وصلوا البيت وعلى طول راحت جازي لغرفتها غيرت ملابسها وانسدحت تسوي نفسها نايمة .. دقايق وجت امل وقالت وهي تطق الباب
" جازي .. استاذة ثريا تقول لك تعالي عشان الغداء " قولي لها ما ابي " قالتها بصوت مكتوم لأنها متغطية بكل البطانية من رجولها الى راسها
ناظرت امل لثريا بقلة حيلة وهي تتمنى ما تسوي اللي براسها .. طنشتها ثريا وحاولت تفتح الباب لكن لقته مقفل فأشرت لأمل عشان تتكلم بس
سبقتها جازي وهي تصارخ بصوت مكتوم اكثر لأنها بدت تبكي " خلاص مابي شي ابعدي عني!!" قالتها وصوت شهقاتها بدا يرتفع ووضح من نبرتها انها تبكي
" جازي افتحي الباب " قالتها ثريا بصوت حاد خلاها تنتفض فقامت وهي خايفة وفتحت الباب وزادت رجفتها .. دخلت عليها ثريا اما امل نزلت تحت
" ايش في ! وش حركات العناد ذي ؟!" مـ.. ما عاندت بس مو مشتهية " اتوقع اني قلت لكلامنا تكملة مع اني كنت ناوية ابسط عليك القوانين
لكن انتِ اللي جنيتي على نفسك " كانت جازي منزلة راسها وواضح على وجهها انها بكت وبتكمل بكاء اما ثريا سوت نفسها مو مهتمة وقالت
"ان سمعت شي واحد عنك بس مب زين يا ويلك يا جازي ويا ويلك ثم يا ويلك لو اهملتي دراستك وما حليتي واجباتك .. وبتنزلين في كل وجبة وتاكلينها في وقتها
بدون تأخير او قبل وقتها .. ما عندي شي اسمه مو مشتهية فاحترمي النعمة وان سمعت بس سمعت انك رحتي وتهاوشتي او سببتي مشاكل سواءً مع بنات او
ادارة يا ويلك مني ولا اسمع انك هربانة من حصة حتى لو كانت فراغ .. ترى طلعاتك كاثرة ذي الايام والمديرة مو عاجبها الوضع ولا تخليني اوصل
لحد اني امنع المعلمات يطلعونك من الفصل هممم ! وشي اخير .. ان خالفتي اي شي من اللي قلته صدقيني بتتمنين موتك على مخالفتك لأني ما برحمك جد فاحترمي القوانين من البداية
وبطلي عنادك هذا لأنه ما ينفع معي !!" طول ما كانت ثريا تتكلم كانت جازي تدعي على الساعة اللي جت فيها لبيتها وتمنت انها ما التقت ثريا ولا حبتها
ولا شافتها ولو بالصدفة .. هزت راسها وتحس انها بدت ما تطيق ولا حرف تنطقه ثريا وقامت تكرهها لأنها اكتشتفت ذا الجانب الجديد بالنسبة لها من شخصيتها
" يلا وراي على الغدا " اومئت لها جازي وراحت ثريا أخذت جازي جوالها عشان ما تبي تواجه ثريا اكثر ودقت على منيرة اختها الكبيرة مع انها حاسة
انها ما بترد بس قالت على الاقل تحاول .. واول ما وصلها صوت اختها كانت ماشية على الدرج .. اشتاقت لصوتها ولطفها عليها وتدليعها لها
" منوووور اشتقت لك " قالتها وبدت تحس بدموعها تنزل والابتسامة شاقة وجهها .. قعدت على الكرسي وبيدها الملعقة تحوس بالاكل وهي تكلم
