يوم الأحد الساعة 9
جازي قاعدة مع البنات تسولف وتضحك بس فجأة جتها وحدة من البنات " جازي يلا تعالي معي عشان اختبار الدين والاجتماعيات " تأففت جازي وقامت
مع البنت وطلعوا للدور الثالث .. راحت البنت تنادي ثريا عشان تختبرهم ومع ان غرفة ثريا مفتوحة الا ان جازي ما دخلت وقعدت تتمشى وهي تراجع
او تحاول تراجع لأنها ما نست اللي سوته ثريا للحين .. جت البنت ووراها ثريا تمشي وهي تطقطق بجوالها .. جازي كملت تتمشى
ومعطيتهم ظهرها ولا كأنها شافتهم فقالت "جازي يلا تعالي " اومئت وراحت وراها وقامت تتمشى .. ثواني ودخلت ثريا وجلست على مكتبها
قامت تعدل الاوراق اللي فيه بعدين رفعت عينها للواقفين قدامها وقالت " امم كان معكم .. فاطمة صح؟" البنت " أي ابلة " ثريا " طيب نادوها "
اومئت البنت وطلعت اما جازي ظلت واقفة شوي بعدين مشت تبي تلحقها .. البنت اول ما طلعت من الباب كانت جازي وراها بالضبط وعلى وشك
إنها تطلع لكن نطقت ثريا بصوت هادي "جازي" التفتت ناحيتها وبكذا صارت واقفة قدامها ..
ثريا " ليش غبتِ يوم الخميس؟"
جازي " ما كلمتك بدور؟"
ثريا " الا .. عشان كذا بس؟"
جازي " عشان كذا؟ أنا دخلت بحالة انهيار عصبي ورحت للمستشفى وبالنهاية تقولين بس كذا؟!!"
سكتت ثريا ونزلت رأسها تحوس بالاوراق قدامها بالوقت اللي كانت جازي فيه تناظرها بعدم تصديق .. لحظة صمت مرّت عليهم خلت جازي تعدّل وقفتها
وترجع نظرة البرود لعينها مرة ثانية .. ثريا " امم وش ذاكرتي ؟"
جازي " ركزت على الاشياء اللي حددوها لي البنات"
ثريا " وش حددوا لك؟"
جازي " نفس اللي اختبرتيهم "
همهمت بعدها قالت " بحط لك نموذج ولفاطمة نموذج ولفجر نموذج " كانت جازي ساكتة وماسكة كتابها تطنّش ثريا اللي كان واضح انها تبي تفتح موضوع
سكتت ثريا وكملت تحوس بالاوراق قدامها وراحت جازي للمجموعة اللي بالوسط وقعدت فيها .. ثواني ونادتها ثريا وعطتها ورقة الاختبار
أخذتها جازي ورجعت جلست بكل هدوء .. بدت تحل ومرت قريب العشر دقايق من بعدها دخلوا فجر وفاطمة .. اعطتهم ثريا اوراق الاختبار
وكل وحدة جلست تختبر بنفس الوقت اللي خلصت فيه جازي وسلّمت الورقة .. جت بتطلع لكن ثريا قالت " امم جازي .. امم .. حليتي الواجب اللي نزلته بالموقع ؟"
جازي " مدري يمكن أي " ثريا " لا ما حليتِ .. ليش ما حليتِ ؟" سكتت جازي تنتظر كلامها يخلص بس قالت " يلا تعالي حلي "
