روايـــــــــــــة ✍🏼 { كئيب الليل ياطفلة يغيب الكل لا غبتي }مكتملة

البارت الخامس

📖 روايـــــــــــــة ✍🏼
{  كئيب الليل ياطفلة يغيب الكل لا غبتي }

سكت يزن اللي تقفل الباب في وجهه مايدري اش يسوي قام بضيق واتجه لباب وهو مايبي يروح الشركه اليوم حتى شغلهم مجبرهم عليه جدهم لين متى يعني راح لجده وهو ناوي يكلمه ممكن ربي يفكه ويقتنع دخل القصر واتجه للصالون وجلس وهو ينتظر جده وقف اول ما سمع عصاته
الجد : نعم ي يزن وش عندك من صبح الله وينك عن الشركه
يزن باس راسه : مريت بكلمك ي جدي
الجد : عن
يزن: عن موضوع الزواج
الجد : اي وش عندك
يزن:جدي الله يخليك سميه ما تصلح لي وانا ما اصلح لها تخلى عن الفكره تكفى مايصير كذا والله مايصير يعني وش بتستفيد مافيه سعاده ولا مصلحه لكلٍ منا وربي مايصير اقل حاجه يعني داري خواطرنا جدي والله انت تغلط مو كل واحد بيستمر كويس ممكن بكره يتطلقون والذنب عليك عشان خواطرنا لا تجبرنا
الجد : خلصت
يزن ببتسامه وهو يحاول يتفائل:  ايه
الجد : زواجكم بعد شهر بدل ما تتكلم روح جهز نفسك للملكه الليله
اختفت ابتسامة يزن : بس هذا حرام مايصير
الجد مسك يزن من اليد اللي توجعه: اذا تبي تعيش مع اهلك امك ابوك ما تبيهم يموتون حسره عليك ولا يتشتتون ويضيعون تزوج سميه وانت ساكت
ضرب يزن الطاوله بيده وهو يقول : الله لا يسامحك
طلع وهو مغبون ومقهور ماله حل الا انه يتزوجها والا جده بيشتتهم فعلا ومايهمه وش يصير اخذ جواله بقل حيله ورجع اتصل بسميه :الو
سميه : شصار
يزن بضيق : التهديد اقوى من محاولاتي
فهمت سميه ان جده هدده غمضت وارتفع صوت بكاها سكر يزن ومايبي ابد يتزوجها وهي ماتبي  بس غصب عليه
...

اما عند نور اللي وصلها خبر ان ملكتها الليله وانجنت وكسرت الدنيا وابتدت تدور مثل المجنونه على مفتاح احتياطي لغرفتها وهي ناويه ما تعديها على خير
....

عند عزام اللي كان جالس بأحد ممرات المستشفى اللي ابتداء يمارس فيها مهنة الطب وكانت هاذي هي سنة الامتياز حس بضاري يجلس جنبه: هاه كيف كان يومك
عزام: متعب بس حلو
ضاري : وربي ان شوي وانفجر زهقت
عزام : ماعليه كلها فتره وننتهي خلاص مدري كيف مرت٧ سنين هاذي
ضاري: حلوه صح بس في نفس الوقت صعبه
عزام: استنى بس متى ابدا اباشر شغلي واستلم اول راتب
ضاري: يوه الراتب اكثر شي احتاجه
عزام: كلنا بحاجته
وقف قبالهم طبيب وابتسم لهم: السلام عليكم
عزام وضاري : عليكم السلام
الطبيب : معليش ازعجتكم لكن انا طبيب في قسم الجراحه من فتره ابتداء عندنا طبيب امتياز يقاله عزام اذا تعرفونه دلوني عليه
ضاري ابتسم بأستهبال: ايه نعرفه امر شبغيت فيه
الطبيب ببتسامه: لا بس يعني هو كان موجود قبلي واستقبل حاله كانت بالطوارئ كانت عندي قبل اسبوع وشفت طريقة تعامله معها وكانت قريبه لتعاملي معاه حتى انهم اثنو عليه كثير ابغى اشوفه واخذ بعض التفاصيل منه
ابتسم عزام ووقف : انا عزام تشرفت فيك
الطبيب ابتسم : هلا انا تركي كنت مشرف على حالة المريض اللي انت اشرفت عليه يعطيك العافيه والشرف لي
ابتداء عزام وتركي يتكلمون عن الحاله وبعد نص ساعه افترقوا
ضاري: ي حليله طق الميانه
عزام: ايه
ضاري : انا جوعان
عزام : ماني مشتهي والله
ضاري بطرف عين: اعنبوك انت عايش على الطاقه الشمسيه
عزام: هههههههه ليه
ضاري : لا تاكل ولا تشرب ومالك نفس وعايش كيف تصير
عزام بمزح: بفضل. ربي
ضاري: ايوه هنا عاد جاء وقتك امش بس خلنا ندور لنا شي ناكله
...

عند سميه اللي كانت تبكي وهي تترجى ابوها ما يزوجها
ابو تركي : يبه ي سميه وش اللي مو مرضيك يزن رجال وزين الرجال وانتي تعرفينه وعاقل ولا يعيبه شي
سميه: بس بيوقف بطريقي انا مابي انربط يبه
ابوتركي : من هالناحيه ارتاحي بحرص وأأكد عليه انه يهتم فيك وفي دراستك بس فكينا من المشاكل يبه
سميه قامت بقلة حيله وهي تعرف ان كل شي صار فوق راسها خلاص لحقتها سمر : سميه وش فيك ترا يزن محترم وانتي شفتي لما دقيتي عليه انه متفهم عشان كذا قولي له لا يوقف بطريقك
سميه: هو مابيوقف بس حياتي بتوقف فيه هو وعياله
سمر: لا حول الله ماتدرين لو انه يدعمك ويكون سبب في نجاحك واحمدي ربك انه قال يزن ولا قال اي زفت ثاني انتي مصيبتك ي زينها اجل لو مزوجك ماجد شبيصير فيك
سميه سكتت وهي تحط يدها على راسها ..