منيرة وعشان تطلع من وهقتها قالت " امم جازي ترى بدور كلمتني قبل .. اممم قبل كم يوم " جازي تحمست ونست وش اللي مخليها تدق على منيرة اصلاً
جازي :صدق ؟ وش قالت ؟!
منيرة :قالت انها بترجع .. وقت الاجازة اللي بين الترمين فبقول لها تاخذك من ثريا وتروحون للبيت سوا .. اشتاقت لك وتسأل عنك
جازي :اي اي خليها تسوي كذا والله مرة مشتاقة لها .. طيب قالت اذا بتقعد ولا ترجع تسافر ؟
منيرة : مدري والله ما سألتها .. بسألها اذا ردت علي
جازي : اي بلييز منور .. يلا باي باي يا احلى اخت
ضحكت منيرة : اي عشان بدور .. يلا باي
سكرت منيرة وهي متوهقة .. لفت على اخوها سعود وقالت " ايش اسوي اللحين ؟" سعود " عادي كلمي بدور تراها مو قاطعة وترد عليك بسرعة "
منيرة " لا لا ما اقدر احط البنت بالامر الواقع بيصير كأني اجبرتها تجي "
سعود " معليه كلميها اسألي .. بعدين هي مو رايحة جنوب شرق اسيا .. تراها هنا بالرياض ما طلعت من السعودية "
منيرة تنهدت وقالت وهي تتصل عليها " خلاص دقيت عليها خل نشوف وش بيصير " رنة ورنتين وبالثالثة رفعت السماعة وردت بصوت مرح :هلا هلا منيرة
منيرة :بدووور ، قالتها بانتحاب
بدور :يا عيونها وش بك ؟
منيرة قالت لها كل شي من سفرتهم لرجعة ريم بشقة وسكن جازي عند ثريا انتهاءً بآخر اتصال لهم
بدور :كأنك حاسة اني برجع
منيرة : كيف يعني ؟
بدور : فتحوا للمستشفى فرع جديد ويبوني اكون المشرفة واحتمال اترقى لمنصب مديرة
منيرة : مبرووك يا بعد قلبي تستاهلين اكثر ، يعني يمديك ترجعين قريب؟
بدور : الا يمديني اجي اللحين لو تبين بس ما بعد اجهز اغراضي وبيتي حوسة شوي بس اضبط كل شي برجع
منيرة : طيب لو رجعتي اقعدي ببيتنا ولما تخلص الاختبارات النهائية روحي لجازي وديها الرياض تشمّ شوية هواء
بدور : ليش بعد الاختبارات؟
منيرة : من جدك بتروحين لها قبل؟ بتموت علينا البنت ولا راح تفارقك لحظة وما بتذاكر اختي وانا عارفتها
ضحكت بدور : خلاص ابشري ما طلبتي شي
...
بعد ما سكرت جازي من اختها سألتها هناي " من اللي بترجع ؟ يعني اللي تكلمتي مع اختك عنها ؟"
جازي " هذي بدور .. هي صديقتنا مرة اول شي كانت صديقة اختي الكبيرة ومعها بالجامعة بعدها شوي شوي قامت تصير صديقتنا كلنا "
