🌹رواية هيام ما بين الغفران و الانتقام تكملة اجزاءها لفصلها التالت 🌹

Part 4 of part 54 saison 3 ✨

تتمة 3 من جزء 54 ♥️ الفصل تالت 🥀

صابرين شدات راسها و هي خايفة فخاطرها على المقلة ديال طيفال لايخصرها، بقات حاضيااه اش غايدير، حتى خرجات عينيها بصدمة فاش شافتو كَتَّر من زيت العود بلاقيااس و حتى بااش تقوول ليه نقص، لقاتو سبقاها و فقص  عليه جوج بيضات زادهم تالتة و رابعة، باغي يكبر بحبيبتو باي طريقة لدرجة اي حاجة شافها قدامو باغي يكتر منها على جالها...فرحان بيها  و باغي يفطرها احسن فطوور فاول صباح عندهم، و حتى من الملحة كترها بزاايد قال مع راسو حيت البيض بزااف خاصو الملحة بزااف و خلا صابرين غير مخرجة عينيها بالخلعة و بلاما تحس تنطق فخاطرها و هي كتشوف فالمقلة كيف كايشرطها بالمعلقة

صابرين : ويلي ويلي ويلي ليوما لخرة لييك مع خالتي احبيبي

سالا طيابو للبيض و هو نااسي قشورهم فوق البوطة، كانو مغمسين فاتاي لي تكب ليه و مازال مابغا يمسخو بكترة العكز لي شدو... حط المقلة فوق البوطاجي و مشا كايقلب على شي طبسيل فين يحط فيه البيض لي كان هاد الاخير ديكور ديالو كايشهي و لكن كايقطع بملوحية مايتكاالش....بقا كايجبد فكااع طبااسل  و هو كايتعزل فيهم على خاطرو  حتى بان ليه طبسيل زوين لي يليق بمحبوبتو، مشا شللو مزيان و مسحو و حط فيه البيض ، و  تم هازو بفرحتو قاصد حبيبتو و خلا وراه طبااسل هكاك مجبودين من فوق بوطاجي نسا مايرجعهم....و حتى جلس حدا صابرين و حط ليها كلشي قدامها و يلاه بغا يقول ليها فطري  حتى قفز من بلاصتو فاش تفكر بلي الخبز مازال فالفران كايسخن، مشا دغياا كايجري لعندو بخلعتو خافو لايتحرݣ، ساعة لقاه تشوط كلو من جنااب، مابغااش يحطو ليها هكاك حالتو، مشا جبد خبز ااخر عااود سخنو و رجع الخبز المشوط مع الخبز العادي..و هاد المرة بقا وااقف على خبز و مركز معاه تركيز نييت، مخلي صابرين وراه حاابسة ضحكة و فرحااانة بتعاملو معاها...و غير سمع طن جات من الفران ديك ساعة جبد الخبز ماتعطلش عليه، حطو كايفرفر بسخونية قدام صابرين و دابا عاد لقا فين يقول جملتو فااش لقا كولشي هو هدااك و منااقصة ليها واالو
احمد( كايكب ليها كاس العصير و نطق بجدية): و يلاه كوولي اش كتسنااي
كانت حتى هي باغة حبيبها يفطر و مايبقاش بجوعو، نطقات بالحشمة و مزال كتلعب مع اميرة لي شربات حليبها قبيلة و دابا رشقات ليها كضحك

صابرين: لا حشوومة ناكل بوحدي ، حتى نتا كول معايا

احمد( كايقطع ليها الخبز بالموص و بجدية عاود نطق كايشوف فيها): لاا كوولي نتيي لوولا..انا راه شبعان مافياش جووع 

شافها مصرة على قرارها مابغاتش تبدا ماكلتها و بحالا حشمانة، حط الخبز بتغوبيشة خفيفة و على غفلة منها جر لعندو  رجل ديال لكرسي لي جالسة عليه بخفة  ، تا قربها  ليه اكتر كااع و لسق كتفها مع كتفوو، خلاها تشوف فيه بنص عين بالحشمة و يلاه بغات تسااخر عليه واحد شوية حتى وقفها بنبرة صوتو الصارمة لي خلاتها تشد يدها عندها و تسمع كلامو
احمد( بتغوبيشة) : ريحيي..( عاود هز الكاس ديال اتاي لي كان فبلاصتها عاود حطو ليها قدامها، قطع دغمة الخبز مشا هز بيها البيض و دغيا خشاها ليها فمها و نطق ديك ساعة بنضرة حب بتغوبيشة خفيفة و هو كايبعد ليها شعرها من على وجهها) مابغيتيش تاكلي نوكلووك عاادي... تأنا طاالب عليها الكبييدة

كانت مزال صابرين تالدابا ماندغات الدغمة باش دوق الموصيبة لي دار، كانت ملاهيا غير مع قربو لي موترها و شوفاتو لقتالين لي كايجيبو ليها تماام،، حيدات عليه عينيها دغيا شافت قدامها مخلياه غاكايحنزز فيها بحب و طاير لسما كايتسناها تسرط باش يزيدها دغمة تانية، حتى شافها بداات كتكحب حدااه و قريبة تجييف ليه، كانت الملوحية قااصحة بالمعقوول و ماقدراتش عليها، دغياا شربها الما بخلعتوو و بقا كايضرب ليها على ضهرها بشوية، كايسحابليه غير وحلات ليها و هو مافخباروش بلي الملحة سبابها...ماقدراتش تعيب ليه البيض شافتو تعدب علييه سكتات و بقات كتشرب قدامو العصير كتبرد بيه ملوحيتها..حتى جاتها البكية فااش شاافتو وكلها الدغمة تاانية، مالقات ماتقول سرطاتها بلاما تبننها ولا تندغها و دغيا شربات عليها عوتاني عصير بااش تدوزها..و بسباب سكوتها و حشمتها منو زادها دغمة تالتة و رابعة و حتى الخامسة و بنفس طريقة كانت كتاكلها بيهم ...كتسرط و تشرب العصير بلاما تندغ و بكية فحلقها حتى ماقدراتش تصبر بالمرة على الملوحية و نطقات دييك سااعة غتخنق و كتشوف فيه بطفولية

صابرين: صافي  براكة عليا من بيض .. بغيت كيكة

دوا بجدية و باغي يوكلها دغمة سادسة بزز

احمد: لاا كولي البيض هو لوول ، مفييد ليك ..عاد كيكة

بعدات فمها و عاود نطقات معاه بطفولية و بحالا باغة تبكي

صابرين: لا راه ماعنديش معااه، مكنحملش ناكلو ، غير درت ليك خاطرك و كليتو...

خشا ليها دغمة بزز و عينيها تغرغرو منها و نطق ديك ساعة بجدية

احمد: لا خااصك تبدااي تااكليه، رااكي مريضة ...طبيبتك ديك المرة قالت  ليا بلي فيك فقر الدم...( شربها كاس اتاي و نطق كايشوف فعينيها بحب) بغيتك تشافااي ليا دغياا و داك الفشووش ديال ماكلة حيديه عليا من ليووما..اي حاجة بغيتك تاكليهاا

صافي وصلات طوب صبرها ديال الملوحية و ماقدراتش تزيد مازال ، بغاتو يعيق بفعلتو بلاما تقولها ليه ودغيا نطقات معاه و هي بزز باغة تسرط دغمة

صابرين( بشوفة طفولية مغبنة) : و يلاه دوق حتى نتا البيض، راك طيبتيه زويين

و  بفضول منو دغيا كلا دغمة سابعة و يلاه عض و بغا يتبنن حتى دفل دغمة فيساع فطبلة و هو مخصر سيفتو حال فمو و بقا كايشوف فيها بصدمة
احمد: مااالح
صابرين( دواات ببكية قريبة تخرجها و دغمة مزال ففمها ): بزاااف

دغيا حط يدو عند فمها بالخلعة و كايدوي بلهفة و مخرج فيها عينيها

احمد: دفلي ، حيديه من فممك ..داابا يضرك .

بقاات كتشوف فيه بصدمة و حشمات ترد ماكلتها الممدوغة فيديه، دغيا سرطااتها و نطقات دييك سااعة كطرطا بوحدها بكترة ملوحية

صابرين: صاافي كليتهااا

يتبع ...
👈 جزء 55 مليوح👉