رسالة من مجهول 📝💖

الحلقة ١٤

الحلقة ١٤
#رسالة_من_مجهول
#بوسى_مصطفى
_______________

في منزل ثروت (والد هيثم)
ثروت : في ايه ياحاجه بتنادي لمين
الحاجه : بنادي على مي بنت ام يوسف
ثروت : اه.. خير
الحاجه : اصل جالهم بتاع الكهرباء وبتقول الفاتوره طلعت غاليه اوي
ثروت : مش معاها يعني ولا ايه
الحاجه : لا معهاش تدفع والراجل قالها لو مدفعتيش النهارده هيقطعوا الكهرباء
ثروت : طب هاتي المحفظه من جوه
الحاجه : طب مش تعرف جالها الإيصال بكام
ثروت : يبقى زي م يبقى بقى ياحاجه
الجيران لبعضيها
الحاجه : حسبي ﷲ ونعم الوكيل
الست جايلها الكهرباء الشهر دا تمنوميت جنيه
ثروت : ياخبر امال احنا جايلنا كام
الحاجه : معرفش هيثم هو اللي دفع الكهرباء الشهر دا وانا مشوفتش الايصال
ثروت : بس كتير اوي تمنوميت جنيه دي شقتها صغيره
هتكون بتستهلك ايه يعني
الحاجه : تصدق صعبت عليه وهي بتقول للراجل
دا انا ياابني مشغله لمبتين وتلاجه
ادفع كل دا ليه
ثروت : لله الأمر من قبل ومن بعد
الحاجه : الحال دا مبقاش يتسكت عليه ياحاج الناس خلاص يااخويه مبقتش قادره تستحمل
ثروت : اسكتي ياحاجه ملناش دعوة
الحاجه : ليه يااخويه ملناش دعوة ليه
هو مين اللي بيدفع الفواتير الغاليه دي مش احنا
ثروت : ياست اسكتي بدل م يقولوا عليكي
ولا بلاش احسن الحيطان ليها ودان
ومش ناقص يجوا ياخدوكي في حديد
الحاجه : كمان...ليه وانا قولت ايه يعني
مش دي الحقيقة
دي الست ياعيني كانت بتكلم الراجل وهي بتعيط وبتقوله تمنوميت جنيه دا نص مرتب جوزى اجيبلكم منين
ثروت : لا حول ولا قوة إلا بالله
ادخلي هاتي الفلوس من جوه بسرعه ووادهوملها
وانا رايح الجامع ألحق صلاة العصر

في غرفة هيثم
هيثم : ياشيخه بطلي بقى.. هو في حد مسلطك عليه
ضحى : اه في
هيثم : مين؟
ضحى : ماما
هيثم : طيب روحي قولي لماما اني راجع من الشغل تعبان وعايز استريح شويه
ضحى : هيثم
هيثم : نعم
ضحى : هو سيف أبن عمي لسه ملقاش شغل
هيثم : في بس هو اللي مش عايز
ضحى : ازاي دا.. امال هيفضل كده
هيثم : لسه من كام يوم كنت بكلمه ع شغل في شركة كويسه والمرتب يعني مش بطال
قالي إنه ملوش نفس يشتغل
ضحى : اكيد نفسيته تعبانه
هيثم : ماشي يابتاعت علم النفس
اتفضلي وريني عرض اكتافك
عايز انام يابشر
ضحى : اهوه... سامع ماما بتنادي عليك
هيثم : يابنتي امشي بقى
ضحى : ايه اخبار الجو
هيثم : الجو حر النهارده شغلي المروحه دي تهوى الاوضه شويه
ضحى : اشغلك التكييف
هيثم : لا مش للدرجادي
شكلك عايزة تخلصي مني
ضحي : بعد الشر
هيثم : الحنيه دي وراها حاجه
ضحى : انت تعرف عني كده برضو
هيثم : هاتي اللي عندك ياضحي وبلاش لف ودوران
الرغي دا مبياكلش معايا
ضحى : هيثم ممكن أسألك سؤال
هيثم : اوك اتفضلي علشان انام
ضحى : هو سيف نسي البنت اللي كان متقدملها
هيثم : ودا يهمك في ايه
ضحى : لأ... أصله يعني صعبان عليه
هيثم :"اكيد مش هينساها يعني ع طول كده
الموضوع هياخد وقت
ضحى :" عندك حق صعب الحب يتنسي
وخصوصاً لو كان الحب الاول
هيثم ' ماشي ياعم الفيلسوفه اتفضلي بقى
ضحى : طيب تصبح على خير
الحاجه : انا ياابني مش بنادي عليك
هيثم لسه بيتغطي علشان ينام وضحى خارجه من الغرفه
هيثم :"ماما!
الحاجه : اه ياحبيبي ماما
هيثم : شبعان ياماما مش عايز اكل
الحاجه : لا ياحبيبي انا مش بنادي علشان الاكل
قوم صلي العصر في الجامع يلا
هيثم : حاضر
الحاجه : قوم يلا مستني ايه
هيثم بيرفع الغطا : حاضر ياماما
خارج من الغرفه
الحاجه : قولي ياهيثم
دفعت كام الشهر دا للكهرباء ياابني
هيثم : ليه ياماما
الحاجه : باباك كان بيسأل
هيثم : الف ومية جنيه
وقبل م حضرتك تقولي يلهوي
هههههههههههههههههه قالولي روح اتظلم
قولتلهم هو في حد ياباشا بيشتكي الحكومه للحكومه
اللي انتو شايفينه اعملوا
فأي حاجه هنقولها مش هتعمل حاجه
علشان كده عارف إن الشكوى مش هتجيب نتيجه
الحاجه : الشكوى لله.. ياابني
هيثم يبوس ايد مامته : ادعيلي ياست الكل
الحاجه : دعيالك في كل وقت ياحبيبي
ضحى تغمز ل هيثم : ع فكره انت كروتني
في الكلام وتوهت....ها
انا مكونتش ب سأل عن الجو اللي نعرفه
انا كنت ب سأل ع جو تاني
بني آدم يعني
الحاجه : جو بني آدم ازاي يعني
هيثم : هههههههه لما اجي هقولك سلام
الحاجه لضحي : هو الجو دا يبقى زينه
ضحى : نفسي اشوفها اوي ياماما
الحاجه : وانا كمان
بس ابوها مشدد على الموضوع ده
مفيش اي زيارات وكلام من دا غير لما تخلص
علشان تركز في دراستها
وادينا مستنيين
ضحى : ياترى هتبقى كويسه معانا ياماما
الحاجه :"تبقى كويسه مع اخوكي اهم حاجه
واحنا بقى مش عايزين غير سعادتهم
ضحى : طبعاً.. عقبالي بقى
الحاجه : اختشي يابت
ضحى : هههههههههههه
ادعيلي ياماما إن اللي في بالي يتحقق
الحاجه :" وهو ايه اللي في بالك ده
ضحى : حاجات كتير
المهم تدعيلي
الحاجه : حاضر
بس يلا ع المطبخ اعملي السلطه  قبل م باباكي واخوكي يجوا من بره
ضحى : حاضر ياماما
____________