أحببت شخصا لا يعرفني🇩🇿

الحلقة 44

هاد لافوا تاع جوليا واش راهي دير مع أميرة؟؟ ، مبغيتش ندخل حتى نسمع واش راهي تقولها ، سمعتها تسقسي فيها ، تحبي آنآ؟ قلتلها ايه نحبها ، قلتلها آنآ راهي مخليتلك حاجة شابة باش تاكليها قالتلها شامخليتلي؟ ، قلتلها روحي للفريجيدار تصيبي البيض و الزيتون و الكرواصون لي تحبيه، و كولي البيض مين يقولولك شكون قالك كوليه قوليلهم آنآ هيا قاتلي باش متزعفش و نخسرولها المفاجأة تاعها صحا ؟ ، هزت راسها أميرة و قالتلها صحا، انا الجنون حكموني علابالها كون تاكل البيض تصبح في السبيطار قادرة حتى. تموت بسباب الحساسية منو و سفيان وصانا على البيض مانمدولهاش ، راهي باتخاطر بطفلة صغيرة بسباب الغيرة مني!!، جيت باش نرجع نعيط لسفيان صبتو واقف مورايا ، كيفاه محسيتش بيه، رحت نجري عنده بغيت نحكيله هزلي راصه يبينلي بلي  راه عارف ، قد لي خرجت أميرة قالي شديها عندك و دخل و بلع الباب موراه و جوليا الداخل ، علاه بلع الباب هادا دروك!! راني حابة نسمع و نشوف شاكاين بفففف، قعدت نقارع والو مبان والو ، انا الغيرة بدات تطلعلي الرهج لراصي ألوغ نهود و صاي ، هودت و ديت أميرة للكوزينة نوكلها هاداوين ناضت مسكينة ، بصح كيفاه عرف بلي جوليا راهي با تدير هاك معرفتش، سور يكون سمعها تهدر في كاش بلاصة باسكو حمارة في هادو الصوالح، وحد ربع ساعة و صبتها مهودة و ووجها حمر و عينيها حمرين و حاطة راسها، زعما واش دارلها انا راني بانموت ، شفتها قعدت مع جماعة و قالتلهم يما راهي مريضة لازملي نروح دروك ، كامل ناضو قالولها ايه معليش لازم تروحي و حبو يروحو معاها بصح مبغاتش ، غير انا لي عرفت هادي كذبة و هو لي طردها بصح واش دارلها ربي عالم، طلعت جابت قشها و جات رايحة قبل ما تروح لحقتها شافت فيا بوحد الحقد قدمت عندها و قتلها راكي معروضة لعرسي انا و سفيان مور شهر ، حلت عينيها مخلوعة بغات تنطق بصح سكتت و نظرتها حبت تقتلني ، قدمت عندي قاتلي سفيان نديه نديه و قارعي و عقلي على هادي اللحظة ، تبسمت معاها و قتلها لبسي حاجة تقليدية و تحبي نخلصلك الطيارة باش تهودي للجزاير معليش راه عليا ، شافت فيا نظرة اخيرة و راحت ، الصراحة خفت منها باسكو عندها افكار شيطان و استسلملها ، مدامها وصلت توكلني الحرام و مدامها حبت تقتل طفلة صغيرة نتوقع منها كلشي و قلبي مهوش مرتاح من جيهتها، بصح منعمرس راصي بيها انا المهم تهنيت منها نكمل هاد النهار بخير، روحت رجعت للكوزينة صبت أميرة كملت و سفيان يمسحلها في فمها و يديها، هودت تجري عندي و عنقتني رفدتها و خرجنا للصالة وين ما كانو قاعدين ؤ قررو هاد النهار يبقاو  غير ف الدار يجمعو مين آخر يوم، جمعت معاهم و بدينا نضحكو و التنمر تاع ماياري و ريان و الزعاقة محسيتش بروحي ڨاع و. بالوقت كيفاه فات ، سفيان كان مجمع معانا تاني مي ردة فعلو جامي ضحك ولا،  غير يتبسم من فوق القلب ، فطنت مين ماصبتش أميرة عندي دورت وجهي يمين و يسار نحوس عليها و مصبتهاش، طلعت راصي قابلني الباب لي يطل على جاردان وين ما لابيسين و الباب شفاف كانت واقفة تما تشوف في لابيسين و تقرب بشوية ديك الدقيقة عمري خرجت باسكو قربت بزاف كون نعيطلها تخاف تطيح ، ما جيت نوض كانت طاحت ، عيطت باسمها  ڨاع سمعوني من كثرة الخوف ، نوضت نجري حليت الباب و قست روحي باش نسلكها مي انا ذكية معرفت نسلك روحي لي مانعرفش نعوم و لا نسلك الملايكة لي راهي أمانة عندي مي هكا و قدرت نسلكها و طلعتها ، معرفتش ڨاع كيفاش نضت من بلاصتي و جريت و قست روحي سلكتها ، جاو يتجاراو شدوها من عندي و حاسبيني نقدر نخرج بصح مقدرتش غثرت الداخل قاع في الما عييت كيفاش ندير بصح صاي وليت نشوف غير في الضو لي الفوق تاع الشمس لي عاكس على لابيسين. كنت نضلي نشوف في الافلام هادوك لي يغرقو يديرو وحد النور الفوق في البحر ، مي والله حسيتو قلت صاي هادا هو أجلي ، بدات عمري تخرج من كثرة لي الهوا مكانش  غير بشوية ، بشوية حتى محسيت بوالو ،
حليت عينيا قابلني السقف بصح متغير مشي كيف شومبرة لي كنت فيها بغيت نتحرك حسيت روحي ثقيلة ، دقيقة واش راه في يدي؟ سيروم!!، وجهي؟ ، الاكسجين!، وين راني؟
راني في سبيطار،  دوررت وجهي يمين صبت  ريان قاعد في الفوتاي لي دايرنه تما بصح راقد ، يا عمري في خويا مسكين سور ليل كومبلي و هو يعس فيا، على هادي نبغي ريان أنا كثر من أخ ، مي واش صرا مني عاقلة والو ، بغيت الما بصح مكانش لي راه هنا و راه راقد ، طولت شوية يدي باش نطيح الكاس مزيا مشي تاع زجاج  غير طاح دار حس، ناض ريان يجري عندي حسب كاش ماصرالي ، تمتم فرح مين صابني نضت تبسمت معاه و ڨلعت الاكسجين ، تنهظت من قلبي ، الحمد الله سلكت على خير ، قالي صافا هزيت راصي و قتله الما راح عمرلي كاس و جا باش يعاوني و يقعدني قدم عندي في ديك الدقيقة سمعت الباب انتحل و دخل سفيان و وارن. و ماياري ، سفيان كان رافد ساشي جايب الماكلة ، و كيما العادة مين يشوفني مليحة مع ريان يزيد ينقلب ، الله يسهل عليه يلهى في مرتو لي يعشق فيها، جات مايا تعنق فيا و تسقسي يلا راني مليحة قتلهم راني غايا ، كامل سقساوني بصح معرفتش كامل واش صرا ، صونا تلفون كان تاع سفيان خرج باش يهدر ، انا قتلهم حكولي شا صرا باسكو منيش عاقللة على حتى حاجة من غير مين مديتلكم أميرة ، و بالتأكيد مايا هي لي تسرد ڨاع القصص ، قعدت حدايا و بدات تحكيلي ، قاتلي نتي غير مديتي أميرة جا سفيان يجري يشوفها بدا يعنق فيها و يسلم عليها أول مرة نشوفو خايف هكا حنا ڨاع لهينا معاها حسبناك خرجتي ، هو دار باش يشكرك نظن مصابكش سقساني قالي وين راهي آنآ!؟ ، دورت راصي قتله راهي ه.... آنآ؟؟؟ وين راهي؟؟؟ غرقت !!!!!!، انا مين مصبتكش حكمتني وحد الخلعة بديت نبكي ، تحمحم ريان و وارن  "احححم" شافت فيهم منبعد شافت فيا، صحا مابكيتش بصح كانت في قلبي و بديت نرجف ، أيا قاس روحه باش يسلكك و الحمد لله لحقك في الدقيقة تالية، مين خرجك كنتي متغاشية عيطنا لومبيلونص ، هزيت راصي قتلهم قاع هاد الشي صرا ، بصح الموت شفتها ربي كتب لي عمر جديد الحمد الله ، نطق ريان قالي الحمد الله لي راكي بخير و جا عنقني ، دخل سفيان
مافهمتش يجي غير مين يكون ريان يحكي معايا !! ، حبس في بلاصته مين سافه معنقني منبعد دور راصه و جا قدم عندي مدلي باش ناكل ، قتله ماغسي و خرجو ڨاع بقا هوا، قالي سمحيلي كلشي بسبابي قتله مشي بسبتك ، قالي يلا بغات سلكتيلي بنتي كون راحتلي مايبقالي والو بغيت نشدله يديه منبعد خفت نتحمس هادا مشي ريان قالها متقولش هكا بعيد الشر و مدام انا راني عايشة حاجة ماتقيسهاش ، هزلي راصه و قالي ايه كولي باش تشربي دواك و تخرجي ، كليت و شربت الدوا منبعد قالولي صاي تخرجي عاونوني و خرجت، كانت العشرة تاع الصباح سما يكونو ڨاع راحو كل واحد يروح لدارو ،.و مزيا نسكنو قراية من بعض، ركبت في لوطو تاع سفيان و وصل كل واحد بقيت انا تالية باسكو قريبة شوية ليه ، قبل ما نهود شكرتو و قالي وينتا تهودي للجزاير قتله نظن بعد غدوة قالي ايه نشالله ، سكت شوية و حك راصه و قالي تقدري تمديلي نيميروك ! قتلو واه مديتلو و سجلتو ، قالي تعرفي انستاغرام تاعي ياك! درت روحي منعرفش قتلو لالا هزلي راصه و مدلي تلفونو باش نكتب الكونت تاعي ، كتبتو و مديتله دارلي أبوني ، قالي كاش حاجة رسليلي هنا ولا كاش ماتسحقي قتلو نشالله بونوي ، جيت رايحة شدني قالي هاكي مدلي برية قتلو واش فيها قالي حتى تدخلي و شوفي قتلو اوكي ، هودت و رحت دخلت للدار و بلعت ، ايييييي راني فرحانة بزاااف دارلي أبونييي ياس ياس ياس ، تفكرت البرية رحت نجري نحلها صبت فيها دراهم ، ايواااا علاه مدلي دراهم راهم عندي ، مي والله نديهم زعما نلعبها كيما دوك تاع مسلسلات ترميو نقولو لا راك طيح بكرامتي أيا صحا صحا، غدوة و نقولو لا بصح نديهم نشري الجهاز ......