قاتلي و كيفاه راح ندير انا نحبو نموت عليه و راني خايفة مهوش عاقلني كامل ، قتلها شوفي نتي لازم تباني قدامه ، قتلها هو وين يقرا ؟ قتلي راه يقرا في نفس التخصص تاعنا ، قتلها كيفاه انا مشفتوش ، قاتلي وي مكانش يجي غير هنا هنا بدا يجي ، قتلها اييه عليها،، قاتلها مروة روحي حكي معاه شفنا فيها في زوج ، قاتلنا علاه راني غالطة يخي شحال وهوما مع بعض و مع تالي با يدير روحها ميعرفهاش! ، و ڨاع يلا دارها نورمال هي المهم دير لي عليها ، انا سكتت باسكو قاع هكا و يبقى القرار تاع سارة ، شافت فينا منبعد قاتلنا صحا نروح نحكي معاه بصح واش نقوله ! قتلها نتي روحي عيطيله مين يكون وحده و شوفي ردة الفعل تاعه ، و قوليله عرفتني و لا لا ، يلا قالك لا متشوفيش موراك قولي اوكي سمحلي شبهتك و ارواحي قاتلي والله نحشم ، مروة ناضتلها شدتها من يدها و نوضتها قتلها نوضي راهم راحو صحابو حبسي هاد الحشمة تاك يدوهلك ، ناضت هي باينة عليها متوترة شافت فيا درتلها بعينيا روحي متخافيش رانا معاك ، رفدت تلفونها و راحت تتمشى عنده و حنا قعدنا نعسو فيها كان مقابلها بظهره ، مين قربتله و جات تقول اسمه باش يدور جات شيرة تجري عنقاته هي تما حبست في بلاصتها جمدت انا مين شفت المنظر نضت باش نروح عندها بصح شدتني مروة قعدت
( سارة) راح نحولكم سارة هي تحكي دروك :
كنت متوترة بزاف بصح مين هدرو معايا أناغيم و مروة حسيت روحي نقدرلها و راني غير نزيد فيها ، كنا شحال من عام و من صغرنا مع بعض علاه نخاف يردني و زيد مشي انا لي يسمحو فيا علابالي يحبني غير راني خايفة ، نضت من بلاصتي راحلي كامل هاديك الخوف مين شفت فيا أناغيم تكورج فيا ، غير بعينيها والله راحلي الخوف حسيت عندي صحاباتي تاع الصح مالغري رانا في أقل من 3 اشهر مع بعض ، رحت نمشي عنده هوا كان القدام و مقابلني بظهره ، نظن رافد تلفونه و معلاباليش واش يدير بيه مين قربت عندو ، انا قلت نعيطله باسمه و نتلمسه في ظهره باش يدورلي ، مي لا !، غير قلت "ماثيو" جات وحد البنت تجري عنقاته ، يدي قعدت معلقة في السما من كثرة لي جمدت من المنظر ، قالي جامي نسمح فيك ياك!، هادي هيا؟ هادي لي بدلني بيها ياك! ، أسوء موقف تعرضتلو في حياتي ، تمنيت الارض تنشق ندخل فيها راصي ، في ديك الدقيقة دار عندي ، شحال توحشتو، شاف فيا حسيته مخلوع انا ، لا حياة لمن تنادي ، دمعة طاحتلي و انا نشوف فيه و ديك الشيرة مازالت معنقاته و تشوف فيا بطريقة شكون نتي ، شافت فيه قالته شكون هادي بيبي، اااه دروك تأكدت ههه نيشان راه معاها ، يحبو بعض، من لولة كان يكذب برك باش يروح عند هادي انا قتلها سمحلي راني غالطة و رحت ، هوا عيطلي ، والله عيطلي ، قالي سارة، يا ربي شحال توحشت صوته ، شحال من عام مسمعتوش انا مقدرتش ندور رحت نجري رفدت صوالحي من الطابلة لي كنت فيها مع البنات و رحت هوا عيطلي شحال من خطرة ، شفت مروة ناضت تجري عنده هو علابالي غادي تقتله اليوم و أناغيم لحقتني، خرجت من الجامعة كامل ركبت في لوطو و حبيت نقلع جات أناغيم قدامي قريب نضربها حبست و جات نزلتني قالتلي انا نسوق نتي ديريلنا كاريثة اليوم هودت و ركبت من الجهة زاوجة ، و ركبت هيا باش تسوق شوية و جات مروة تجري ركبت معانا و انا مقدرتش نحبس بكا غير نبكي و مروة غير تحلف فيه ، و أناغيم ساكتة ، حسيتها باتبكي ، نظن هيا تاني فاتت فموقف كيما هكذا ، شحال نكره روحي مين نضعف قدام الناس ، واش يقولو عليا ، سوغتو مين شافني نبكي هو وحبيبته ، حطيت راصي على تاقة تاع لوطو و غمضت عينيا، شوية و حسيت ب أناغيم تنوض فيا تقولي وصللنا ارواحي ننزلو ، نزلت و هودنا راحنا عند شط البحر جمعنا و جاو قعدو حدايا انا بديت نبكي جاو عنقوني ، شفت في أناغيم قتلها حكيلي ، قاتلي نتي تبكي و نحكيلك!! ، قتلها باش ننسا بالاك تاني لي فوتتيه صعيب عليا و ننسا انا حكيلي حمبوك، قاتلها مروة حكيلها واه ، قاتلنا صحا بدات تحكيلي عينيها دمعو مسكينة ،، انا سكتت هادي مزال و بدات تبكي ! حكاتلي كلشي تشوكيت والله شحال من عام و هي داسة في قلبها هاد الحب لواحد ميعرفهاش انا كون راني متت ، قاتلي انا راني راضية ب كلشي كتبهلي ربي ، و نقارعله لحتى نموت ، و نقعد نبغيه ڤاع حياتي، قتلها نتي مريضة هو تزوج و دار حياته ، قاتلي لي انا راني دايرة ايمان في ربي بلي سفيان من مكتوبي و مكانش لي تديه مني قتلها بصح داتو خلاص، مين قتلها هكا حسيتها تنارفات قاتلي سارة راني نقولك نديه نديه ، انا سكتت ، والله غاضتني هي تبغيه قبل و من لي كانت صغيرة منبعد تديه وحدخرا ، مين قلت وحدخرا في عقلي تفكرت شاصرالي بديت نبكي تاني ولينا نبكو في زوج و مروة تشوف فينا ، مين صابتنا كيما هكا ناضت قالنا نوض نوريلكم حاجة نضت انا وياها و تبعناها قتلنا وقفو عند شط البحر هنايا مامبا ثانية و دمرتنا في زوج في البحر تشمخت ڨاع و زيد بارد ، قاتلنا تزيد وحدة تبكي نغرقها أيا نوضو دروك ، صراحة والله من الخلعة دمعة نشفتلي كي انا كي اناغيم، أناغيم ناضت تضحك ، نسيت با نقولكم بلي هي على اتفه حاجة تنوض تضحك ، انا شفتها هكا ضحكت معاها نسيت قاع شاصرا ، شحال نحبهم هاد البنات لي ربي رزقني بيهم ...
__________
كملت البااااااااك و توحشتكممم 🐱💗
أنت تقرأ
أحببت شخصا لا يعرفني🇩🇿
Romance❌❌ لا أسمح بنقل حرف من روايتي و إلا سأتصرف بطريقة قانونية رواية ، الجزء الأول(الحلقات الاولى) حقيقي من بنت أمريكية صديقتي ✅ و الجزء الثاني من تطويري أناغيم و سفيان، قصة بنت تحب واحد ، هو مايعرفهاش، راح يبادلها الشعور؟ ، هل يوجد لقاء بيناتهم؟، كيف...
