روايـــــــــــــة ✍🏼 { كئيب الليل ياطفلة يغيب الكل لا غبتي }مكتملة

البارت الثالث

📖 روايـــــــــــــة ✍🏼
{  كئيب الليل ياطفلة يغيب الكل لا غبتي }

الجد بصراخ: خاااااالد التربيه الباطله هاذي انا مابيها بلغها ان زواجها نهاية الاسبوع
ابو تركي : بس هذا يبه
الجد : اسكت انت
ابو تركي : لا حول ولا قوة الا بالله
الجد بصوت عالي: تركي ويزن تجهزوا زواجكم بعد شهر وكل شي علي ماعليكم الا تجهزون بأنفسكم
طلع الجد وترك الصمت لهم وطلعت وراه ام خالد اللي ما تدري وش تسوي
طلعوا الكل وهم ضايقين ومحد راضي الا تركي وغلا اما سميه كانت تبكي وهي بتموت ما تبي تتزوج ..

..
عند نور كانت جالسه تحوس بغرفتها وهي تشد شعرها: ماشاء الله بيزوجني غصب ومن مين من ماجد الصايع اللي ماله عقل والله لو على موتي
حست بالباب اللي انفتح بقوه التفت بصدمه حصلت ابوها داخل ومعاه خيزرانه سحبها من شعرها: تكلمين جدك كذا ي بنت ...... هاذي نهاية الدلع انا اللي خليتك كذا
يزن دخل وهو يحاول يبعد ابوه بس مو راضي ابد وكان يضرب نور ضرب مبرح وهي لسى باقي لسانها طويل ومصره على الرفض
ام يزن ويزن حاولو يتدخلون بس ابوهم ما ابتعد الا بعد ما انهد حيله
ابو يزن: اسمعيني طلعه من الغرفه مافي فاهمه ولا اشوفك وحطي ببالك ان زواجك بعد اسبوع
طلع وسكر الباب وراه بعد ماطلع يزن وامه
يزن : يبه هذا مو عدل حرام عليك نور بنتك كيف ترميها على ماجد وانت عارف حاله يبه انت مسئول وتعتبر ظالم لها حرام عليك وين بتروح من ربك
ضربه ابوه كف وهو يقول : مالك شغل اللي يقوله جدك يتم وانتهى
ابتعد يزن بعصبيه وهو كاره لكل شي يربطه بالعايله
اما ام يزن اللي كانت تترجى ابو يزن يفتح الباب عن نور بس ماكان فيه نتيجه الا انه رجع وضربها هي. بعد
نور كانت طايحه بجنب السرير وتبكي قامت وهي تمسح دموعها بقوه : نشوف من كلامه يمشي والله والله لو اموت واقطع نفسي ما اتزوجه والله
......

في مكان بعيد عن الكل في استراحه كلها صخب واغاني وانواع اشكال من المحرمات والشباب والبنات
كان ماجد منسدح وهو يضحك بسكر قاطعه دخول السايق اللي يقول : طال عمرك الشيخ ابو خالد اتصل ويطلبك تحضر له حالا
ماجد :ههههه شيخ هههه شيخ ايش وايش يبغى
السايق : جدك جابر
ماجد : انقلع انقلع بس انت وهو
قطع عليهم اتصال جوال ماجد اللي رد وصوته مو طبيعي : نعم
الجد : وجع اترك كل شي وتعال لي الحين
ماجد انفجع من صراخه: ابشر
قام بمساعدة السايق وراح لجده وهو في حال مايرضي احد
دخل وهو يترنح ويغني اغاني +١٨ وماهو في وعيه
الجد وقف وهو يقول : روح شوف له حل يصحى وخله يجي
التفت لابو ماجد اللي كان جالس بصمت: عاجبك حال ولدك
ابو ماجد بعد سكوت: كل هذا بسببك
الجد : اي سبب تكلم عدل
ابو ماجد : ناسي اللي سويته والا اذكرك.
اختبص الجد وقال: المهم حاول تربيه من جديد وانا بزوجه نور وهي تعقله
ابو ماجد : نععععععم مين تزوج مين
الجد : ماجد يتزوج نور
ابو ماجد : معصي مستحيل اخليك تظلمها هي بعد ما اكتفيت من الظلم
الجد : انا ما اخذ رايك انا اعطيك خبر
ابو ماجد : على جثتي يتم هذا الزواج
طلع ابو ماجد بغضب وهو يكره ابوه اللي مسيطر على حياة الكل واغلب خراب البيوت من تحت راسه ..

...
عند الجد اللي جلس وهو ينتظر ماجد اللي بالقوه صحى وجاء له وهو باقي يترنح قرب بيبوس راس جده بس بعده بالعصا : انثبر هناك واسمع وش بقول
ماجد : ابشر
الجد :زواجك الاسبوع الجاي على نور بنت عمك خالد مابي اي اعتراض اجهز وانت ساكت وحالك هذا بدل منه احسن لك
ماجد : هههههه الله نور واخيرا ابشر نتزوج ليه لا دام السالفه فيها بنت انا موافق
الجد : ضروري تفوق من حالك هذا والا احلم انك تتزوج اقل حاجه الين تتزوجها
ماجد :تامر امر
الجد: الحين قوم اذلف
قام ماجد وهو مبسوط انه بيتزوج وهو ماهو فاهم اش يعني يتزوج بس فاهم انه ( لرغباته فقط ) متجاهل اي مفهوم غير هذا
....

من بكره الصباح صحى عزام على صوت الاذان قام وهو يكبر وراح لطلال اللي ما رضى يقوم الا بعد هوايش وتوضوا وطلعوا ع اساس يروحون المسجد صلو ورجعوا
عزام دخل وابتدى يجهز عشان يروح للكليه وهاذي اخر سنه له في الطب سنة الامتياز والخبره لبس لبس الطب وجهز اغراضه وطلع وهو يحلم
بلقب د/ عزام التفت لاخوه اللي نايم وتنهد بضيق على حاله التفت لرعد وراح له نزل وهو يبوسه : الله يقدرني واعيشك عيشه احلى من هاذي ي اغلى ما املك ..