كنت نتمشى مع ماياري و أنا من الداخل ميتة بالفرحة ميتة ، ماياري غير تنقز فيا و أنا شادة الضحكة باش مانبينش قدامه يقول راهي فرحانة و لا يتوسوس بالعكس ، راني حابة يدير في راصه بلي عندي واحد برك في قلبي و هو نفسه بصح معلابالهش ، منيش حابة يعرف بلي نحبو ، حسيت بضربة في ضهري روحي خرجت درت شفت صبت ريان كي العادة و شكون من غيره لي يضربني و يقتلني و يقولي كنت نزعق معاك، شفت فيه بوحد الشوفة نقتلك ، بغا ينطق و يقولي كنت نز.. ، واه علابالي كنت غير تزعق و أناغيم ضهرها ينقسم كاش نهار تقتلني و تقولهم نزعق معاها قدم عندي و دار يدو عنقني و بدينا نتمشاو، متنخلعوش هدي هيا أناو ريان على العام متقربين مع بعضانا ، قتله نتا مشي راك أونكوبل مخلي المرا تاعك و جاي عندي ، قالي لا راحت ، دورت راصي صبت غير سفيان يتمشى مورانا و وارن معاه بصح مشنف أيا هادا ماله غير صباح كان نورمال بفف خليني منه بديت نكره هاد التقلبات تاوعه كيما يبغي يضحك ولا يزعف، أستغفر الله قلت يضحك؟ ، جامي صرات و جامي شفتها ، حتى في تخيلاتي تجيني صعيبة ، أوكي نخليها على ربي و صاي بلعت فمي و نسيت ڨاع شاكنت نهدر أنا و ريان، قالي مالكي قتله والو قالي علاه راكي زعفانة كاش مادالك قتله لا ،نطقت ماياري و هي تحكي غير بشوية ، كيفاه هي باقيلها يامات على عرسها معاه و تقولها راكي زعفانة ، حبس في وسط الطريق و حل عينيه حبست انا و ماياري نشوفو فيه و انا صاي بديت نرجف خفت يبهدلني كما العادة ، بديت نتمشى عنده غير بشوية و نهدر معاه ، ريان خويا ارواح هيا نمشو هيا نروحو و نحكيلك ، ريااان؟!، راني نهدر معا، قبل مانكمل هدرتي جا يجري عندي و رفدني و بدا يدور بيا ، انا صاي عرفت بلي هادا الراجل عنده خلل في دماغ تاعه ، حطني وليت نشوف كلشي يدور بيا ، ضربته ضربة عوقته باش مايعاودش و رحت نتمشى جا. هو لحقني مع ماياري و يضحكو عليا مع وارن غير واحد السيد ، و وحد المسمومة بلا منقول شكون ، ايه نسيت أميرة راحت مع سارة و ماثيو باسكو راهم في يومين يحاولو فيه يخليهم يدوها معاهم باش يدخلو وحد الحفلة دايرينها غير العائلات و لي بولادهم ألوغ باينة علاه داوها، نشالله سفيان مايعرفش علاش باسكو قالوله غير تروح معاهم يدورو و يشرولها برك، حبسنا من المشي مين سمعنا جوليا قاتلنا قارعولي نروح نشري بلخف من عند الجزار باسكو راه باطيبلنا العشا اليوم ، الله يجيب الخير، راحت شرات و خرجت قتلنا هيا نرجعو لدار باش نوجد بكري العشا ، قلنالها أوكي أصلا ماباقي وقت و رانا من الصباح هايمين كيما المتشردين ، طلع وارن مع سفيان و جوليا و ماياري و ريان و كاين وحدين معانا
(محبيتش نذكرهم باسكو ماعندهم حتى دور في القصة) ،
ألوغ كيما كل يوم أنا نبقى تالية من كثرة لي حالة فمي و باش نعاود واش صرا البارح مع سفيان راني حالفة منركبش معاه مالغري صبته يقارعلي شفت فيه و دورت راصي و رحت حبست طاكسي و رحت ، تقولولي علاه نتصرف هكا مي مننساش أنا جامي ,بكاني على جال حاجة تافهة مالغري طلب السماح و سمحتلو مي تجيني ثقيلة نعاود نركب في لوطو تاعه، مشي بزاف و وصلت صبتهم قبلي مي سفيان قالولي خرج و كان منارفي بزاف حط وارن و راح ،معرفتش علاه و محبيتش نعرف ، نكذب عليكم، رحت عند وارن قتله وين راه سفيان قالي راح قتله وين قالي راح يسهر ، حليت عيني مخلوعة قتله واااش؟؟؟، ضحك عليا قالي نزعق معاك، العدوة انتقلت صاي، قالي علاه تحوسي عليه توحشتيه يلا توحشتيه هاراه موراك ،
أشهد أن لا اله الا الله و اشاهد أن محمدا رسول الله ، هادي قلتها قبل ما ندور و صبته داخل و بروبلام يشوف فيا ، ووووي، شانقوله دروك؟؟ توحشتك؟؟، شايقول عليا ؟ تحوس عليا، تبغيني؟ لا لا بصح وارن منبعد نقتله يلا بغات حرام ، جا قدم عندي ، وارن ناض و راح ، ياه سما أنا وليت ضحية عندو ، قالي سحقيتيني؟ قلبي بدا يضرب شانقول؟؟ خممو معاياااا، راصي حبس عقلي تبلوكا ، شاندير يا ربي ، قتله اا ا لا والو
قالي راكي سور؟ قتله ايه ، هز راسه و زاد قدم عندي ، ها قادر روحك خويا شد بلاصتك ، قالي علاه مجيتيش معانا ؟ قتله مكانش بلاص، زاد قدم عندي ، بصح لوطو تاعي خاوية، قتله مكانش علالبي ، قالي لا علابالك و شفتيني كنت نقارعلك، قتله نتا؟ لا لا ماشفتكش بلاك شبهتني، قالي آنآ متخلينيش ن## من راصي علاه ماجيتيش؟ ريان تروحي معاه؟ و أنا دورتي وجهك ، ديجا نتي علاه راكي لاسقة في واحد عندو وحدة في حياتو! ميبغيكش يبغي مروة ، و هكا راكي تخوني في صحبتك، قتله انا جامي نخون صحبتي و ريان كيما خويا ، قالي مهوش مسجل معاك في ليفري و انا. من جيهتي منقبلش وحدة تربيلي بنتي تدور مع رجال، خبطتو بصفعة، علاه! انا ندور مع رجال؟ ، قتله انا والديا مربيني من صغري و رجال معندي ماندير بيهم و منيش ميتة عليهم و زيد عندي لي نبغيه و من جيهة ريان يصرا واش يصرا و تقعد غولاصيون تاعنا كيما راهي و بالنسبة لصحبتي انا لي جمعتهم مالا معندي علاه نخونها ، جا حكمني من يدي قالي مدامك نتي مرتي منزيدش نصيبك تتمشاي معاه ء قتلو مزال منولي مرتك و يلا المعيشة حا تكون كيما هكا معاك نعل بوه هاد الزواج لي داير هاكا ، طاحتلي دمعة و رحت و خليته هادا والله ما يحشم طلعت نجري لشومبرتي و خبطت الباب رخيس، جيت باش نڨلع فولار دخل عندي زادم بلا مايطبطب و بلا الباب موراه ، قتله نتا مريض؟ داخل عندي هكاك بلا ما تطبطب !قالي سمحيلي معرفتش روحي و مديريش على هدرتي كنت منارفي برك دابزت مع واحد في الخدمة ، دبري راصك انا ماندخلش روحي في حياتك ، و هدرة لي قتهالك مشي من قلبي كنت حاب ندابز و جيتيني في طريق على هادي رجعت فيك زعاف ، قتله يلا كملت اخرج، قال ايه ني خارج مي متتراجعيش على هدرتك و العرس مور شهر، علابالكم نسيتت كلشي و قتله شههرررر؟؟؟ علاه قالك انا طيارة؟ و ديجا منيش في بلادي ، قالي نورمال سيمانة جاية روحي و وجدي روحك ، قتله تحسبها ساهلة؟ حاسب عرس كيما هنا يديروه؟ قالي ايه علابالي و بالنسبة الدراهم انا نعطيك و متخميش كلشي نوجدهلك المهم العرس مور شهر منيش حاب بنتي تزيد تتعقد سوغتو مين حاتروحي ، الرهاب تاعها غادي يزيد ، تنهدت من قلبي و هزيت راصي قتلو اوكي تاك نقول لمماما و نتفاهم معاهم ، هز راصه و جا رايح قبل ما يخرج دار عندي قالي العشا راه واجد بلا باتتعشاي هزيتله راصي و راح بلع الباب موراه ، هاد المهبول لي راني نبغيه أنورمال ، ههه بديت نضحك على روحي مع لولة شكيت قلت هادا راه يغير من ريان! منبعد تفكرت قلت كيفاه يغير و هو يشهد غير بمرته ميقدرش يبغي وحداخرا من غيرها والله ، استغفرت و رحت بدلت لبست حاجة خفيفة ، درت تلفوني يتشارجا و رحت هودت ، غدوة هو نهار تالي هنا و نتفركتو، هودت باش تتعشا صبتهم جايين هوما تاني ، سفيان كان قاعد معاهم ، قعدت بلاصتي و بدات هديك تحط ، مع لولة شكيت فيها مي مع العيا و سوغتو شا صرا مبغيتش نفهم قلت ناكل و نوض بدينا ناكلو مي مقدرتش اللقمة لولة حبيت نتقيا قلبي لعب ، و أنا يصرالي هكا مين نزعف ، جوليا كانت في الكوزينة نظن تغسل في ماعين و لا معلاباليش ، نضت نجري باش نتقيا التوالات ، غسلت وجهي و جيت راجعة ، سمعت واحد يهدر غير بشوية عند الكوزينة قربت غير بشوية لقيتها جوليا تحكي بتلفون و تضحك معرفتش معامن ، انا جيت رايحة بصح مين سمعت اسمي حبست نسمع، سمعتها تهدر ، ايه ههه رحت شريت لحم الخنزير باش تاكله ، وي علابالي حرام و ديجا مديتهلهم ڨاع ياكلوه ، سفيان لا ممديتلهش طيبتله حقه وحده بصح هي باش منزيدش شتدور بيا، دقيقة دقيقة؟؟ جوليا مدتلي ناكل لحم تاع واش؟ ، محسيتش بروحي ڨاع كيفاه و وقتاش دخلت عندها و حكمتها من شعرها طرطڨتهلها و ركبت فوقها و بديت نعطيها غير بصفعة ، المهم ديك الفيلا قلبتها بتواغ رجعت فيها ڨاع زعاف لي كان فيا، و بروبلام حكمتني هستيريا لي نخاف منها و بسبتها نقتل واحد و مانحسش بروحي ، جاو يتجاراو عندنا صابوني راكبة فوقها و هي توغ و انا نقبش و نضرب فيها. عياو كيفاه يسلكوها مني بصح مقدروش ماوليت نسمع والو ، جا ريان حكمني و بدا يجبد فيا و قدر يبعدني بصح انا والله مابردت رحت نجري حكمت الموس و بغيت نقتلها ، جا سفيان خطفه مني و ماياري تكالمي فيا بصح والو كنت في عالم تاعي و الهستيريا هادي يا نقطع قشي يا نقتل واحد ، شفت مروة مين نوضت جوليا رحت نجري عندها باش نكمل نضربها بصح حسيت واحد شدني عييت نتخبط بصح مقدرتش نروح عندها درت نشوف صبته سفيان ، عينيه ، عينيه صاي بردت , غير شفت في عينيه رجعلي عقلي ، جات عندي سارة و مروة و مايا قالولي واش دارت شاكاين ، قتلهم حكيتلهم انخلعو ، تفكرت ڨاع شادارت زدت تنارفيت بغيت نروح نعاود ن.، بصح يديه مبغاش يطلقهم عييت كيفاش ندير باش نهرب من عنده مي لا ، هوما غير سمعو شاقتلهم تنارفاو بغاويكملو عليها بصح كالماوهم ، الليلة تفوت كحلة ، خرجني سفيان و جابولي الما ، شربت بصح الرجفة مزالت فيا ، و ماتروحش حتى ندير في روحي حاجة مزال ما نفطن ، وليت نهز في كرعيا و نمسح في رقبتي ، تقول مهبولة ، مكنتش باغية نبينلهم هاد الجانب مي الله غالب بروفوكاتني ديك اليهودية
_________
PrneseAmani For U💕🌚
أنت تقرأ
أحببت شخصا لا يعرفني🇩🇿
Romansa❌❌ لا أسمح بنقل حرف من روايتي و إلا سأتصرف بطريقة قانونية رواية ، الجزء الأول(الحلقات الاولى) حقيقي من بنت أمريكية صديقتي ✅ و الجزء الثاني من تطويري أناغيم و سفيان، قصة بنت تحب واحد ، هو مايعرفهاش، راح يبادلها الشعور؟ ، هل يوجد لقاء بيناتهم؟، كيف...
