The Wrong Way To a Demon Sect Leader//Myanmar Translation

- 13 -

ကျင်းပေကောင်းမှာ လန့်ပြီးစကားများပင်ထစ်လာသည်။ "ကျောက်..ကျောက်သာ့ကော..မင်း..မင်း...နဲ့ ဒီ..ဒီ မိစ္ဆာဂိုဏ်းချုပ်နဲ့...မင်းတို့နှစ်ယောက်က.."

ကျိဟန် : "......."

ကျောက်ကျန်းကွေ့  : "ငါ..."

ပြန်ပြောဖို့အတွက် ဇာတ်ညွှန်းထဲက စာသားရှာမရတော့ဘူး...ငါဘာလုပ်သင့်လဲ??

သူတို့စကားများကို နားထောင်နေသည့် ပတ်ဝန်းကျင်ရှိလူများမှာ အူကြောင်ကြောင်ဖြစ်နေကြသည်။

ဘယ်သူမှ စကားဆက်မပြောလာတာကိုတွေ့တော့ ကျင်းပေကောင်းမှာ တစ်ခဏမျှ ရပ်သွားပြီးနောက် အလန့်တကြားပြောလာတော့သည်။ "ကျောက်သာ့ကော..မင်း တကယ်ကြီး..??? ငါ..တကယ်ကို ထင်မထားခဲ့ဘူး..ငါတကယ်..ထင်မထားခဲ့.."

ကျိဟန်၏အမူအရာမှာ ရုတ်တရက်လေးနက်သည့်ပုံသို့ ပြောင်းသွားပြီး_"မင်း အခု ဘာကိုမှ မကြားခဲ့ဘူး "

ကျင်းပေကောင်းမှာ ပုံမှန်အသိစိတ်ပြန်လည်မရရှိသေးသောကြောင့် လွှတ်ခနဲပြောလာသည်။ "ငါသေချာပေါက်ကြားလိုက်တယ်လေ"

ဘေးရှိလူအုပ်ကြီးကလည်း တုံ့ပြန်လာသည်။
"ငါလည်း ကြားလိုက်တယ်.."
"ငါရောပဲ..."

ကျိဟန်က ဘာမှဆက်မပြောသေးပဲ ရပ်သွား၏။ ထို့နောက် သူ့မျက်နှာတွင် ကြောက်မက်ဖွယ်အရှိန်အဝါများ ပေါ်လာပြီး_"မင်းတို့ထဲမှာ ဒီကိစ္စကို ပြန်ပြောရဲတဲ့သူရှိရင်..မိုးမြေအဆုံးထိလိုက်ပြီး..ငါ အဲ့ဒီလူရဲ့ ခေါင်းကိုဖြတ်ပစ်မယ်.."

မည်သူမျှ အသံမထွက်ရဲတော့ပေ..။

ကျိဟန်က ခေါင်းကိုလှည့်ကာ ကျောက်ကျန်းကွေ့၏ လက်ကိုဆွဲပြီး ဆိုင်အပြင်ဘက်သို့ ဆွဲခေါ်လာတော့သည်။

ကျောက်ကျန်းကွေ့  : "........."

ရထားမောင်းသူမှာ ဆိုင်ပြင်တွင် စောင့်နေခဲ့သည်ဖြစ်ရာ သူတို့နှစ်ယောက် လက်တွဲပြီး ပြန်ထွက်လာသည်ကို မြင်တော့ မျက်လုံးပြူးကာ ကျောက်ရုပ်ကဲ့သို့ ရပ်သွား‌လေသည်။

သူ့ကိုလည်း ကျိဟန်က ဂရုပင်မစိုက်တော့ပဲ ကျောက်ကျန်းကွေ့အား ဆွဲထားရက်ပင် ကိုယ်ဖော့ပညာအားသုံးပြီး မြို့ပြင်သို့ ထွက်ခဲ့သည်။