The Wrong Way To a Demon Sect Leader//Myanmar Translation

-4-

အကြီးအကဲများမှာ ဘာဆက်လုပ်ရမည်ကိုမသိပဲ အကြီးအကျယ် ​ခေါင်းစား​နေကြ၏။

အတွင်းသတင်း​ပေး​ပြောသည်က မိစ္ဆာဂိုဏ်းချုပ်သည် ရုပ်ဖျက်ပြီး လျှို့ဝှက်စွာဖြင့် ဟော့ရန်နယ်​မြေ၏ အနီးပတ်ဝန်းကျင် နယ်​​မြေများသို့ပင် လာ​ရောက်နေပြီဟု။

သူတို့ အချိန်ပိုဆွဲလို့ လုံးဝမဖြစ်​တော့​ပေ!!

သူတို့က ဒီလိုအ​ရေးကိစ္စ၌ ကျွမ်းကျင်​သော သူရဲ​ကောင်းအ​မြောက်အများကို​ ဆင့်ခေါ်၍ ​​ကျောက်ကျန်း​ကွေ့ပြောဆိုရန် ဇာတ်ညွှန်းစာသားများကို ​ရေးကြသည်။ ထို့​​နောက် ​ကျောက်ကျန်း​​ကွေ့အား အလွတ်ကျက်​စေ၏။ သူလိုပါက အချိန်မ​ရွေး မိစ္ဆာဂိုဏ်းထဲမှ အတွင်းလူများကို ဆက်သွယ်ရန် မှာကြားကြ၏။ ​​နောက်တစ်ဆင့်မှာ သူတို့က ​ကျောက်ကျန်း​ကွေ့အား ​ဟော့ရန်နယ်​မြေပြင်ပသို့ ထွက်​စေကာ အခြားလူများကမူ သတင်းများကို ဖြန့်ကြမည်။ ​

ကျောက်ကျန်း​ကွေ့က မသတ်သင့်သည့်လူတစ်​ယောက်ကို မှားယွင်းကာ မ​တော်တဆသတ်လိုက်မိသဖြင့် သိုင်း​လောကမှ အကြီးအကဲများက လူစုကာ ​ကျောက်ကျန်း​ကွေ့ကို လိုက်သတ်​နေသည် ဆို​သော ဇာတ်လမ်းတုကိုပင်။

သူတို့​ရေးသားထား​သော ပထမဇာတ်ညွှန်းမှာ_ ​ကျောက်ကျန်း​ကွေ့က ဝိုင်းဝန်းတိုက်ခိုက်ခံရ​သော​ကြောင့် ​သေလု​မြောပါးဒဏ်ရာရပြီး​နောက် မိစ္ဆာဂိုဏ်းချုပ် ဖြတ်သွားမည့်လမ်း​ပေါ်တွင် လဲ​ကျနေမည်။ ထိုအခါ မိစ္ဆာဂိုဏ်းချုပ်က ​တွေ့ပြီး သူ့ကို ​မိစ္ဆာဂိုဏ်းသို့ ခေါ်​ဆောင်သွားပါက သူတို့​မျှော်လင့်ထားသည့် ထုတ်​ဖော်မ​ပြောအပ်​​သော ကိစ္စရပ်​လေးများက နှစ်ယောက်သားကြားတွင် ​သေချာ​ပေါက်ဖြစ်​ပေါ်လာလိမ့်မည်....ဤသို့ပင်။

သို့​သော် ကိစ္စများမလွဲ​ချော်​စေဖို့ အစမ်းဇာတ်ကြိုတိုက်ကြရင်း အကုန်လုံး​ပြိုင်တူတွေးမိကြသည်က ဇာတ်ညွှန်းမှာ သိပ်အ​​ခြေအ​နေမဟန်ဟုပင်။

​ကျောက်ကျန်း​ကွေ့မှာ ​​လောကနံပါတ်တစ် ဓါးသမားဖြစ်​သော​ကြောင့် သူ့​နောက်မှ လူအ​မြောက်အများ လိုက်တိုက်ခိုက်​နေ​သော်လည်း မည်သူမျှ သူ့​ကော်လံစကိုပင် မထိနိုင်​ချေ။