدي روحك راني جاي عندك نديك نخرجو ، قتله وين ، قالي راني نقولك وجدي روحك ، جاني صوت شيرة ! دقيقة هادي مروة؟؟, ، قاتلي هيا ولا نجيك نقسمك بين زوج يلا صبتك مشي واجدة , قتلها واش راكي ديري معاه تضلو في رحبا نتوما مشي كنتو مدابزين ، سكتت نعرفها تحشم و تتحسس من هاذ الموضوع ، قالي ريان أيا ني قريب ، قطعت و تبسمت ، ريان شحال عزيز عليا تعرفت عليه في الجامعة هوا جاي طويل و عينيه زرقين شعره اصفر، المهم أشقر ، و بالنسبة هو ومروة يضلو مدابزين على اتفه الاسباب مي نصيبهم دايمن في رحبا ، حتى بديت نشك انو مروة تحبو متحبش تبين ، لبست قشي و وجدت روحي و خرجت و بلعت الباب مليح نخاف يدخلو و لا كاش ما يصرا ، هودت صبتهم يقارعو بلوطو رحت ركبت معاهم و سلمت على مروة و ريان تاني، ايه نورمال ريان تقريبا كامل لي يشوفونا يحسبونا كوبل باسكو نتفاهمو بزاف ، قالي زين هادا كامل و راه وحده ، كون انا كون تزوجت بيك، ضحكت و قتله شارك تقارع ارواح تخطب ، شاف بنص عينيه في مروة ، ويااا فقتله راح حاب يغيرها ، مروة مدورة راسها دايرة روحها متسمعش سور غارت، قاتله شكون باتقبل بيك نتايا، قالها أناغيم تقبل بيا و تموت عليا، قتلها حتى نتا تموت عليا، قالي هادي باينة ، مروة سكتت تاك تقتله اليوم، نطق ريان قالي ماياري نروحو ندوها معانا هي و سارة، قاتله مروة لا سارة قاتلي نجي مع ماثيو، بالنسبة لماياري هي لي قتلكم عليها تعرفنا في الإنستاغرام هي مشهورة بزاف هنا ، و سارة ايه علابالي مفاجأة كبيرة، رجعت هيا و ماثيو، هداك النهار نعقلها جا عندي انا و مروة و سارة مكانتش هنا ، حكالنا كلشي بلي يحبها و هديك البنت مشي حبيبته حتى بكى، قالنا شحال وانا نقارعلها و نقرا باش نرجع وين ما كنا نسكنو و نعيشها أجمل معيشة ، بالنسبة لسارة مولاتش تروح الجامعة و يلا راحت منتلاقاوهاش كامل ، قاعدة وحدها ، حتى وحد النهار جات لابسة الحطة و ماكياج ولات تبان عروسة ، جات عادي عندنا و جمعنا قاتلنا راني با ننسا منقعدتش غير نبكي عليه ، انا ضحكت عليها باسكو مزال مقلنالهاش بلي ماثيو راه هابل عليها ، حنا نحكو و هو جا قعد حداها ، حنا نضنا خليناهم في راحتهم ، هيا تشوكات و جمدت في بلاصتها سوغتو مين نضنا و غمزنالها ما فهمت والو ، هو جبدها لعندو عنقها بصح هي مادارت حتى ردة فعل، قالها من حقك تكرهيني بصح والله مازلت عند وعدي و هديك غير صديقة برك ، فهمها كلشي هيا بدات تبكي و عنقاته ، شحال فرحتلها في ديك الدقيقة ، طاحتلي دمعة ، زعما يجي نهار و انا تاني نفرح كيما هكا ! من هداك الوقت وهوما في رحبا جامي بعدو على بعضاهم ، أفضل كوبل في حياتي هوما سارة و ماثيو، يقولك الحب جامي يموت و نيشان هذي انا أمنت بيها ، المهم حبسنا عند دار ماياري، و طلعت معانا سلمت عليها و الضحك معاها ما يحبسش ، سوغتو حنا جماعة تاعنا جايين "غير تاع ضحك" هودنا نقعدو في كافيتيريا شويا و جاو سارة و ماثيو ،و جاو وحدوخرين تاني ليزامي تاوع ريان ، وحد اسمو "لوسيفر"و واحد" وارن " جمعنا مع بعض و دوموندينا قهوة و كاش ما ناكلو معاها ، و تعرفو مين نتلاقاو القهوة نقلبوها بزعاقة و جمايع و الضحك، تعرفو ! ننسى كلشي مين نجتمع معاهم ، ربي عوضني بأفضل ناس الحمد الله يارب ، حنا نهدرو نطقت ماياري، قاتلنا راني بنقولكم حاجة قتلها واه و شفنا فيها ڨاع ، هيا دايمن ديريلنا خرجات غير متوقعة ، قاتلنا راني عارفة شحال من انفليونساغ (مؤثرين) مشهورين تعرفهم هيا ، باش نديرو رحلة نكومبو في ولاية وحداخرا ،نكرو فيلا راني نعرف مولاها ، سما نتوما خممو فيها و رجعو الخبر، تقريبا ڨاع عجبتهم الفكرة و مشي أول مرة يديروها و بالنسبة ليا انا اول مرة كيما هكا و قبلت ، راني باغية نبدل سوغتو مين كملت 3 سنين هنا في فرنسا، ايه كملت و فاتو بلخف ، انا قتلهم وي قابلة غير قولولي وينتا راني مغمومة، قاتلنا السمانة الجاية نقلعو نهار الاحد نتلاقاو في البلاصة لي نقولكم عليها ، ، نطق وارن قالها شكون راه جاي قالت الاسماء و انا ماكنتش مركزة معاها كنت في عالم وحدوخر تعرفو فاش نخمم بلا ما نقول ، كنت ساهية حتى نسمع وارن يقولها و بنته! قالته ماياري، واش فيها عادي راه والف بلا مرته الله يرحمها و يعرف يربيها راه عندها 3 سنين تاني متغبنوش ، قالها نتي أكدي معاه بلاك ميحبش يجي ، قاتلو انا نعرف نقنعه ، وتاني ميضليش غير بعيد علينا ملي ماتت مايليس و هو دافن روحه منشوفوهش كامل غير ف ستوريات هو وبنته ، قالها ايه عندك الصح ، كون تزوج و شاف حياتو خير ما يقعد وحده ، قالته و شكون باتقبل ب واحد عنده بنت ، قالها كاين علاه لا ، قاتلنا نشالله و نصيب وحدة انا نعرف نقنعه المهم يقبل يجي معانا، انا مافهمتش والو لي فهمته عندهم صاحبهم معرفتش اسمه مرته ماتت و خلاتلو بنت ، مسكين غاضني و البنت صغيرة شكون يربيها ، لازملها حنان الأم يالوكان موفرلها كلشي ، المهم تفاهمنا و منبعد مور ما كملنا درنا شويا و كل واحد تفركت لداره
_______________
واش رايكم !! كيفاش حاتفوت الرحلة؟
و شكون حايجي معاهم!؛.
تتعرف البطلة تاعنا على أشخاص جدد؟؟
خلولي رايكم ؛
أنت تقرأ
أحببت شخصا لا يعرفني🇩🇿
Roman d'amour❌❌ لا أسمح بنقل حرف من روايتي و إلا سأتصرف بطريقة قانونية رواية ، الجزء الأول(الحلقات الاولى) حقيقي من بنت أمريكية صديقتي ✅ و الجزء الثاني من تطويري أناغيم و سفيان، قصة بنت تحب واحد ، هو مايعرفهاش، راح يبادلها الشعور؟ ، هل يوجد لقاء بيناتهم؟، كيف...
