مقدرتش نقعد معاهم باسكو كون نقعد نوضلها ، نضت من بلاصتي باغية نروح ، شدتني قالولي ماتروحيش بصح قتلهم لا راني حابة نرقد منيش قادرة يلا قعدت منوعدكمش نخليها و لا نسكت ، سكتو و انا طلعت نرقد باسكو اليوم وحده جامي توقعت تصرالي هكا في حياتي ، لهاد الدرجة ؟ الغيرة توصل ، مقدرتش نرقد كامل ، أصلا كان مزال الحال
على الرقاد كانت الساعة تاع ليل ؤ قلت علاه منعيطش لماما و نقولها على الخطبة ، رفدت تلفوني و عيطتلها رفدت عليا ختي ،بدينا نحكو و مجمعين منبعد قتلها راكم قاع فدار؟ قاتلي ايه، قتلها حتى بابا؟ قاتلي راهم ڨاع متلايمين يتفرجو قتلها مالا روحي عندهم و ديري haut parleur باش يسمعوني شانقولهم راني بانهظر معاهم ، قاتلي اوكي و راحت حطت تلفون و دارت لاكام ، شحال توحشتهم حكمتني بكية مي شديتها بدينا نحكو و جمعت معاهم منبعد قلت نقولهم قبل ما نقطع ، قتلهم ماما بابا راني حابة نحكي في سوجي قالولي وي تفضلي احكي، قتلهم واحد راه حاب يجي يخطبني يسكن هنا و راه حاب يجي لدزاير و يخطب، قالي بابا و هادا من وين أصلو؟ و أسكو مسلم؟ قتلو واه بابا أصلو جزائري و عايش هنا ، هز راصه و قالي لي فيها الخير ديك هيا كلشي يرجع ليك نتي ، باسكو نتي حاتتزوجي مشي حنا ، هذا قرارك ، صراحة ريحت كنت خايفة من بابا مي ماما بقات ساكتة ، شوية و نطقت قاتلي نتي راكي قابلة؟ قتلها ايه باينة قابلة قاتلي مالا بالباراكة عليك ، قتلهم مي كاينة حاجة قالولي ايه واش هي ، قتلهم كان متزوج و. مرتو ماتت ، ناضت ماما واااش؟ متزوج؟؟ قتلها ايه بصح ماتت مرتو ، قالها بابا اسكتي خلينا نفهمو، قتلهم و عنده بنت، هنا ماما صاي بغات تتغاشا ، قاتلي و الناس واش يقولو عليك يا المهبولة؟؟؟ هبلتي ففي عقلك، قتلها ماما انا راني قابلة بيه و هادا قراري، قالي بابا بصح مشي ساهلة بنتي خممي مليح، قتلو بابا خممت على هادي عيطتلكم و مور شهر العرس ، قالي يا بنتي علاه راكي مقلقة و يلا على جال لي قلنالك تزوجيه راكي ديري هكا معليش مشي بالسيف تتزوجي بيه و رانا معاك ، قتلو لالا انا هاد الراجل راني حاباته و درت قراري و خممو فيها و اما سيمانة جاية نجي للجزاير و نبدا نوجد ، في زوج سكتو قالي لي راكي حابتها ديريها منقدروش نوقفولك في طريقك ، قتلها ربي يحفظك بابا ، و ماما انا نتحمل المسؤولية نتي غير فرحيلي علابالي راكي باغيتلي الخير مي هذا الرجال عوضني على كلشي و شفت فيه بزاف صوالح شابين ، هزتلي راسها و قاتلي الله يكملك بنتي ، و لي فيها الخير ربي يجيبهالك ، مين قاتلي هكا ريحت لي كنت خايفة منها تهنيت منها، بقيتهم على خير و رحت نرقد ، الحمد الله ليام بدات تتسڨملي ، مي سفيان والو مبغاش يحنن قلبو من جيهتي، معليش المهم راجلي و حلالي ،
________
سمحوولي البنات منيش نحط بزاف راني غير مع التسجيلات و شكيل هداك
المهم كل منقعد نولي نحطلكم
علابالي راني نقولكم ادعو بزاف
دعولي يعطيوني التخصص لي راني باغيتته
و ادعو لآنا يولي سفيان يبغيها
تشااااااو 🎀💗
أنت تقرأ
أحببت شخصا لا يعرفني🇩🇿
Romance❌❌ لا أسمح بنقل حرف من روايتي و إلا سأتصرف بطريقة قانونية رواية ، الجزء الأول(الحلقات الاولى) حقيقي من بنت أمريكية صديقتي ✅ و الجزء الثاني من تطويري أناغيم و سفيان، قصة بنت تحب واحد ، هو مايعرفهاش، راح يبادلها الشعور؟ ، هل يوجد لقاء بيناتهم؟، كيف...
