سكرت جازي عينها بعد ما راحت الدكتورة كإشارة لثريا انها تبعد عنها وان مزاجها قافل .. في كل مرة تنخفض حرارتها او ترتفع تصير حالها حال اي مريض
حساسة وتبكي على اي شي غير الدوخة والتشويش اللي يجيها .. اكثر وقت اهلها يهتمون فيها ومستحيل يتركونها لحظة عشان ما تتضايق وتفكر نفسها حمل عليهم
هذا غير وابل الافكار السلبية الثانية اللي تفكر فيها واللي طبعاً كلها من المرض .. دقايق ورجعت ثريا الغرفة بعد ما طلعت الدكتورة وشافت جازي على وضعها
قربت وجلست على الكرسي اللي جنب سريرها .. كانت تتأمل بوجه جازي المصفر .. بدأت تحرك شعر جازي بكل رقة وحنان لها .. اما جازي فكانت مستمره
على تفكيرها بمين هي بالنسبة لثريا .. عقلها ما قدر يوقف لحظة عن انه يسأل هالسؤال .. ومع حركة ثريا اللي زادتها بدأت عينها تدمع وتحرقها
ثريا مو من حقها تسوي لها هالحركات .. هي تحبها صح بس لو كرامتها بتتنافس مع حبها فأكيد راح تختار الكرامة على الحب لو شافت انه ما في فايدة
وان الطرف الثاني ما يبادلها نص حبها .. تنهيدتها الطويلة لفتت ثريا وخلتها تنتبه على انها صاحيه فتكلمت بهدوء وهي لسا تحرك شعرها " كيف تحسين اللحين؟"
جازي سكتت وما ردت الشي اللي خلا ثريا ترجع تتكلم "شفيك؟؟ تتألمين؟ تبين انادي لك الدكتورة؟" فاضت اخر نقطة من صبر جازي وتحملها انها تمسك دموعها
ونزلت وحدة ورى الثانيه وهي لسا مسكرة عيونها .. استغربت ثريا وتكلمت بتوتر ما بينته " جازي ؟ جازي شفيك؟؟" كانت لسا جازي مكتفية بسكوتها بس اللي اختلف
انها غيرت من وضعيتها وعطت ثريا ظهرها وهناك بدأت تصيح على راحتها سامحة لشهقاتها تطلع ولعيونها تنفتح وللدموع تشوش رؤيتها فوق مرضها
ثريا حست بشي ينغزها بقلبها كم مرة شافت جازي تصيح وبكل مرة تقول لها مسلسل ولا فلم لمتى بتظل تكذب عليها ؟؟ وايش السبب اللي مخليها تصيح من الاساس؟
اسألة كانت شاغلة بال ثريا وقررت انها راح تقطع حبل الشك باليقين وتسألها عن السبب الحقيقي " جازي وش فيك؟؟" تكلمت وهي حاطة يدها على كتفها بنية انها
تقلبها لها لكن جازي بكل عدائية بعدت يد ثريا وجسمها ينتفض وصرخت وهي تقول " بعـ .. ـدي عـ .. نيي" ثريا رجعت خطوة لورى واستغرابها وحيرتها زادوا
قلبها بدأ مو بس ينغزها الا قام يختض من اللي يصير .. ايش فيها جازي ووش اللي قلب حالها كذا! .. قربت مرة ثانيه وحاولت تتكلم بأكثر نبرة حانية عندها لجازي
ثريا " جازي حبيبتي وش فيك؟؟"
جازي صرخت بقوة مع شهقاتها اللي يرتفعون كلما نطقت حرف " اطـ.. اطلعي بـ .. ـرا!!"
