أحببت شخصا لا يعرفني🇩🇿

الحلقة 61

دمرته و شفت فيه بشك ، معرفتش علاه حسيت مراهش فعقلو ، قدمت عندو نشم فيه
آنآ: سفيان!!!، راك شارب؟!؟.
تبسم تبسيمة و عينيه بداو يتغمضو ، جا قدم عندي و جبدني عندو عنقني و بدا يهدر هدرة مشي مفهومة، مفهمت حتى حاجة من غير سمحيلي و الهدرة الباقية ماسمعتهاش باسكو عقلي كان خارج نطاق التغطية تاع الصح، سما الهدرة لي قالهالي مشي صح!!، هه، و انا قلت الراجل تبدل و بنيت أحلام في زوج ثواني برك مافاتتش خمس دقائق ،كان شارب و انا نقول صح ولا يحبني و فرحانة من قلبي ، ماوليت نخمم فوالو ، عقلي صفحة بيضا  ، مابكيت ، ماطاحتلي دمعة، ماخليت عينيا يدمعو ، شفت فيه و قتلو روح ترقد ، ديتو لبلاصتو و رقد تمتم ، الراجل مكانش ف عقله ، عرفت شحال انا نية و شحال غبية ، يحشوهالي بكلمة نقول صاي ....
قعدت فالكرسي في الكوزينة نشوف في الماعين لي خليتهم مزال مانكملهم ،  نضحك على روحي ؟؟ ، بزاف بزاف حمارة انا والله ، كيفاش نقابله غدوة؟، مي الحمد الله ماقلت والو و ماهدرت حتى حاجة على روحي و مابينتلوش بلي نحبووو
اوففف، نضت نكمل ماعيني ، عشر دقايق حساب كنت مكملة كلشي ، معرفتش أسكو ندخل لشومبرة نرقد معاه ولا نرقد فشومبرة تاع أميرة ، صراحة وجهه منيش قادرة نشوف فيه و مانيش متحملاته حاسة روحي نتوحم عليه والله ، على هادي رحت لشومبرتها ، مزيا مراهيش هناا ، استغفرت و رقدت مور تخماااام طوييييل

نضت صباح على حس في الكوزينة سمعت حاجة طاحت تكسرت ، دخلت صبتو يطيب و يوجد فالماكلة تاع الصباح ، اممم اول مرة يدير حاجة مسڨمة، دار عندي صابني واقفة نشوف فيه مخلوعة ، و عينيا نعسانين و بلا مانهدر على لي كنت لابساته ، قالي صباح الخير ، مابغيتيش نرد مي رديت و رحت مقويتش هدرة و مام ماشفتش فيه، صاي درت حاجة ف بالي و مين ندير ف راصي و نقرر نطبقها، روحت غسلت وجهي و سناني ، مشطت شعري و درت روتيني تاع الصباح ، رحت بدلت لبست بيجامة اليوم منيش حابة نروح نفسيتي تاع الصح ماهيش مليحة ، راني خايفة اليوم الدورة تحكمني باسكو وجع بدا و زييد ناسية لادات تاعها، المهم البيجامة عجبتني وحدة غووز ستيل تاع كوريين يجو عراض باسكو هكا نحب منبغيش حاجة مزيرة ، دوك راه جاي وقتهم اححم، خرجت من شومبرة صبتو داخل قالي ارواحي تاكلي هزيت راصي و تبعته قعدت فبلاصتي، شحال راني جيعانة ، كليت شوية بصح مين حطلي البيض حسيت قلبي خرج من بلاصتو رحت نجري باش نتقيا و كرشي وجع يقطع فيا ، لحقني هوا شدلي شعري باش مايغبنيش منبعد غسلي وجهي ، عيا يسقسي فيا قتلو ني مليحة ، روحت لشومبرة تاع أميرة تكسلت ، معرفتش علاه مارحتش لشومبرتنا حسيت بعدم الانتماء و مشي بلاصتي و حسيت راني زيادة فهاد الدار ، بدات تخدم خدمتها ، هرموناتي انقلبو ڨاع و تفكرت صوالح سلبيين لي صراولي ، شديت روحي باش مانبكيش لهيت فالوجع لي راه يزيد ، دخل عندي قالي علاه راكي راقدة هنا مرديتش عليه ، مانقدرش نهدر من كثرة الضر ، مين شافني هكا جا رفدني و داني لشومبرة زاوجة ، سقساني تاعش الوجع بصح حشمت نقوله قعدت ساكتة و مغمضة عينيا ، بصح فهم ، قلتلكم اليوم راه بدا  يتسڨم ، قالي عندك دوا هزيتله راصي لالا ، قالي قارعيلي نروح نشري و نجي
لبس تمتم و خرج بصح طول، كل دقيقة يزيد الوجع نكره حياتي مين تجي ، عييت شادة روحي بصح طرطڨت بالبكا مخلطة بالوجع و الوجع تاع قلبي راني غير نلايم بررك ، وليت نبكي بصوت و نشهڨ و انا مكورة روحي و معنڨة كرشي ، سمعت الباب عرفته جا بغيت نسكت باش مايقولش على هادي تبكي بصح مقدرتش بالعكس زدت مين جا عندي يسقسي فيا و خايف ، عنقني و بدا يمسحلي فشعري باش نتكالما مدلي الدوا شربته و عطاني حاجة كيما المخدة دار فيها الما دافي ، شحال و انا نتلوى كي اللفعة (انا لفعة أصلا) ، مخليتهش يرووووح هيهي، حسيت صح راه مهتم بيا ، مناضش ڨاع حتى رقدت...
فطنت على يد تنوض فيا ، حليت عيني صبتو متكسل حدايا
سفيان: صافا؟
قالي هكا و دار يدو عند شعري كيما كل مرة
هزيت راصي ب واه و انا نحك ف عيني لي انتفخت من البكا و الرقااد ،
آنآ: شحال راهي ساعة؟
سفيان: 3
آنآ: تلاتة تاع العشية!!!!!!
سفيان: يلا راكي باغية 3 تاع الصباح رقدي و نوضك فهاداك الوقت
قلبت عيني عليه ، مالغري هاد الحاجة يكرهها بصح ماتضحكش، حكمني من وجهي يزير على خدودي باش يخوفني
سفيان: واش قتلك على تقلبي عينيك اممم؟؟؟
آنآ: صحا بعد بعد
طلع حاجبه تاع منيتك؟ ، معرفتش شاراه يقارع مني ولا حسيت راه عارف بلي راه غلطان و انا تاني محبيتش نلومو كيما كل مرة بالعكس راني نحاول. ننسا واش صرا البارح ، نظن يقارعلي نطرطق و نعيط عليه منبعد يدير روحها ندمان و نفس السيناريو يتعاود ، تاع الصح كرهت نفس القصة على هادي الواحد لازم يبدل ، المهم ، دارلي بيديه ، صفق بصح بصباعه باش نفطن باسكو لهيت فتخمامي ، شفت فيه و سقسيتو
آنآ: ماتخدمش؟
سفيان: لا لا
آنآ: علاه؟
قدم عندي و هدر
سفيان: نخلي مرتي مريضة؟
آنآ: يااا وليت مرتك؟.
سفيان: من نهار لي حليتي عليا الباب
مفهمتش واش قال ، وينتا حليت عليه الباب ، كل يوم واه مين يجي من الخدمة بصح وينتا؟؟ ، حبيت نفهم بصح بدل ڨاع الهدرة و سقساني على الجامعة حسيت مراهش باغي يهدر و راه يدس عليا، سمعت حاجة تزقزق ، شفت تحت صبتها كرشي ، ويي، من الجوع و نظن اليوم الماكلة لي فالدار نكملها ڨاع ، ضحك عليا و ناض قالي نوضي تاكلي خير ماتموتي ، تبعته و رحت غسلت وجهي قبل ،لالا دوشت باسكو قعدت ساعتين هاربة منو
بعد ما غسلت وجهي، خرجت من الدوش، لقيتو فالكوزينة يحط الماكلة على الطابلة. كانت الريحة تشهي، والطابلة معبية بكلش: شوربة خفيفة، بطاطا مقلية، خبز دافي... زاد لي فيها شوية ديكور تاع صحن فواكه مقطعة. حسيت قلبي يتقبض شوية، على خاطر راني متعودة نقوم أنا بكل هاد الحوايج، ومانستناش هو يديه يديرهم. بصح اليوم كان مختلف، وسماقتش نعلق، رحت مباشرة للطابلة وقعدت.