رسالة من مجهول 📝💖

الحلقة التاسعة

الحلقة التاسعة
#رسالة_من_مجهول
#بوسى_مصطفى
________________

في شقة منال
منال ( الزوجة التانية لحمدي)
منال : ايه دا ياحمدي الفلوس قليله اوي المرادي
حمدي : معلش يامنمن ياحبيبتي
الهانم اللي متجوزها بقيت تاخد بالها اوي من الفلوس
ومش عايزها تشك فينا
ف اخدت مبلغ بسيط كده
منال : والعمل؟؟!
احنا لسه علينا مبلغ للمقاول اللي خلصلنا الفيلا
وكمان لسه عايزين نشتري الفرش والسجاد
المبلغ دا مش هيكفي
حمدي : لو المقاول مستعجل يبقى مفيش قدامنا حل غير إننا نبيع العربية وهبقي اعوضهالك ياحبيبتي
منال : تقصد عربيتي ولا عربيتك؟؟
حمدي : جرا ايه ياحبيبتي م تفتحي مخك معايا شويه
وانا لو بيعت عربيتي  وقتها سعاد هتشك فيه؟!
وبعدين ابيع العربية ازاي وانا محتاجها
منال : وانا محتاجه عربيتي
حمدي : خلاص نبيعها واشتريلك عربيه ع قدك كده
عقبال بس اما الظروف تتحسن
انا ممكن اخنصر منها فلوس كتير
لكن كمان مش عايزها تشك فيه
منال : وناوي تخلع منها امتي
حمدي : لما البيزنس بتاعي يشتغل واسمي يلعلع في سوق المقاولات
منال : ياخوفي وقتها انا اللي اتزحلق
حمدي : انتي! .. معقوله يامنمن مش عارفه انا بحبك قد ايه
امال انا بعمل كل دا ليه
مش علشانك
منال : طب يلا علشان الأكل برد
حمدي : فطار دا ولا غدا
منال : هههههههه قولت اعملك لقمه تروم بيها عضمك
بدل الاكل الجاهز اللي بتاكله ده
حمدي : هنعمل ايه بقى اكل العيش مر
م انتي عارفه إن يومي كله مقضيه بره
منال : لا بقولك ايه انت هتقعد معايا النهاردة... اه.. مفيش أعذار بقى
حمدي : لا ما هو النهاردة اجازة بقى وقاعدلك هنا ياجميل
منال : هههههههه وانا مش عايزاك تمشي ياحبيبي
_______________

هيثم شغال محاسب في مصنع في البلد
سمع من الموظفين إن في خناقه كبيرة حصلت في الوحده البيطرية التابعه للمركز بتاعهم
وإن في واحد من الدكاتره اللي شغالين هناك الإسعاف جات وأخدته ع المستشفى
طبعا اول حاجه فكر فيها يكلم سيف يطمن عليه
جرس ومحدش بيرد
قلق اكتر.. سأل عن عنوان المستشفى اللي راحلها الدكتور المصاب اخد العنوان وخرج بسرعه
باباه يتصل بالتليفون
ثروت : روح اطمن ع ابن عمك شوفه فين
هيثم : سيف!
ماله سيف يابابا
ثروت : معرفش غير إن واحد زميله الإسعاف جات اخدته وهو بيتحقق معاه هو وزمايله
هيثم : ليه ايه اللي حصل
ثروت : معرفش المهم تروح تشوفه راح  المستشفى ولا في القسم
وانا هحصلك بس انت اقرب مني
هيثم : وعمي فين
ثروت :"في المدرسه ميعرفش حاجه
هيثم :" طيب انا هروح اطمن وابقى اكلم حضرتك
ثروت : ماشي وانا مسافة السكه واكون عندك
بس عرفني هو في القسم ولا في المستشفى مع زميله
هيثم : حاضر يابابا
______________

في شقة راوية
أميرة : بتعملي ايه ياماما
راوية : بجهزلك الحاجه اللي هتاخديها معاكي
أميرة : بس علشان خاطري متكتريش علشان نص الحاجه بتبوظ وانا بحس بالذنب وانا بحطها في الزباله
راوية : ليه يابنتي
مبتخرجيش الحاجه وتاكليها انتي وصحابك
أميرة : ماهما كمان عندهم ماما بتعمل زيك كده
راوية : يعني انا غلطانه
أميرة : لا ياقلبي بس انا هاخد اكل يكفيني بس
مش عايزة اكتر من كده
راوية : طب ايه رأيك
لما كل يوم الصبح كده وانتي رايحه الجامعه تعملي كام طبق كده للفطار وتوزعيهم وانتي ماشيه ع الناس الغلابه اللي بيبقوا قاعدين على الرصيف
أميرة تحضن مامتها وتبوس دماغها وهي مدمعه : حاضر ياماما
راوية : عارفه يااميرة
اكتر حاجه ممكن تفرحك إنك تشوفي الفرحه في عيون حد محتاج وانتي بفضل ربنا جعلك سبب علشان تفرحيه
أميرة : معاكي حق مليون في الميه ياماما
راوية : طب ادخلي ألبسي بقى علشان متتأخريش
أميرة : حاضر ياماما... مش عارفه زينه ايه اللي آخرها كل دا بتلبس
كانت بتتصل ب زينه
زينه : لبست خلاص يااميرة ونازله اهوه
أميرة :"ايه اللي اخرك
زينه : انتي لبستي الأول
أميرة : ملكيش دعوة بيه انا بلبس في خمس دقايق
زينه : يبقى ملبستيش يااميرة
أميرة : هلبس اهوه بس خلصي انتي
زينه : مال صوتك يااميرة
شكلك مش مبسوطه
ايه حصل حاجه يوم الجمعه
أميرة : لا اليوم عدي بشكل طبيعي
زينه : امال مالك في ايه
أميرة : اصل بصراحه سيف بيبقى يبعتلي مسج الصبح
بقاله كام يوم يعني من وقت م رجعلي التليفون
زينه : ايوه يعني وبعدين
أميرة : بقينا بعد الضهر يعني ومبعتليش حاجه
تفتكري نسي ولا مشغول
زينه : معرفش بس عادي يعني يااميرة
ممكن يكلمك بالليل اابقى اسأليه
أميرة : أصله كمان مفتحش نت من الصبح
زينه : يمكن في الشغل ومش عارف يكلمك دلوقت
ياخبر دلوقت بفلوس بعد شويه يبقى ببلاش
أميرة : المثل مش كده ع فكره
زينه : انا عارفه بقى
هههههههههههههههههه
فكرتيني بمادة الفلكلور الشعبي
أميرة : هههههههه كانت فيها شويه أمثال شعبيه إنما ايه
زينه : طب بطلي رغي واقفلي بقى مفيش وقت
___________