Out Of The Blue & Into The Black (Stories) (COMPLETED)

6

NAGTATAGO ang pusa sa ilalim ng mesita sa salas. Nakarinig ito ng lagaslas ng tubig mula sa kusina. Unti-unting lumabas ang pusa sa pinagtataguan. Kinusot muna nito ang sugat sa may ibabaw ng kaliwang mata niya gamit ang unahang paa sabay dila sa nahawing dugo mula sa sugat. Namantsahan na rin ng dugo ang balahibo sa likod ng pusa dahil sa laslas nitong natamo mula sa kutsilyo. Pero tila hindi ito iniinda ng pusa. Maingat itong naglakad palayo sa tinaguang mesita at sumilip mula sa gilid ng isang sofa.

Nakita nito si Reuben, ang taong walang habas na sumasagasa sa anak niyang kuting, na nakaharap sa lababo na patalikod naman kung saan sumisilip ang pusa. Hinuhugasan nito ang mukhang puno na ngayon ng sugat dahil sa kagat at kalmot na natamo nito. Tila umiiyak ito habang hinuhugasan ang dugong dumadaloy sa mukha. Alam ng pusa na pagkakataon na nito para tuluyang makaganti. Sisiguraduhin na ngayon ng pusa na mas malala pa ang mga sugat na matatamo ng lalaki sa kanya. Pambayad-utang sa pagpatay nito sa anak niya.

Mabilis na pumasag-pasag ang buntot ng pusa saka nagmamadali ang mga paa na tumakbo palapit sa lalaki sa lababo at lumundag ulit sa likod nito. Hindi nag-aksaya ng panahon ang pusa. Pinagkakagat nito si Reuben sa batok , sa anit, sa balikat. Nagwawala na ito sa galit.

Si Reuben na saglit na nakakalimot sa nakaambang panganib dahil pinoproblema ang tadtad na mga galos at sugat sa mukha niya ay muling nabigla sa pag-atake muli sa kanya ng pusa. Pinilit niyang hilahin at baklasin ang pusang nakakapit sa likod niya pero parang itong may glue na matinding nakadikit sa kanya. Hindi niya maalis-alis. Tinangka naman niyang kunin ang kitchen knife na nilapag niya sa tabi ng lababo habang naghuhugas siya ng mukha. Nang makita ng pusa na hawak na ni Reuben ang kutsilyo, kaagad itong lumudag sa kamay nitong may hawak ng patalim at ito naman ang mabangis na pinagkakakagat. Nabitawan naman ni Reuben ang kutsilyong hawak at malakas itong tumama sa tiled flooring ng kusina. Pinasag-pasag ni Reuben ang kamay na kinakagat ng pusa pero ayaw pa rin nitong kumalas. Lalo pa atang bumaon ang mga ngipin nito sa kamay niya.

Sa desperasyon, sinutok na lang ng sinutok ni Reuben ang ulo ng pusa pati na ang tiyan nitong nakalawit sa pagkakasakmal sa kamay niya. Lumuwag ang kagat at hawak ng pusa hanggang tuluyan itong humulagpos sa kamay niya. Lumagpak din ang pusa sa sahig katabi ng kutsilyo.

Saglit lang tinapunan ng tingin ni Reuben ang nasakmal na kamay. Hindi niya matingnang maigi ang malalang sugat na ginawa ng pusa kamay niya. Baka lalo lang siyang panghinaan ng loob. Pumiksi si Reuben at nagmamadaling tumakbo paakyat ulit sana ng hagdan.

Nakakailang hakbang pa lang si Reuben sa hagdan ay dinaluhong agad siya ng pusa. Nilundag siya nito sa likuran at kumapit sa suot niyang maong na pantalon saka sinumulang kalmutin at kagatin ang likuran niya.

Umaringking sa sakit si Reuben. Nagmadaling inakyat ni Reuben ang mga baitang ng hagdan at mabilis na tinakbo ang pinto ng kuwarto niya. Nang mabuksan niya ang pinto ay sinadya niyang isalya ng malakas ang likod niya sa bukana ng pintuan. Napa-igik ang pusa at napabitaw sa likod ni Reuben na ngayon ay puno ng dugo sa dami ng kalmot at kagat na tinamo.

Nang makapasok sa kuwarto ay kaagad tinungo ni Reuben ang drawer ng dresser niya at nagsimulang maghalungkat. Pero kaagad siyang natigil nang biglang lumundag ulit ang pusa sa likuran ng ulo niya saka marahas na kinalmot at kinagat siya sa anit. Lagaslas agad ang dugo sa mga bagong sugat na nilikha ng pusa sa ulunan niya.

"Putang-ina ka!" Sigaw ni Reuben na mahigpit na kinalas ang nagwawalang pusa sa ulo niya at marahas itong hinagis palabas sa silid. Dumausdos pa ang pusa sa sahig bago malakas na tumama ang katawan nito sa barandilya.

Nakuha naman ni Reuben ang hinahanap: ang lisensiyado niyang Beretta 92FS. Pero dahil labis na nasugatan ng pusa ang kanang kamay niyang palaging ginagamit, napilitang ipanghawak niya ang kaliwang kamay. Sakto namang nang humarap siya sa nakabukas na pinto ay papasugod ulit ang pusa sa kanya.