Saving Draco Malfoy (Draco x Harry)

ဒိုင်ယာဂွန်နယ်လမ်းကြားမှာ

ဟယ်ရီဟာ ရေဖယောင်းပင်လမ်းရဲ့ပလက်ဖောင်းတစ်နေရာမှာ ငုတ်တုတ်လေးထိုင်နေလေသည်။ဘေးမှာလည်း သေတ္တာတစ်လုံးနဲ့ ဟက်ဒဝစ်ရဲ့လှောင်အိမ်အလွတ်ကရှိနေလေသည်။ အိမ်ကစထွက်ကတည်းက ဟက်ဒဝစ်ကိုလွှတ်ပေးလိုက်တာကြောင့် လှောင်အိမ်အလွတ်သာပါလာလေသည်။ပခုံးပေါ်ကDrarryကလည်း ငြိမ်သက်စွာထိုင်နေလေသည်။

ဟယ်ရီဟာငြိမ်ငြိမ်လေးထိုင်နေရင်း ဖြစ်ပျက်ခဲ့တာကိုပြန်တွေးနေသည်။
ယနေ့မနက်မှာ ဟယ်ရီ့အဒေါ်ရဲ့ယောက်ျား ဗာနွံရဲ့အစ်မဖြစ်တဲ့ မာဂျီဟာ အိမ်ကိုအလည်လာလေသည်။မူလဟယ်ရီပေါ်တာရဲ့မှတ်ဉာဏ်တွေမရှိတဲ့ ဟယ်ရီဟာသူမကိုဇာတ်လမ်းအတိုင်း လေပေါ်ပျံဝဲသွားအောင်သာ ဒုက္ခပေးရန်ကြံစည်ထားပေမဲ့ Drarryပြောပြလာသည့်မူလဟယ်ရီပေါ်တာရဲ့ မှတ်ဉာဏ်ထဲက မာဂျီရဲ့ရက်စက်စွာဟယ်ရီပေါ်တာအား ဆက်ဆံခဲ့ပုံကိုသိသွားသည့်အခါမှာတော့ ပိုပိုသာသာဒုက္ခပေးရန်ဆုံးဖြတ်လိုက်သည်။

ထိုမာဂျီသည် မူလဟယ်ရီပေါ်တာအား အသက်ငါးနှစ်အရွယ်တွင် ခြေထောက်ကျိုးမတတ်ကို သူမရဲ့တောင်ဝှေးနဲ့ရိုက်နှက်ခဲ့လေသည်။ အကြောင်းမှာ သူမရဲ့တူအရင်းဒတ်ဒလေကို ဂီတဟန်အမူအရာပြိုင်ပွဲမှာ နိုင်သွားမည်စိုးတာကြောင့်ပင်။ ဒါ့အပြင်သူမဟာ အိမ်ကိုအလည်လာတိုင်း ဟယ်ရီပေါ်တာအား သူမရဲ့ခွေးဘီလူးကြီးတွေနဲ့ရှူးတိုက်ကာ လိုက်ကိုက်ခိုင်းတတ်ရာ ဟယ်ရီပေါ်တာမှာမနည်းလွတ်အောင်ပြေးရလေ့ရှိသည်။

ထိုအကြောင်းအရာတွေသိသွားသည့်အခါမှာတော့ မာဂျီ့ရဲ့အပေါ်မှာ ဟယ်ရီဟာအတော့်ကိုစိတ်ဆိုးသွားတာကြောင့် ဒုက္ခဆိုးဆိုးဝါးဝါးပေးရန် တေးထားလိုက်သည်။ထို့ကြောင့် ညစာစားသည့်အခါတွင်တော့ မာဂျီသည်
ဒုက္ခမျိုးစုံကြုံရတော့သည်။ သူမရဲ့ဝိုင်ခွက်ထဲကဝိုင်တွေက အလိုလိုနေရင်း သူမမျက်နှာကို လာပြီးပက်ခြင်း၊သူမရဲ့လျှာဟာ အာခေါင်မှာ အချိန်အတော်ကြာအောင်ကပ်နေခြင်း၊ အကြောင်းအရင်းမရှိတစ်ကိုယ်လုံး ယားယံလာခြင်းနှင့် အသက်ရှူလိုက်တိုင်းပူလောင်နေတဲ့ လေပူတွေကိုမှုတ်ထုတ်နေရခြင်း စသည်တို့ကိုခံစားလာရတော့သည်။ သာမန်လူတွေလည်းဖြစ်လေ့ရှိတဲ့ပုံစံတွေကြောင့် မာဂျီဟာသိပ်ကိုသတိမထားမိပဲ ညစာအတွက်ပြင်ဆင်ပေးနေသည့် ဟယ်ရီ့ကိုလှမ်းကြည့်ကာ ဟယ်ရီ့မိဘတွေကိုခွေးနဲ့နှိုင်းပြီးစော်ကားလာတာကြောင့် မူရင်းဇာတ်လမ်းအတိုင်းပင် တစ်ကိုယ်လုံးဖောင်းပွလာကာ လေပေါ်ပျံတက်သွားရတော့သည်။