وصلنا للمطار مور ما ركبنا في الطاكسي و مشي بعيد علينا بزاف ، هودنا و هود ليفاليز ديت تاوعي و هو تاني ، و دخلنا كنت لابسة غايا و دايرة ماكياج مصباح و هو يشوف فيا مشنف ، مافهمتش زعما مين قويت ، ياك راني عروسة جديدة لازملي نكون شابة بزاااف ، راح جاب البيي و رحنا للتفتيش قعدت واقفة حداه بيلاوما كملو لي قدامنا باسكو صف راه قبلنا مزيا جينا بكري باش مانديروش روطار و تفوتنا الطيارة ، كنت لاهية ڨاع ، اححم مشي لاهية كنت نشوف في ديك لي راهي مصباح حاطة عينيها عليه ، دورت راسها مين عرفتني بلي راني معاه ، فطنت مين جا واحد قالي معليش نحكي معاك؟ ، دور سفيان راصه يشوف فيه تحسب هدر معاه مشي معايا ، قتلو ايه تفضل قالي لا وحدنا خير، هدر سفيان قالو تقعد هنا ماعندها وين تروح ، قتلو نورمال احكي هنا ، قالي عرفتيني؟ قتلو لالا ، قالي رايحة لفرنسا؟ سكتت شوية شا هادو الاسئلة ؟؟، قتلو ايه هزلي راصه قالي حتى أنا، قتلو شكون نتا؟، قالي مقالولكش والديك؟، قدم عندو سفيان قالو تهدر نتا شكون ولا نهدرك انا!! ، شاف فيه هداك الراجل من تحت للفوق و بعد عليه و جا عندي قالي انا هو لي خطبتك و قالولك خطبك واحد نورمالمو حكاتلك يماك و على هادي راني طالع لفرنسا عندك حسبتك ماكيش هنا علاه ماقالوليش ؟ ، سما هادا هو ههه! ضحكت من قلبي في وجهه قتلو نتا هو؟؟ جاي علاجالي؟؟ جاي عندي؟؟ وين وين! شفت سفيان دور راصه سور عرفه و معرفتش علاه تنارفا يزيد فيها بزااف ، قالي ايه باش نتفاهمو على العرس ، حسيت بيد ڨاودتني صبتوو سفيان شدني من يدي و قدمنا و خليناه دار لي ديناه في التفتيش منبعد طلڨلي يدي و رحنا باش نطلعو للطيارة أول مرة يدير حاجة مليحة كنت غادي نقتلو هداك الرخيص، حكمنا بلايصنا كان هو عند التاقة و انا في الوسط ، حتى شفت هداك الراجل الرب العالي هادا لصقة، قعد حدايا سما أنا وليت في الوسط قالي مقتلكش على إسمي أنا أحمد و مدلي يديه ، ناض سفيان من بلاصته قالي نوضي ، نضت مبغيتش نسقسيه علاه قالي اقعدي في بلاصتي رحت قعدت و هو جا في الوسط حداه ، قالو شوف منيش حاب ندير ليبروبلام تعاود دور ب مرتي ندفنك ونتا حي ، شفت أحمد هدا وجهه حمار و راح بدل البلاصة بفف مزيا تهنيت منو بصح ديك النظرة لي شافها بيه قبل ما يروح خوفتني ، راني نخاف كاش مايدير ، دار عندي سفيان قالي بالعياط مين علابالك بلي جاي علاه ماتهدريش؟؟؟؟ قتلو منعرفوش مامبا قالي متعرفيهش ؟ ونتي مجمعة معاه ، قتلو انا؟ جمعت معاه؟, قالي اسكتي والله نغلط معاك اسكتي ، بغيت نعضه منبعد قلت لا ماناش وحدنا ، قدمت عندو قتلو ارواح طلع حاجبو يشوف فيا من تحت للفوق قتلو مغاديش ناكلك غمض عينيه و قدملي خاليته في ودنيه قتلو بالاك تحسب سكتلك خفت منك والله قد لي نوصلو للدار كون مانخليكش تقولي سمحيلي منتسماش آنآ على هادي لي عيطت عليا ، شاف فيا بغا يطيحلي منبعد سكتت قالي ارقدي ارقدي رجعت لبلاصتي سڨمت روحي و غمضت عيني ، مزيا مشي بعيدة بزاف هاد الرحلة زوج سوايع و ربع كنا وصلنا ....
حل الباب و دخل هوا دخلت موراه بكراعي اليمين يقولو مين تدخلي دار جديدة لازم تدخلي هكاك ، شفت أميرة جات تجري نقزت عليه عنقها و بقا يبوس فيها منبعد بدات تبكي قاتلو قتلي نجيب آنآ علاه ماجاتش نتا قتلها ماتجيش ؟ علاه علاه ، رفدها قالها شكون قالك ماجاتش سكتت و قالها روحي شوفي شكون راه هنا ، دورت راسها صابتني واقفة حلت عينينا مخلوعة وحد الضحكة ولات في وجهها نبيع الدنيا على جال هادي الضحكة جات طارت عليا عنقتني و تبكي قاتلي حسبتك رحتي وخليتيني قتلها قتلك نقعد معاك دايمن أيا صاي سكتي حبسي البكا نزلت من عندي قاتلي ارواحي نوريلك الشومبرا تاعي كيشابا رحت معاها وراتهالي منبعد دخلتني للكوزينة شفت وحد المرا كبيرة تطيب قاتلي هادي خالتي احلام دارت عندنا انخلعت جات تجري قاتلي سمحيلي مشفتكش ڨاع مين دخلتي قتلها لالا نورمال رحت عنقتها قتلها صافا قاتلي الحمد الله بنتي و نتي راكي غايا قتلها والله حمدالله قاتلي راكي عيانة ارواحي نوريلك الشومبرا ريحي فيها هزيتلها راصي و رحت معاها قاتلي هادي هيا الشومبرا تاعك نتي و سفيان ، سفيان غير حطنا راح خرج عنده خدمة نظن، حبيت نسقسيها و حشمت و عرفت هيا قاتلي احكي ماتحشميش مني قتلها هاد الشومبرا ج، جدي يدة ولا نفس، مخلاتنيش نكمل قاتلي لالا مشي نفسها ڨاع الدار بدلها قبل ما يخطبك قالي نبدل كلشي مشي جاية ترقدي على فراش كانت راقدة عليه وحدة قبلك ، شحال ريحت و فرحت في نفس الوقت كنت حاسبة مايخممش ڨاع بصح راه عنده لي جاست شابين بدا يعجبني ، قتلها صحيتي راحت هيا خرجت و انا بدلت دخلت عندي أميرة حشمانة قتلها ارواحي قعدت فوق السرير و رحت قعدت معاها قاتلي تعيشي معايا؟ متروحيش؟ قتلها نتي واش راكي حابة؟ قاتلي انا راني حابة نقعد معاك ڨاع ، قتلها مالا مين راكي باغية نقعد متروحش و نخليك قاتلي احلفي قتلها والله جات عنقتني قاتلي نحبك والله قتلها وانا نموت عليك ،
أنت تقرأ
أحببت شخصا لا يعرفني🇩🇿
Romansa❌❌ لا أسمح بنقل حرف من روايتي و إلا سأتصرف بطريقة قانونية رواية ، الجزء الأول(الحلقات الاولى) حقيقي من بنت أمريكية صديقتي ✅ و الجزء الثاني من تطويري أناغيم و سفيان، قصة بنت تحب واحد ، هو مايعرفهاش، راح يبادلها الشعور؟ ، هل يوجد لقاء بيناتهم؟، كيف...
