The Wrong Way To a Demon Sect Leader//Myanmar Translation

-28-

စားပွဲပေါ် တင်ထားသော ဝိုင်ပုလင်းများ တစ်ဝက်ကျိုးသွားသောအခါ ကျိဟန်တစ်ယောက် စတင်ပြီး ‌နောင်တရလာ၏။

သူ ကြက်ဥခေါက်ဆွဲတစ်ပန်းကန်ကို ကုန်အောင်စားခဲ့ပြီးမှသာ ကျောက်ကျန်းကွေ့နှင့် အရက်သောက် ပြိုင်လိုက်သင့်သည်။ အစာအိမ်ဗလာဖြင့် အရက်သောက်ခြင်းမှာ လွယ်လွယ်ဖြင့် မူးစေနိုင်သောကြောင့်ဖြစ်သည်။

အခု သူ့ခေါင်းမှာ အနည်းငယ်ရီဝေနေပြီး ဗိုက်ထဲတွင်လည်း မအီမသာဖြစ်နေ၏။

ပိုပြီးဆိုးသည်က ကျောက်ကျန်းကွေ့ဆိုသူမှာ သူပြောသလို အရက်လုံးဝ မသောက်နိုင်သည့်ပုံမပေါ်..။
ထိုလူကို မူးပြီး ရှုံးသွားအောင်လုပ်ဖို့မှာ မလွယ်ကူသည့်ပုံပင်။

..........

တစ်ဖက်တွင် ကျောက်ကျန်းကွေ့သည်လည်း အလွန်စိတ်ညစ်နေသည်။

သူအရက်မသောက်ဖူးသည်မှာ အမှန်တရားဖြစ်၏။

ယခုက သူ့အတွက် အရက်သောက်သည့် ပထမဆုံးအကြိမ်ဖြစ်သည်။

သူ့ပါးစပ်ထဲသို့ ပထမဆုံးတစ်ခွက် ဝင်သွားသည့်အချိန်ကတည်းက သူ့စိတ်ထဲရှုပ်ထွေးလာရသည်။ ဒီအရက်က ဘာကောင်းလို့ သောက်နေကြတာတုန်း??

စားပွဲပေါ်ရှိ တစ်ဝက်ခန့်မျှ သောက်ပြီးနောက်တွင် ကျောက်ကျန်းကွေ့တစ်ယောက် လောကကြီးမှာ အလွန်သာယာလှပသည်ဟု ခံစားလာရသည်။ သူ့နှလုံးသားထဲတွင် ပီတီနှင့် ပျော်ရွှင်မှုများ ဖုံးလွှမ်းနေပြီး သူ့ဘေး၌ထိုင်နေသော ကျိဟန်ကိုလည်း ငယ်ပေါင်းကြီးဖော် သူငယ်ချင်းကဲ့သို့ တွေးမိလာသည်။ သူ့စိတ်ထဲတွင် ကျိဟန်ကိုပြောဖို့ စကားများ ထောင်သောင်းမက ပေါ်ထွက်လာနေ၏။

နောက်မှ သူ့ကိုယ်သူ သိလိုက်ရသည်က သူအရက်မူးနေပြီဟု။

ကျိဟန်ကမူ သွားကြိတ်ထားရင်း သူ့ကို တစ်ခွက်ပြီးတစ်ခွက် ဆက်ပြီးတိုက်နေသည်။

ကျောက်ကျန်းကွေ့မှာ ရွေးချယ်စရာမရှိပဲ ထပ်သောက်နေရသည်။

နှစ်ယောက်လုံးက မိမိအရှုံးကို ဝန်မခံလိုပဲ ခေါင်းမာမာဖြင့် ဆက်သောက်နေကြ၏။ ကျောက်ကျန်းကွေ့မှာ အလွန်မူးနေပြီး ဘေး၌ ချက်ချင်းလှဲချကာ တစ်ရေးတစ်မော အိပ်ချင်နေပြီဖြစ်သည်။